សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ កាលពីថ្ងៃដើមសប្តាហ៍កន្លងទៅនេះ កំរាលព្រំពណ៍ក្រហមឆ្អិនឆ្អៅត្រូវបានរៀបចំរួចជាស្រេចដើម្បីស្វាគមន៍វត្តមាននៃការមកដល់របស់បណ្តាមេដឹកនាំអាហ្វ្រិកទាំងឡាយដែលមកកាន់រដ្ឋធានីក្រុងប៉េកាំង ដើម្បីចូលរួមក្នុងវេទិកាស្តីពីកិច្ចសហប្រតិបត្តិការចិន-អាហ្វ្រិក (China–Africa Cooperation Forum) ដែលប្រព្រឹត្តទៅនៅថ្ងៃទី៤ ខែកញ្ញា ឆ្នាំ២០២៤ នេះ ក្នុងរយៈពេល៤ថ្ងៃ។ មិនត្រឹមតែប៉ុណ្ណោះ ផ្នែកសន្តិសុខក៏ត្រូវបានរឹតបន្តឹងនៅទូទាំងទីក្រុងប៉េកាំង ដោយក្នុងនោះរួមមានទាំងផ្លូវធ្វើដំណើរ និងចំណតរថយន្តក្រុងត្រូវបានបិទបាំងដោយបដាដែលមានសរសេរថា ៖ ចិន និងអាហ្រ្វិក រួមដៃគ្នាសម្រាប់អនាគតដ៏ភ្លឺស្វាង (China and Africa are joining hands for a brighter future) ។
អាហ្វ្រិក មិនត្រឹមតែជាដៃគូពាណិជ្ជកម្មដ៏ធំបំផុតមួយរបស់មហាយក្សចិននោះទេ វាក៏ត្រូវបានគេចាត់ទុកថាជាទ្វីបដែលសំបូរទៅដោយធនធានធម្មជាតិយ៉ាងច្រើនសន្ធឹកសន្ធាប់ដូចជា ទង់ដែង មាស លីចូម និងរ៉ែដ៏កម្រ។ អាហ្វ្រិកក៏មានឈ្មោះជាអ្នកកម្ចីប្រាក់ដែលមានទំហំរាប់ពាន់លានដុល្លារពីរដ្ឋាភិបាលចិនផងដែរសម្រាប់កញ្ចប់កិច្ចការងារដើម្បីអភិវឌ្ឍហេដ្ឋារចនាសម្ព័ន្ធរបស់ខ្លួន ខណៈដែលចិនកន្លងមកបានបញ្ជូនកម្មករជំនាញជាច្រើនពាន់នាក់ទៅកាន៉ទ្វីបមួយនេះក្នុងការសិក្សា និងកសាងគម្រោងធំៗ។
របាយការណ៍ដែលត្រូវបានធ្វើឡើងដោយសារព័ត៌មានចិនបានបង្ហាញថា ទំហំពាណិជ្ជកម្មរវាងគ្នាចិន និងទ្វីបអាហ្វ្រិកទាំងមូល បានកើនឡើងទៅដល់ ១៦៧,៨ពាន់លានដុល្លារគិតត្រឹមឆមាសទី១ ឆ្នាំ២០២៤នេះ ហើយក្នុងនោះទំហំពាណិជ្ជកម្មទ្វេភាគីជាមួយតែប្រទេសអាហ្វ្រិកខាងត្បូង South Africa ប៉ុណ្ណោះ មានប្រមាណជាជិត ៣៩ពាន់លានដុល្លារ (ទំហំពាណិជ្ជកម្មកាលពីឆ្នាំ២០២៣) ។
មេដឹកនាំអាហ្វ្រិកខាងត្បូង លោកប្រធានាធិបតី Cyril Ramaphosa បានអញ្ជើញមកដល់ទីក្រុងប៉េកាំងមុនគេកាលពីព្រលឹមថ្ងៃចន្ទ។ លោកត្រូវបានគេរំពឹងទុកថានឹងចុះហត្ថលេខាទៅលើកិច្ចព្រមព្រៀងជាច្រើនក្នុងគោលបំណងពង្រីកកិច្ចសហប្រតិបត្តិការសេដ្ឋកិច្ចជាមួយនឹងចិន។ នៅថ្ងៃចន្ទដដែលនោះប្រធានាធិបតីចិនក៏បានជួបជាមួយនឹងមេដឹកនាំនៃប្រទេសកុងហ្គោប្រទេសជីប៊ូទីផងដែរ។
គួរឲ្យដឹងដែរថា ប្រជាជាតិអាហ្វ្រិកទាំងអស់បានធ្វើកម្ចីទុនពីរដ្ឋាភិបាលក្រុងប៉េកាំងក្នុងចំនួនដ៏ច្រើនបំផុតកាលពីឆ្នាំកន្លងទៅ។ ប្រទេសដែលស្នើសុំកម្ចីពីចិនច្រើនជាងគេបំផុតនោះរួមមានដូចជា ប្រទេសអង់ហ្គោឡា, ប្រទេសអេត្យូពី, ប្រទេសអេហ្ស៊ីប, ប្រទេសនីហ្ស៊េរីយ៉ា និងប្រទេសកេនយ៉ា។ យ៉ាងណាក្តី វេទិកាកិច្ចសហប្រតិបត្តិការឆ្នាំនេះនឹងប្រារព្ធឡើងចំពេលដែលមហាអំណាចចិន និងអាមេរិក កំពុងព្យាយាមយ៉ាងខ្លាំងក្លាដូចគ្នាដើម្បីដាក់ឥទ្ធិពលទៅលើបណ្តាប្រទេសក្នុងទ្វីបរបស់ខ្លួន ហើយរដ្ឋាភិបាលក្រុងវ៉ាស៊ិនតោនតែងតែបានបង្ហាញភាពមិនសប្បាយចិត្តទៅនឹងការរីកចម្រើនដ៏ឆាប់រហ័សនៃទំនាក៉ទំនងចិន និងអាហ្វ្រិក៕
Account
Security
Favourite Content