ភ្នំពេញ៖ សេដ្ឋកិច្ចកម្ពុជាត្រូវបានព្យាករថានឹងសម្រេចកំណើនក្នុងរង្វង់ ៤% នៅឆ្នាំ ២០២៦ និងបន្តកើនដល់ ៤,៨% នៅឆ្នាំ២០២៧ ដោយរាជរដ្ឋាភិបាលគ្រោងប្រមូលចំណូលថវិការដ្ឋប្រមាណ ១៥,២៤% នៃផលិតផលក្នុងស្រុកសរុប (ផ.ស.ស.) និងកំណត់ចំណាយសរុបថ្នាក់ជាតិក្នុងទំហំ ១៥,៨៩% នៃ ផ.ស.ស. ដើម្បីរក្សាលំនឹងសង្គម-សេដ្ឋកិច្ច និងគាំទ្រកំណើនក្នុងបរិការណ៍នៃភាពមិនប្រាកដប្រជា។
ការព្យាករនេះត្រូវបានលើកឡើងក្នុងកិច្ចប្រជុំអន្តរគណៈកម្មការរដ្ឋសភា ដើម្បីពិនិត្យ ពិភាក្សា និងផ្តល់មតិយោបល់លើសេចក្តីព្រាងច្បាប់ស្តីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ២០២៥ និងសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៧ ដែលធ្វើឡើងនៅព្រឹកថ្ងៃទី១៣ ខែវិច្ឆិកា ឆ្នាំ២០២៦។
កិច្ចប្រជុំនេះដឹកនាំដោយឯកឧត្តម ឈាង វុន ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា ជាមួយគណៈប្រតិភូរាជរដ្ឋាភិបាលដឹកនាំដោយឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។
យោងតាមការលើកឡើងរបស់ឯកឧត្តម អូន ព័ន្ធមុនីរ័ត្ន សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៧ ត្រូវបានរៀបចំឡើងដោយផ្អែកលើទិន្នន័យជាក់ស្តែងនៃលទ្ធផលរយៈពេល ៩ ខែដើមឆ្នាំ ២០២៦ ដែលបង្ហាញថា សេដ្ឋកិច្ចកម្ពុជាត្រូវបានវាយតម្លៃថានឹងអាចសម្រេចកំណើន ៤% នៅឆ្នាំ ២០២៦ មុននឹងកើនឡើងដល់ ៤,៨% នៅឆ្នាំ ២០២៧។
តាមក្របខ័ណ្ឌតុល្យភាពរយៈពេលមធ្យមឆ្នាំ ២០២៧-២០២៩ ចំណូលសរុបថវិការដ្ឋក្នុងឆ្នាំ ២០២៧ ត្រូវបានព្យាករថានឹងសម្រេចបានប្រមាណ ១៥,២៤% នៃ ផ.ស.ស. កើនឡើងប្រមាណ ៩,៨% ធៀបនឹងច្បាប់ហិរញ្ញវត្ថុឆ្នាំ២០២៦។ ក្នុងនោះ ចំណូលចរន្តថវិការដ្ឋត្រូវបានរំពឹងថានឹងមានទំហំ ១៤,៧៦% នៃ ផ.ស.ស. កើនឡើងប្រមាណ ១០,២%។
ចំណែកចំណូលសារពើពន្ធថវិការដ្ឋត្រូវបានរំពឹងថានឹងសម្រេចបាន ១២,៨៥% នៃ ផ.ស.ស. កើនឡើងប្រមាណ ១០,៩% ធៀបនឹងឆ្នាំ ២០២៦។ ក្នុងនោះ ចំណូលប្រមូលដោយអគ្គនាយកដ្ឋានគយ និងរដ្ឋាករកម្ពុជាត្រូវបានព្យាករថានឹងមានទំហំ ៥,៨៦% នៃ ផ.ស.ស. កើនឡើង ១៤,៨% ខណៈចំណូលប្រមូលដោយអគ្គនាយកដ្ឋានពន្ធដារមានទំហំ ៦,៩៩% នៃ ផ.ស.ស. កើនឡើង ៧,៨%។
ដោយឡែក ចំណូលមិនមែនសារពើពន្ធត្រូវបានព្យាករថានឹងសម្រេចបាន ១,៩១% នៃ ផ.ស.ស. កើនឡើង ៥,៤% ខណៈចំណូលផ្សេងៗមានទំហំ ០,៤៨% នៃ ផ.ស.ស. ថយចុះប្រមាណ ១% បើធៀបនឹងច្បាប់ហិរញ្ញវត្ថុឆ្នាំ ២០២៦។
សម្រាប់ផ្នែកចំណាយវិញ ចំណាយសរុបថ្នាក់ជាតិក្នុងឆ្នាំ២០២៧ ត្រូវបានគ្រោងក្នុងទំហំ ១៥,៨៩% នៃ ផ.ស.ស. ថយចុះប្រមាណ ២,៥% ធៀបនឹងច្បាប់ហិរញ្ញវត្ថុឆ្នាំ ២០២៦។ ចំណែកក្នុងឆ្នាំ ២០២៨-២០២៩ ចំណាយសរុបថ្នាក់ជាតិត្រូវបានគ្រោងឱ្យកើនឡើងជាមធ្យមប្រមាណ ៥,៥% ក្នុងមួយឆ្នាំ ដោយរំពឹងថានឹងមានទំហំប្រមាណ ១៥,២៧% នៃ ផ.ស.ស. នៅឆ្នាំ ២០២៩។
ឯកឧត្តម អូន ព័ន្ធមុនីរ័ត្ន បានបញ្ជាក់ថា កំណើនសេដ្ឋកិច្ចដែលបានព្យាករនេះស្ថិតក្នុងកម្រិតទាបជាងការរំពឹងទុកពីមុន ដោយសារកម្ពុជាប្រឈមនឹងសម្ពាធពីកត្តាខាងក្រៅ និងក្នុងស្រុកមួយចំនួន រួមមាន ភាពមិនប្រាកដប្រជានៃសេដ្ឋកិច្ចសកល ការកើនឡើងថ្លៃប្រេងឥន្ធនៈ បញ្ហាប្រឈមនៃបទល្មើសបច្ចេកវិទ្យា និងផលប៉ះពាល់ពីការបិទខ្ទប់ច្រកព្រំដែនគោកកម្ពុជា-ថៃ។
ទោះជាយ៉ាងនេះក្តី រាជរដ្ឋាភិបាលនៅតែប្រកាន់ខ្ជាប់នូវស្មារតីបុរេសកម្ម ក្រោមគោលការណ៍ «សង្ឃឹមសម្រាប់ស្ថានភាពប្រសើរ តែត្រៀមខ្លួនសម្រាប់ស្ថានភាពអាក្រក់» ដើម្បីឆ្លើយតបទៅនឹងហានិភ័យដែលអាចកើតមាន។
ឯកឧត្តមបានបន្តថា ថវិកាជាតិឆ្នាំ ២០២៧ ត្រូវបានរៀបចំឡើងក្រោមជំហរគោលនយោបាយហិរញ្ញវត្ថុសាធារណៈគាំពារកំណើនចំគោលដៅ ក្នុងគោលបំណងរក្សាលំនឹងសង្គម-សេដ្ឋកិច្ច។ ថវិកានេះត្រូវបានប្រសិទ្ធនាមថា «ថវិកាដើម្បីការពារអធិបតេយ្យភាព និងបូរណភាពទឹកដី រក្សាលំនឹងជីវភាពប្រជាពលរដ្ឋ និងគាំពារកំណើនចំគោលដៅ ក្នុងបរិការណ៍នៃភាពមិនប្រាកដប្រជាខ្ពស់» ដើម្បីធានាសមត្ថភាពឆ្លើយតបគ្រប់ជ្រុងជ្រោយ និងរក្សាចីរភាពហិរញ្ញវត្ថុសាធារណៈក្នុងរយៈពេលវែង។
ជាមួយគ្នានេះ ក្របខ័ណ្ឌចំណាយតាមវិស័យរយៈពេលមធ្យមឆ្នាំ ២០២៧-២០២៩ ក៏បានគិតបញ្ចូលទាំងចំណាយចរន្ត និងចំណាយមូលធន ព្រមទាំងលទ្ធភាពហិរញ្ញប្បទានពីថវិកាជាតិ និងប្រភពហិរញ្ញប្បទានក្រៅប្រទេស ទាំងទ្វេភាគី និងពហុភាគីផងដែរ៕





វិថីហិរញ្ញវត្ថុ
































































Account
Security
Favourite Content