ភ្នំពេញ ៖ ដោយមើលឃើញពីចក្ខុវិស័យគិតគូរដ៏វែងឆ្ងាយ និងច្បាស់លាស់របស់រាជរដ្ឋាភិបាលទៅលើបទពិសោធន៍វិជ្ជាជីវៈនៃភស្តុភាកម្មដែលមានរយៈពេលជាង១០ឆ្នាំ ក្រុមហ៊ុន FWI​ Corporation បានបង្កើតក្រុមហ៊ុនបុត្រសម្ព័ន្ធមួយឡើងជាផ្លូវការនាថ្ងៃទី០៥ ខែកញ្ញា ឆ្នាំ២០២២ គឺក្រុមហ៊ុន វែរហៅស៍វ័ន អេនធើប្រាយ (WAREHOUSE ONE ENTERPRISE CO., LTD)។​ វែរហៅស៍វ័ន អេនធើប្រាយ ជាបុត្រសម្ព័ន្ធរបស់ក្រុមហ៊ុន FWI Corporation ដែលជាការវិនិយោគរួមរវាងកម្ពុជា និង AFMF Singapore។

ក្រុមហ៊ុន បុត្រសម្ព័ន្ធ FWI Corporation ក៏ទទួលបានការគាំទ្រពីក្រុមហ៊ុនបុត្រសម្ព័ន្ធ FWF ដែលជាការវិនិយោគរួមរវាងកម្ពុជា និង Nisshin Japan។ ក្រុមហ៊ុន វែរហៅស៍វ័ន អេនធើប្រាយ រហូតមកដល់ពេលនេះ មានបុគ្គលិកបម្រើការងារសរុបទាំងអស់ ៨៨ នាក់ កំពុងបម្រើការងារនៅតាមបច្ចេកទេស  រដ្ឋបាល និងប្រតិបត្តិការ។ ទន្ទឹមនឹងនេះ ក្រុមហ៊ុនកំពុងបន្តជ្រើសរើសមុខតំណែងជាច្រើនបន្ថែមទៀត ដើម្បីគាំទ្រដល់ការពង្រីកសកម្មភាពអាជីវកម្ម និងការកើនឡើងនៃតម្រូវការសេវាកម្មភស្តុភាកម្ម។​

កំពង់ផែស្ងួតវែរហៅស៍វ័ននេះ ត្រូវបានចាប់ផ្តើមសាងសង់នៅថ្ងៃទី០៥ ខែកុម្ភៈ ឆ្នាំ២០២៥ ហើយបានបញ្ចប់ការសាងសង់ជាស្ថាពរនៅថ្ងៃទី២០ ខែមករា ឆ្នាំ២០២៦។ គម្រោងផែស្ងួតនេះ ត្រូវបានអភិវឌ្ឍលើផ្ទៃដីទំហំប្រមាណជិត ៧(ប្រាំពីរ) ហិកតា ចំណាយដើមទុនវិនិយោគសរុបប្រមាណជាង ១៥ ០០០ ០០០(ដប់ប្រាំលាន) ដុល្លារសហរដ្ឋអាម៉េរិក សម្រាប់ការសាងសង់ហេដ្ឋារចនាសម្ព័ន្ធ ការដំឡើងឧបករណ៍បច្ចេកទេស និងការរៀបចំប្រព័ន្ធប្រតិបត្តិការដែលមានស្តង់ដារសមស្របតាមតម្រូវការអាជីវកម្មភស្តុភាកម្មសម័យទំនើប។​ ក្នុងហេដ្ឋារចនាសម្ព័ន្ធផែស្ងួតនេះ រួមមាន៖ ឃ្លាំងទុកដាក់ទំនិញសម្រាប់ការនាំចេញ នាំចូល ដែលមានផ្ទៃក្រឡា ២៣ ០០០ម៉ែត្រការេ អគារការិយាល័យបុគ្គលិក និងមន្រ្តីគយ មានកំពស់ ៣ជាន់ និងផ្ទៃក្រឡា ១ ៥០០ម៉ែត្រការេ បំពាក់ដោយបរិក្ខាទំនើបៗ សម្រាប់ការគ្រប់គ្រង និងសេវាកម្មអតិថិជន, ទីលានទុកដាក់ទូកុងទីន័រ, ទីធ្លាចំណតយានយន្តដឹកជញ្ជូន និងចំណតសម្រាប់ភ្ញៀវ, រោងជាងជួសជុលយានយន្ត។ល។ និង។ល។

ឃ្លាំងទុកដាក់ទំនិញ និងអគារត្រូវបានរចនាឡើងតាមបែបអគារបៃតង(Green Building) និងបច្ចេកវិទ្យាសន្សំថាមពល​​  មានប្រព័ន្ធចម្រោះទឹកកខ្វក់តាមស្តង់ដារ ដើម្បីធានាការគ្រប់គ្រងបរិស្ថានស្អាតយ៉ាងមានការទទួលខុសត្រូវខ្ពស់។ ចំពោះផ្នេកសុវត្ថិភាព ត្រូវបានបំពាក់ប្រព័ន្ធពន្លត់អគ្គីភ័យស្របតាមស្តង់ដារ UL និង FM របស់សហរដ្ឋអាម៉េរិក ដើម្បីការពារបុគ្គលិក ទំនិញ និងទ្រព្យសម្បត្តិ។​ ទាំងនេះជាការបង្ហាញពីការប្តេជ្ញាចិត្តរបស់ក្រុមហ៊ុនចំពោះស្តង់ដារអន្តរជាតិ និងគោលការណ៍ ESG​ ក្នុងការអភិវឌ្ឍន៍សេដ្ឋកិច្ចកម្ពុជា ដែលបានបង្កើតការងារ ពង្រឹងជំនាញ បង្កើនប្រសិទ្ធភាពខ្សែចង្វាក់ផ្គត់ផ្គង់ និងជំរុញពាណិជ្ជកម្មដោយកាត់បន្ថយការចំណាយ និងចំណេញពេលវេលា ជួយលើកម្ពស់សមត្ថភាពប្រកួតប្រជែងជាតិ។

ផែស្ងួត វែរហៅស៍វ័ន មិនមែនគ្រាន់តែជាកន្លែងស្តុកទំនិញទេ វាក៏ជាវេទិកាដឹកជញ្ជូន One-Stop ដែលរួមបញ្ចូលឃ្លាំង ទីកន្លែងបំពេញបែបបទគយ និងការតភ្ជាប់ដឹកជញ្ជូនពេញលេញផងដែរ។ គោលបំណងនៃការសាងសង់ផែស្ងួតនេះឡើង គឺដើម្បីចូលរួមចំណែកជាមួយរាជរដ្ឋាភិបាលក្នុងការអភិវឌ្ឍន៍សេដ្ឋកិច្ចប្រទេសជាតិ និងជីវភាពប្រជាពលរដ្ឋឲ្យកាន់តែល្អប្រសើរឡើងតាមរយៈ៖

               ១. ការទាក់ទាញ កៀរគរវិនិយោគិនបរទេសមកធ្វើធុរៈកិច្ចនៃការធ្វើទំនើបកម្មនៃភស្តុភាកម្មផែស្ងួតនេះ។

              ២. ការបង្កើតការងារជូនដល់ប្រជាពលរដ្ឋ។

              ៣. ការបង្កើតចំណូលពន្ធជូនរាជរដ្ឋាភិបាល។

              ៤. ការបង្កើតជាមជ្ឈមណ្ឌលផ្តល់សេវាកម្មតែមួយកន្លែងសម្រាប់ការងារភស្តុភាកម្ម។

              ៥. ការបង្កើនល្បឿននៃការនាំចេញឲ្យបានលឿន និងច្រើន។

              ៦. ការកាត់បន្ថយការចំណាយដឹកជញ្ជូនតាមផ្លូវគោក ។

ឆ្លៀតក្នុងឱកាសនេះ ប្រធានក្រុមហ៊ុន ក៏បានថ្លែងអំណរគុណយ៉ាងជ្រាលជ្រៅបំផុតចំពោះរាជរដ្ឋាភិបាលកម្ពុជា និងថ្លែងអំណរគុណដល់ក្រុមប្រឹក្សាអភិវឌ្ឍន៍កម្ពុជា(CDC) សម្រាប់ការគាំទ្រដ៏មានតម្លៃ រួមទាំងការលើកលែងពន្ធនាំចូលសម្ភារៈសំណង់ និងបរិក្ខារ។ សូមអរគុណដល់អគ្គនាយកដ្ឋានគយ និងរដ្ឋាករកម្ពុជា ព្រមទាំងស្ថាប័នពាក់ព័ន្ធទាំងអស់ ជាពិសេសអាជ្ញាធរខេត្ត និងស្រុក សម្រាប់កិច្ចសហការយ៉ាងជិតស្និទ្ធ ជាមួយនឹងការបើកឱ្យដំណើរការផែស្ងួត វែរហៅស៍វ័ន នេះ ។​​ ក្រុមហ៊ុន វែរហៅស៍វ័ន អេនធើប្រាយ បានត្រៀមខ្លួនរួចជាស្រេចក្នុងការផ្តល់សេវាដឹកជញ្ជូនប្រកបដោយប្រសិទ្ធភាព សុវត្ថិភាព និងនិរន្តរភាព។

ផែស្ងួតវែរហៅស៍វ័ន នេះ​ ត្រូវបានបើកសម្ពោធឲ្យដំណើរជាផ្លូវការឡើងក្រោមអធិបតីភាពដ៏ខ្ពង់ខ្ពស់របស់ឯកឧត្តមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា​ នាថ្ងៃសុក្រ ៣រោច ខែផល្គុន ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវថ្ងៃទី០៦ ខែមីនា ឆ្នាំ២០២៦​ ដោយមានការចូលរួមពីសំណាក់ឯកឧត្តម ស៊្រុន ស៊្រន់ អភិបាលរងខេត្ត តំណាងដ៏ខ្ពង់ខ្ពស់ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ លោកអ្នកឧកញ៉ា អ្នកឧកញ៉ា លោកឧកញ៉ា មកពីសមាគមន៍សហគ្រាសខ្នាតតូច (Small Business Enterprises )​ វិនិយោគិនជាតិ និងអន្តរជាតិ ប្រមាណជាង ៣០០នាក់ (បីរយនាក់) និងប្រជាពលរដ្ឋក្នុងទឹកស្រុកគងពិសី ប្រមាណជា ១៥០០ នាក់ (មួយពាន់ប្រាំរយនាក់) ។ សូមបញ្ជាក់ថា ទីតាំងផែស្ងួតវែរហៅស៍វ័ន នេះ ស្ថិតនៅភូមិប្រវឹកពង ឃុំទឹកល្អក់ ស្រុកគងពិសី ខេត្តកំពង់ស្ពឺ ៕