បរទេស៖ យោងតាមប្រភពព័ត៌មានពី The Nation បានរាយការណ៍ថា ម្ចាស់អាជីវកម្ម ឬ ធុរកិច្ចថៃមួយចំនួនកំពុងដកការវិនិយោគរបស់ពួកគេចេញពីប្រទេសមីយ៉ាន់ម៉ា ខណៈដែលសេដ្ឋកិច្ចប្រទេសនេះបន្តធ្លាក់ចុះក្នុងរយៈពេលជិត ៤ឆ្នាំកន្លងមកនេះ ហើយមិនមានសញ្ញាបង្ហាញថានឹងប្រសើរឡើងនោះទេ។

លោក Thammasak Sethaudom អនុប្រធានប្រតិបត្តិនៃក្រុមហ៊ុនស៊ីម៉ង់ត៍ Siam Cement Group (SCG) បានលើកឡើងថា ក្រុមហ៊ុនបានផ្អាកប្រតិបត្តិការរោងចក្រចំនួនពីរនៅក្នុងប្រទេសមីយ៉ាន់ម៉ា និងផ្អាកការពង្រីកផែនការក្នុងរយៈពេលពីរឆ្នាំចុងក្រោយនេះ ដោយសារតែអស្ថិរភាពនយោបាយ។ SCG បានវិនិយោគជាង ៨ ពាន់លានបាត (២៣៣,៧ លានដុល្លារ) នៅក្នុងរោងចក្រទាំងនោះ ហើយម៉ាស៊ីនមួយចំនួនត្រូវបានចោរលួច ខណៈដែលជម្លោះនៅតែបន្តកើតមាន។ លោក​មិនច្បាស់​ថា​នឹង​បន្ត​ប្រតិបត្តិការ​នៅពេលណា​វិញ​នោះ​ទេ​។ ទន្ទឹមនឹងនេះ មីយ៉ាន់ម៉ា មានរោងចក្រស៊ីម៉ងត៍មួយទៀតនៅភាគខាងជើង ដែលជាកម្មសិទ្ធិរបស់ក្រុមហ៊ុនចិន និងយាមដោយយោធាចិន ប៉ុន្តែ SCG មិន​អាច​ធ្វើបែបនេះដែរ​​ទេ។

ថ្មីៗនេះ ក្រុមហ៊ុនភេសជ្ជៈយក្ស Osotspa Plc (OSP) បានប្រកាសថា នឹងលក់ភាគហ៊ុនរបស់ខ្លួននៅក្នុង Golden Eagle និង Myanmar Golden Glass ក្នុងតម្លៃ ១៣៦ លានបាត (៣,៩៧ លានដុល្លារ)។

លោក Ratiporn Ratcharoen ប្រធានផ្នែកហិរញ្ញវត្ថុរបស់ OSP លើកឡើងថា ការលក់ភាគហ៊ុននៅក្នុងក្រុមហ៊ុនបុត្រសម្ព័ន្ធពីរដែលមានមូលដ្ឋាននៅមីយ៉ាន់ម៉ា គឺជាផ្នែកមួយនៃយុទ្ធសាស្រ្តរបស់ក្រុមហ៊ុនក្នុងការពង្រឹងអាជីវកម្មស្នូលរបស់ខ្លួន និងការធ្វើអាជីវកម្មមិនមែនស្នូល។ មិនត្រឹមតែប៉ុណ្ណោះ ក្រុមហ៊ុនផលិតផលប្លាស្ទិក TPBI Public Company Limited បានជូនដំណឹងដល់ផ្សារហ៊ុនថៃ (SET) កាលពីខែកក្កដាថា ក្រុមប្រឹក្សាភិបាលរបស់ខ្លួនបានសម្រេចចិត្តបិទគណនីដែលទាក់ទងនឹង TPBI & Myanmar Star Company Limited ដែលជាក្រុមហ៊ុនបុត្រសម្ព័ន្ធនៅមីយ៉ាន់ម៉ា ដោយសារតែភាពមិនប្រាកដប្រជានៃសេដ្ឋកិច្ចក្នុងប្រទេសមីយ៉ាន់ម៉ា។

កាលពីខែវិច្ឆិកាឆ្នាំមុន ក្រុមហ៊ុនរៀបចំព្រឹត្តិការណ៍ និងពិធីការ Grand Prix International Plc ក៏បានជូនដំណឹងដល់ SET អំពីការបិទក្រុមហ៊ុន GPI Myanmar Company Limited នៅមីយ៉ាន់ម៉ាផងដែរ។ បន្ថែមពីនេះ Kriangkrai Kanjanapokin ស្ថាបនិក និងជានាយកប្រតិបត្តិ Index Creative Village លើកឡើងថា ក្រុមហ៊ុនរបស់គាត់បានសម្រេចចិត្តបញ្ឈប់អាជីវកម្មគ្រប់គ្រងព្រឹត្តិការណ៍នៅមីយ៉ាន់ម៉ាក្នុងឆ្នាំ ២០២៣ បន្ទាប់ពីប្រតិបត្តិការជិត ៤ ឆ្នាំនៅក្នុងប្រទេសនេះ។ ឥឡូវនេះ លោក​មិន​មាន​ផែនការ​ចូល​ទីផ្សារ​មីយ៉ាន់ម៉ា​វិញ​នោះទេ ​លុះត្រា​តែ​ស្ថានការណ៍​វិល​មក​រក​ភាព​ប្រក្រតី​វិញ ១០០ ភាគរយ។

ទោះជាយ៉ាងណាក្តី មិន​មែន​ក្រុមហ៊ុន​ថៃ​ទាំង​អស់​សុទ្ធតែដក​ខ្លួន​ចេញ​ពី​មីយ៉ាន់ម៉ា​នោះទេ។ ថ្មីៗនេះ ក្រុមហ៊ុន Thai Beverage Plc បានរាយការណ៍ពីការកើនឡើងនៃប្រាក់ចំណូលនៅក្នុងអាជីវកម្មស្រារបស់ខ្លួននៅមីយ៉ាន់ម៉ាក្នុងរយៈពេល ៩ខែកន្លងមកនេះ។ ក្រុមហ៊ុននេះបានទិញភាគហ៊ុន ៧៥ ភាគរយនៅក្នុង Grand Royal Group ដែលជាក្រុមហ៊ុនផលិតស្រាវីស្គីដ៏ធំបំផុតរបស់ប្រទេសមីយ៉ាន់ម៉ាក្នុងឆ្នាំ ២០១៧។ បន្ថែមពីនេះ ក្រុមហ៊ុន Thai Bev ក៏បានវិនិយោគជាង ៥០០ លានបាត (១៤,៦២ លានដុល្លារ) នៅក្នុងរោងចក្រផលិតស្រាបៀរនៅប្រទេសមីយ៉ាន់ម៉ាផងដែរ។ មិនត្រឹមតែប៉ុណ្ណោះ Thai President Foods ដែលជាក្រុមហ៊ុនផលិតមីម៉ាម៉ាក៏កំពុងដំណើរការនៅទីនោះផងដែរ។

គួរឲ្យបញ្ជាក់ដែរថា ចាប់តាំងពីមានការរាតត្បាតជំងឺកូវីដ-១៩មក សេដ្ឋកិច្ចមីយ៉ាន់ម៉ាបានធ្លាក់ចុះ ហើយកាន់តែអាក្រក់ទៅៗក្នុងអំឡុងពេលមានរដ្ឋប្រហារយោធាក្នុងឆ្នាំ២០២១ គួបផ្សំជាមួយនឹងជម្លោះរវាងរដ្ឋាភិបាលរបបយោធា និងក្រុមជនជាតិភាគតិច។ ចាប់តាំងពីរបបយោធាចូលកាន់កាប់ប្រទេសមីយ៉ាន់ម៉ាក្នុងខែកុម្ភៈ ឆ្នាំ២០២១ មក សេដ្ឋកិច្ចរបស់មីយ៉ាន់ម៉ាត្រូវបានបំផ្លិចបំផ្លាញដោយសារឥទ្ធិពលនៃសង្គ្រាម ការដាក់ទណ្ឌកម្ម និងគោលនយោបាយសេដ្ឋកិច្ចរបស់រដ្ឋាភិបាលយោធា។ បញ្ហាទាំងនេះបានរារាំងដល់ការស្ទុះងើបឡើងវិញរួមមាន តម្រូវការអ្នកប្រើប្រាស់ខ្សោយ អត្រាមានការងារធ្វើទាប ហើយអាជីវកម្មទទួលរងការខាតបង់ ដោយសារការរឹតបន្តឹងលើរូបិយប័ណ្ណបរទេស ការធ្លាក់ចុះនៃការនាំចេញ និងអតិផរណាកើនឡើង៕