សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងសាងសង់ផ្លូវល្បឿនលឿនទី២ ភ្នំពេញ-បាវិត ត្រូវបានរាជរដ្ឋាភិបាលចុះហត្ថលេខាជាមួយក្រុមហ៊ុនសាងសង់រួចហើយ និងគ្រោងបើកការដ្ឋានសាងសង់នៅពាក់កណ្ដាលឆ្នាំ២០២៣ខាងមុខនេះ។ ព័ត៌មានពាក់ព័ន្ធនឹងការសាងសង់ផ្លូវល្បឿនលឿនភ្នំពេញ-បាវិតនេះ បានធ្វើឱ្យអ្នកវិនិយោគអចលនទ្រព្យជាច្រើនកំពុងសម្លឹងស្វែងរកឱកាសនៃការវិនិយោគនៅក្នុងខេត្តប៉ែកខាងកើតរាជធានីភ្នំពេញ ។
លោកឧកញ៉ា នួន រឹទ្ធី ប្រធានក្រុមប្រឹក្សាភិបាលនៃក្រុមហ៊ុន KFA Group បានលើកឡើងថា គម្រោងផ្លូវល្បឿនលឿនភ្នំពេញ-បាវិត នឹងនាំវិនិយោគិនជាតិ និងអន្តរជាតិទៅកាន់តំបន់ប៉ែកខាងកើតរាជធានីភ្នំពេញបានច្រើន ។
លោកឧកញ៉ាបន្តថា ៖
“តាមពិតទៅ ខេត្តព្រៃវែង និងស្វាយរៀងនៅមិនឆ្ងាយពីរាជធានីភ្នំពេញប៉ុន្មាននោះទេ តែដោយសារតែខេត្តទាំងពីរនេះមិនទាន់មានការរីកចម្រើនលើហេដ្ឋារចនាសម្ព័ន្ធ ជាពិសេសផ្លូវ ទើបមិនទាន់មានការវិនិយោគពីសំណាក់វិនិយោគិន ដូច្នេះនៅពេលមានគម្រោងអភិវឌ្ឍន៍ហេដ្ឋារចនាសម្ព័ន្ធកាន់តែច្រើននោះនឹងធ្វើឱ្យតំបន់មួយចំនួនក្នុងខេត្តទាំង២មានការទាក់ទាញ និងផ្តល់ឱកាសការវិនិយោគកាន់តែច្រើន”
លោក ថា ថេង ប្រធានសាខានៃក្រុមហ៊ុនអចលនទ្រព្យ Century 21 Zillion Holding ប្រចាំខេត្តស្វាយរៀងបានមានប្រសាសន៍តាមទូរសព្ទជាមួយ AMS ឱ្យដឹងថា កាលពីមុននេះបន្តិច ស្ថានភាពអចលនទ្រព្យនៅក្នុងខេត្តស្វាយរៀងហាក់មានសភាពទ្រឹង បើទោះបីជាមានការប្រកាសលក់អចលនទ្រព្យច្រើនពីសំណាក់ម្ចាស់ទ្រព្យយ៉ាងណាក៏មិនសូវមានការស្វែងរកទិញ ឬការចរចានោះដែរ។ ប៉ុន្តែ បច្ចុប្បន្ននេះ ឃើញមានអ្នកវិនិយោគអចលនទ្រព្យមួយចំនួនបានចាប់ផ្ដើមសម្លឹងរកឱកាសក្នុងការវិនិយោគគម្រោងនានានៅក្នុងខេត្តស្វាយរៀង។
លោកបន្តថា ៖
“អ្នកដែលមានគម្រោងស្រាប់នៅក្នុងខេត្តស្វាយរៀងហាក់មានសកម្មភាពបន្តិចឡើងវិញ តែពួកគាត់មិនទាន់បញ្ចេញសកម្មភាពនៅពេលនេះនៅឡើយ គ្រាន់តែពួកគាត់ចុះមកសិក្សាពីការវិនិយោគរបស់ខ្លួននៅក្នុងខេត្តស្វាយរៀងបន្ទាប់ពីគម្រោងផ្លូវល្បឿនលឿនភ្នំពេញ-បាវិតត្រូវបានចុះហត្ថលេខា ។ ក្នុងឆ្នាំ២០២២នេះ បើទោះបីជាស្ថានភាពនៃវិស័យអចលនទ្រព្យក្នុងប្រទេសកម្ពុជាទាំងមូលមិនទាន់មានភាពល្អប្រសើរដូចមុនកូវីដ១៩ក្តី តែការទិញលក់និងតម្លៃអចលនទ្រព្យ ជាពិសេសដីធ្លីនៅក្នុងខេត្តស្វាយរៀងត្រូវបានមើលឃើញថាមានកំណើនក្នុងរង្វង់១០ភាគរយ ដែលជាសញ្ញាវិជ្ជមានសម្រាប់ឆ្នាំ២០២៣ខាងមុខ ។ កំណើនសកម្មភាព និងតម្លៃដីធ្លីនៅក្នុងខេត្តនេះភាគច្រើនបានមកពីការវិនិយោគ និងអភិវឌ្ឍន៍របស់អ្នកវិនិយោគក្នុងស្រុក ហើយអ្នកវិនិយោគបរទេសក៏នៅមិនទាន់មានវត្តមានច្រើនដែរ ហើយការវិនិយោគបន្ថែមពីសំណាក់ជនបរទេសរំពឹងថា និងមានឡើងវិញនាពេលឆាប់ៗនេះផងដែរ”
គួររំលឹកផងដែរថា ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនធ្លាប់បានថ្លែងកាលពីពេលថ្មីៗនេះថា គម្រោងផ្លូវល្បឿនលឿនភ្នំពេញ-បាវិត គ្រោងចំណាយថវិកាប្រមាណ១៧០០លានដុល្លារអាមេរិក និងគ្រោងបើកការដ្ឋានសាងសង់នៅពាក់កណ្ដាលឆ្នាំ២០២៣ខាងមុខ។ ការសាងសង់ផ្លូវល្បឿនលឿនភ្នំពេញ-បាវិតនឹងជំរុញកំណើនសេដ្ឋកិច្ចរវាងភ្នំពេញ និងក្រុងបាវិត ហើយនឹងសម្រួលការដឹកជញ្ជូនទំនិញពីកម្ពុជាទៅកាន់ប្រទេសវៀតណាម និងដឹកពីវៀតណាមមកកម្ពុជាវិញផងដែរ ៕
ជីវប្រវត្តិ: លោកមានបទពិសោធន៍ជាង ១០ឆ្នាំក្នុងប្រព័ន្ធផ្សព្វផ្សាយផ្នែកសេដ្ឋកិច្ច អប់រំ សង្គម និងកម្សាន្ត។ បច្ចុប្បន្នលោកជាការីនិពន្ធនៃសារព័ត៌មាន AMS Economy។
របាយការណ៍ថ្មីៗ
មើលទាំងអស់ ➧
អ្នកជំនាញ ៖ ចង់មានសុវត្ថិភាពគណនីហិរញ្ញវត្ថុគប្បីបង្កើនប្រសិទ្ធភាពលេខសម្ងាត់ឱ្យបានរឹងមាំ
• 09/04/2026
ព័ត៌មានទូទៅ
មើលទាំងអស់ ➧
AMRO ព្យាករថា តំបន់អាស៊ានបូកបីនឹងមានកំណើនសេដ្ឋកិច្ច ៤,១% នៅក្នុងឆ្នាំ ២០២៦ នេះ
ព្រឹត្តិការណ៍, សេដ្ឋកិច្ច, អាជីវកម្មថ្មី និងនវានុវត្ត
• 28/07/2026
ការិយាល័យស្រាវជ្រាវម៉ាក្រូសេដ្ឋកិច្ចអាស៊ាន +៣ (AMRO) សប្តាហ៍នេះ បានចេញផ្សាយរបាយការណ៍បច្ចុប្បន្នភាពប្រចាំត្រីមាស ខែកក្កដា ឆ្នាំ២០២៦ នៃរបាយការណ៍ស្តីអំពីវិស័យសេដ្ឋកិច្ចតំបន់អាស៊ានបូកបី (AREO) ដោយបានព្យាករថា តំបន់អាស៊ានបូកបី (ASEAN+3)នឹងមានកំណើនសេដ្ឋកិច្ច ៤,១ ភាគរយ នៅក្នុងឆ្នាំ ២០២៦ នេះ
កម្មវិធីពិសេសរបស់ AMS ECONOMY
ព័ត៌មានសង្ខេប
Account
Security
Favourite Content