សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ឆ្លើយតបទៅនឹងបដិវត្តន៍ឧស្សាហកម្ម៤.០ កម្ពុជា បាន និងកំពុងបោះជំហានឆ្ពោះទៅមុខ ឈានទៅរកកាអភិវឌ្ឍវិស័យកម្មន្តសាលកម្រិតខ្ពស់ តាមរយៈបង្កើតរោងចក្រផលិតគ្រឿងអេឡិចត្រូនិក និងគ្រឿងបន្លាស់រថយន្តជាដើម។ នេះជាការលើកឡើងរបស់អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា ថ្លែងក្នុងកិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៦ នៅថ្ងៃទី០៤ ខែមីនា ឆ្នាំ២០២៦ ក្រោមប្រធានបទ «បរិវត្តកម្មអាស៊ាន ៖ នវានុវត្តន៍ សមាហរណកម្ម និងការវិវត្តន៍ឧស្សាហកម្ម» ។
អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ាន-កម្ពុជា (ASEAN-BAC Cambodia) បានបញ្ជាក់ថា កម្ពុជាកំពុងផ្លាស់ប្តូរឆ្ពោះទៅរកកម្មន្តសាលកម្រិតខ្ពស់ ជាពិសេសនៅក្នុងវិស័យអេឡិចត្រូនិក និងគ្រឿងបន្លាស់រថយន្ត ដោយមានការគាំទ្រពីថវិកាជាតិចំនួន ១០,១ ពាន់លានដុល្លារអាម៉េរិក ដែលផ្តល់អាទិភាពដល់ការធ្វើទំនើបកម្មភាពប្រកួតប្រជែង និងអធិបតេយ្យភាពសេដ្ឋកិច្ច។
លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម និងសេដ្ឋកិច្ច បានមើលឃើញថា ការឈានទៅរកការអភិវឌ្ឍវិស័យកម្មន្តសាលកម្រិតខ្ពស់ សមស្របទៅនឹងស្ថានភាពជាក់ស្តែង នៃវិស័យឧស្សាហកម្មដែលកំពុងតែរីកចម្រើនខ្លាំងជាគេធៀបនឹងវិស័យផ្សេងៗទៀត។
លោកបញ្ជាក់ថា ៖
«បច្ចុប្បន្នកម្ពុជាមានកម្លាំងពលកម្មច្រើន ប៉ុន្តែសម្រាប់ពលករជំនាញបច្ចេកវិទ្យាកម្រិតខ្ពស់នៅមានចំនួនតិចនៅឡើយ ភាគច្រើនពលកររបស់យើងគេហៅថាពលករមិនមានជំនាញ ហើយក៍យើងមានកម្រិតកើនឡើងដែរ តាមរយៈការអន្តរាគមន៍កម្មវិធីបណ្តុះបណ្តាលវិជ្ជាជីវៈ នោះគឺកម្លាំងពលកម្មយើងជាកម្មករជំនាញពាក់កណ្តាលបច្ចេកវិទ្យា ប៉ុន្តែកម្រិតខ្ពស់គឺយើងនៅមានកម្រិតខ្លាំងនៅឡើយ»។
លោក សេង វឹង នាយកគ្រប់គ្រងទូទៅរបស់ក្រុមហ៊ុន Ford Cambodia បានមានប្រសាសន៍ គាំទ្រចំពោះដំណើរការឆ្ពោះទៅរកកិច្ចអភិវឌ្ឍន៍វិស័យកម្មន្តសាលកម្រិតខ្ពស់របស់កម្ពុជា ដោយលោកបញ្ជាក់ថា អាចធ្វើទៅបាន ប៉ុន្តែទាមទារឱ្យមានការបណ្តុះបណ្តាលជំនាញបន្ថែម។
លោកបញ្ជាក់ថា ៖
«ឧបមាថាយើងមកបើករោងចក្រដើម្បីផលិត ក៍យើងនៅតែត្រូវបណ្តុះបណ្តាលគាត់ ប៉ុន្តែគ្រាន់តែថា យើងបណ្តុះបណ្តាលនៅក្រៅប្រទេស ឬបណ្តុះបណ្តាលនៅក្នុងប្រទេស ហើយយើងមានកម្មករគ្រប់គ្រាន់ហើយឬនៅ?»
ឆ្លើយតបនឹតតម្រូវការកម្លាំងពលកម្មជំនាញ បច្ចុប្បន្នក្រុមហ៊ុន Ford បានសហការជាមួយក្រសួងការងារ និងបណ្តុះបណ្តាលវិជ្ជាជីវៈ បង្កើតសាលាបណ្តុះបណ្តាលជំនាញពលកម្មក្នុងវិស័យកម្មន្តសាលកម្រិតខ្ពស់ ដោយមានការបណ្តុះបណ្តាលពីគ្រូជំនាញទាំងក្នុង និងក្រៅប្រទេស។
បច្ចុប្បន្ន ប្រទេសកម្ពុជាបានផ្តល់អាទិភាពដល់វិស័យបច្ចេកវិទ្យាជាសមាសធាតុស្នូលនៃគោលនយោបាយជាតិ ដោយសារកំណើនដែលមានតម្លៃខ្ពស់មិនអាចបំបែកចេញពីភាពចាស់ទុំផ្នែកឌីជីថលបានឡើយ ។
សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានមានប្រសាសន៍ក្នុងកិច្ចប្រជុំកំពូលធុរកិច្ចអស៊ាន-កម្ពុជា ឆ្នាំ២០២៦ ថា បច្ចុប្បន្ន កម្ពុជាកំពុងអនុវត្តបដិវត្តកម្មជំនាញដ៏ធំមួយ តាមរយៈកម្មវិធីអប់រំបណ្តុះបណ្តាលបច្ចេកទេស និងវិជ្ជាជីវៈ(TVET) សម្រាប់យុវជន ១.៥លាននាក់ ដោយមានកិច្ចសហការជាមួយមេដឹកនាំឧស្សាហកម្ម ដូចជា ក្រុមហ៊ុន Toyota កម្ពុជា ធានាថាកម្លាំងពលកម្មនៅកម្ពុជា មិនត្រឹមតែត្រៀមខ្លួនរួចជាស្រេចក្នុងការបំពេញការងារប៉ុណ្ណោះទេ ប៉ុន្តែថែមទាំងអនុលោមតាមតម្រូវការក្នុងបដិវត្តឧស្សាហកម្មទី៤ ផងដែរ។
បើតាមតួលេខក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានឱ្យដឹងថា នៅក្នុងឆ្នាំ២០២៥ កម្ពុជា មានរោងចក្រធុនធំចំនួន ៣ ០៨១ កើនឡើង ៦៥៨រោងចក្រ ស្មើនឹង ២៧,១៣ ភាគរយ ធៀបនឹងឆ្នាំ២០២៤។ ក្នុងនោះមានតំបន់សេដ្ឋកិច្ចពិសេស ដែលមានរោងចក្រកំពុងដំណើរការចំនួន ៣៤តំបន់ ស្ថិតក្នុង ១១រាជធានី កើនឡើង ០៤តំបន់ស្មើនឹង ១១,៣៣% ធៀបនឹងឆ្នាំ២០២៤។
ដោយឡែក សម្រាប់វិស័យកម្មន្តសាល បានចូលរួមផ្តល់ឱកាសការងារដល់ពលរដ្ឋខ្មែរសរុបចំនួន ១ ២៦៨ ៩៥៣នាក់ ស្រ្តីចំនួន ៩០២ ៩៩១ ស្មើនឹង ៧១,២៤% កើនឡើង ១០៨ ៧៧២នាក់ ស្មើនឹង ៩,៣៨% ធៀបនឹងឆ្នាំ២០២៤៕
Account
Security
Favourite Content