សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ឯកឧត្តម កៅ ថាច ប្រតិភូរាជរដ្ឋាភិបាល និងជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) បានលើកឡើងថា កង្វះលទ្ធភាពទទួលបានហិរញ្ញប្បទាន និងការលំបាកក្នុងការស្វែងរកទីផ្សារ គឺជាបញ្ហាប្រឈមសំខាន់ពីររបស់សហគ្រាសធុនមីក្រូ តូច និងមធ្យម (MSMEs) នៅកម្ពុជា ដែលត្រូវការការដោះស្រាយរួមគ្នា ដើម្បីពង្រឹងផលិតកម្មក្នុងស្រុក និងរក្សាតុល្យភាពសេដ្ឋកិច្ចជាតិ។
ការលើកឡើងនេះធ្វើឡើងក្នុងវេទិកាថ្នាក់ជាតិស្តីពីហិរញ្ញប្បទានសម្រាប់សហគ្រាសធុនមីក្រូ តូច និងមធ្យម លើកទី១ ឆ្នាំ២០២៦ ក្រោមប្រធានបទ «លទ្ធភាពទទួលបានហិរញ្ញប្បទានរបស់ MSMEs» ដែលរៀបចំឡើងនៅថ្ងៃទី២៧ ខែតុលា ឆ្នាំ២០២៦ នៅសាលមហោស្រព និងពិព័រណ៍កោះពេជ្រ ដោយមានការចូលរួមពីរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ តំណាងធនាគារ ARDB និងដៃគូពាក់ព័ន្ធជាច្រើន។
ឯកឧត្តម កៅ ថាច បានមានប្រសាសន៍ថា ៖«MSMEs គឺជាព្រលឹង ជាញើសឈាម ជាដង្ហើមរស់ និងជាឆ្អឹងខ្នងពិតប្រាកដនៃសេដ្ឋកិច្ចជាតិ។ ទោះជាយ៉ាងណា សហគ្រិនខ្មែរជាច្រើននៅតែជួបការលំបាកក្នុងការដំណើរការអាជីវកម្ម ដោយមានអ្នកខ្លះព្រួយបារម្ភពីការខ្វះប្រាក់សម្រាប់បើកប្រាក់ខែឱ្យកម្មករ ខណៈអ្នកខ្លះទៀតមានផលិតផលដែលមានគុណភាព ប៉ុន្តែពិបាករកទីផ្សារ កន្លែងដាក់តាំងលក់ និងប្រឈមនឹងការប្រកួតប្រជែងពីទំនិញនាំចូល»។
ចំពោះបញ្ហាទីមួយ គឺការទទួលបានហិរញ្ញប្បទាន ឬដើមទុន ឯកឧត្តមបានលើកឡើងថា សហគ្រាសធុនមីក្រូ តូច និងមធ្យមភាគច្រើននៅកម្ពុជាជាអាជីវកម្មក្រៅប្រព័ន្ធ ឬអាជីវកម្មលក្ខណៈគ្រួសារ។ នៅពេលត្រូវការដើមទុនដើម្បីពង្រីកអាជីវកម្ម ឬដោះស្រាយបញ្ហាប្រឈម សហគ្រាសទាំងនេះច្រើនតែខ្វះទ្រព្យធានា ហើយការកត់ត្រាបញ្ជីគណនេយ្យមិនបានត្រឹមត្រូវ ក៏ធ្វើឱ្យគ្រឹះស្ថានធនាគារពិបាកវាយតម្លៃហានិភ័យក្នុងការផ្តល់ឥណទានផងដែរ។
ជាលទ្ធផល សហគ្រិនមួយចំនួនត្រូវងាកទៅរកប្រភពទុនក្រៅប្រព័ន្ធដែលមានអត្រាការប្រាក់ខ្ពស់ បង្កើនបន្ទុកបំណុល និងធ្វើឱ្យអាជីវកម្មប្រឈមនឹងហានិភ័យនៃការបរាជ័យ។
ចំណែកបញ្ហាទីពីរ គឺទីផ្សារ។ សហគ្រាសក្នុងស្រុកមួយចំនួននៅខ្វះបច្ចេកវិទ្យាកែច្នៃ និងវេចខ្ចប់ផលិតផល ស្តង់ដារគុណភាព និងបណ្ដាញចែកចាយ។ ការនាំផលិតផលទៅដាក់លក់នៅលើធ្នើរផ្សារទំនើប និងទីប្រជុំជនធំៗ ជាពិសេសនៅរាជធានីភ្នំពេញ ក៏នៅតែជាបញ្ហាប្រឈម។ ទន្ទឹមនឹងនេះ យុទ្ធនាការជំរុញឱ្យប្រជាពលរដ្ឋគាំទ្រ និងផ្តល់តម្លៃដល់ផលិតផលខ្មែរពិតប្រាកដ ក៏នៅមានកម្រិតនៅឡើយ។
ឯកឧត្តម កៅ ថាច បានប្រៀបធៀបថា អាជីវកម្មដែលខ្វះទុនប្រៀបដូចជាដើមឈើដែលខ្វះជីជាតិ និងទឹក។ ចំណែកអាជីវកម្មដែលមានទុន ប៉ុន្តែខ្វះទីផ្សារ គឺដូចជាដើមឈើដែលមានផ្លែផ្អែមឆ្ងាញ់ តែត្រូវទុកឱ្យជ្រុះរលួយចោលក្រោមដើម ដោយគ្មានអ្នកទទួលទាន។
លោកបានសង្កត់ធ្ងន់ថា៖« បញ្ហាប្រឈមទាំងពីរនេះត្រូវដោះស្រាយព្រមគ្នា ព្រោះប្រសិនបើមិនអាចដោះស្រាយបានទេ សេដ្ឋកិច្ចជាតិអាចបាត់បង់តុល្យភាព ហើយភាពម្ចាស់ការលើសន្តិសុខស្បៀង និងផលិតកម្មក្នុងស្រុកក៏អាចរងផលប៉ះពាល់ផងដែរ»។
គួររំលឹកថា វេទិកាថ្នាក់ជាតិស្តីពីហិរញ្ញប្បទានសម្រាប់ MSMEs លើកទី១ ឆ្នាំ២០២៦ ត្រូវបានរៀបចំឡើងបន្ទាប់ពីយុទ្ធសាស្ត្រជាតិស្តីពីការអភិវឌ្ឍសហគ្រាសធុនមីក្រូ តូច និងមធ្យម ឆ្នាំ២០២៦-២០៣០ ត្រូវបានប្រកាសដាក់ឱ្យអនុវត្តជាផ្លូវការកាលពីថ្ងៃទី២២ ខែតុលា ឆ្នាំ២០២៦។ ជាមួយគ្នានេះ អង្គភាពសម្របសម្រួលសហគ្រាសធុនតូច និងមធ្យមថ្មីមួយក៏ត្រូវបានបង្កើតឡើង ដោយមានឯកឧត្តម កង ច័ន្ទតារារ័ត្ន ជាប្រធាន៕
Account
Security
Favourite Content