ភ្នំពេញ៖ គម្រោងអភិវឌ្ឍន៍ជលផលក្រោយប្រមូលផល (CAPFISH-Capture) នៅថ្ងៃទី៥ ខែកុម្ភៈ ឆ្នាំ២០២៥ បានប្រគល់កញ្ចប់កម្មវិធីហិរញ្ញវត្ថុគាំទ្រការវិនិយោគ (ISF) ដើម្បីគាំទ្រ​ដល់ការវិនិយោគវិស័យជលផលនៅកម្ពុជា និងបានប្រកាសដាក់ឱ្យដំណើការជាផ្លូវការនូវប្រព័ន្ធអង្កេតតាមដានឌីជីផលកម្ពុជា (CamTrace) ដែល​អាច​ជួយ​ឱ្យ​សហ​គ្រាស​អាចនាំចេញផលិតផលជលផលរបស់ខ្លួនទៅកាន់ទីផ្សារក្រៅស្រុក និងជួយឲ្យអ្នកបរិភោគអាចផ្ទៀងផ្ទាត់ព័ត៌មានពាក់ព័ន្ធទៅនឹងប្រភពដើមផលិតផល។

សហគ្រាសជលផលក្រោយប្រមូលផលចំនួន ២៣ បានទទួលកញ្ចប់កម្មវិធីហិរញ្ញវត្ថុគាំទ្រការវិនិយោគនេះដែលនាំឱ្យ​សហគ្រាសទាំងអស់មាន​ឱកាស​ពង្រីក​លទ្ធភាព ​និង​សមត្ថភាព​នៅក្នុងជំនួញរបស់ខ្លួន។

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងអំណរគុណដល់សហភាពអឺរ៉ុប អង្គការ UNIDO និងដៃគូអភិវឌ្ឍពាក់ព័ន្ធជួយ​តភ្ជាប់ខ្សែ​ច្រវាក់តម្លៃកាន់តែមានប្រសិទ្ធភាពនូវផលិតផលជលផលក្រោយប្រមូលផល និងអាចឱ្យសហគ្រាសនានា​​ពង្រីកលទ្ធភាព និងសមត្ថភាពក្នុងជំនួញរបស់ខ្លួន។

ឯកឧត្តមរដ្ឋមន្ដ្រី បានលើកឡើងពីការកើនឡើងនៃផលនេសាទដ៏លើសលប់ក្នុងឆ្នាំនេះ ដែលជាផលវិជ្ជមានសម្រាប់ប្រជានេសាទ។ ឯកឧត្តមរដ្ឋមន្ដ្រី បានផ្ដល់អនុ​សាសន៍​ណែនាំ​គិតដល់ប្រជានេសាទនិងសហគ្រាស អំពីការប្រើប្រាស់ធនធាន​ជលផល​ប្រកបដោយនិរន្ដរភាព តាមរយៈការកែច្នៃសម្រាប់បម្រើដល់តម្រូវការទីផ្សារ ទាំងក្នុងស្រុក និងសម្រាប់នាំចេញទៅកាន់ទីផ្សារអន្តរជាតិ។

ពាក់ព័ន្ធនឹងពាណិជ្ជកម្មធនធានជលផលនេះដែរ​ ឯកឧត្តមរដ្ឋមន្ដ្រី​ បានគូសបញ្ជាក់ថា ​សហគ្រាស​ទាំងអស់ត្រូវចេះថែរក្សាទីផ្សារឱ្យបានល្អ​ គោរព​តាម​លក្ខខណ្ឌស្តង់ដា​ត្រឹមត្រូវ​ មានគុណភាពល្អ​ មានអនាម័យ​ខ្ពស់​ និងបង្កើនសមត្ថភាពខ្លួនទៅតាមតម្រូវការទីផ្សារ​ ជាពិសេសទីផ្សារអឺរ៉ុប​ ដែលជាទីផ្សារ​មួយដ៏ល្អ​សម្រាប់​ការ​នាំចេញ។

ឯកឧត្តមរដ្ឋមន្ដ្រី​ បានបង្ហាញគោលជំហរគាំទ្រដល់សហគ្រាសនានាក្នុងអនុវិស័យជលផល​ក្នុងស្មារតីភារតភាពខ្ពស់​ ដើម្បីអាចធានាធនធានជលផលប្រកបដោយនិរន្តរភាព​ និងប្រើប្រាស់ពេញសមត្ថភាពនូវធនធានជលផល​ ស្របជាមួយនឹងកម្មវិធីតាមដានអង្កេត​ (CamTrace) មានការត្រួតពិនិត្យច្បាស់លាស់​ មានភាពទុកចិត្ត​ ធានាបាននូវ​សុវត្ថិភាព​ចំណីអាហារ​ និងទទួលបានតម្លៃបន្ថែមខ្ពស់។

គួរជម្រាបថា៖ សហភាព​អឺរ៉ុប​ អង្គការ UNIDO សាជីវកម្មធានាឥណទានកម្ពុជា​ (CGCC) ធនាគារ​ និងវិស័យឯកជន​ បានជួយគាំទ្របច្ចេកទេស​ ទុនហរិញ្ញប្បទាន​ និង​ដោះស្រាយបញ្ហាប្រឈមនានា​ក្នុងវិស័យកសិកម្ម​។

លោកឧកញ៉ាបណ្ឌិតឱសថ ហៃ លីអ៊ាង ប្រធានអគ្គនាយកក្រុមហ៊ុនខនហ្វីរេល បានលើកឡើងថា ក្រុមហ៊ុនរបស់លោកក៏ទទួលបានកញ្ចប់វិនិយោគនេះដែរ ដែលជា​ការ​លើកទឹកចិត្ត និងជួយជំរុញក្នុងការបង្កើតផលិតផលជាតិ មានកម្មសិទ្ធិបញ្ញា និងស្តង់ដារទទួលស្គាល់ដោយបរទេស។

លោក ហ្គុនថឺរ ប៊ែរហ្គឺ នាយកគ្រប់គ្រងអគ្គនាយកដ្ឋានគោលដៅអភិវឌ្ឍន៍ប្រកបដោយចីរភាពនៃ អង្គការ UNIDO បានសង្កត់ធ្ងន់ថា តាមរយៈកិច្ច​សហការ​ជាមួយ​រាជរដ្ឋាភិបាលកម្ពុជា ដៃគូអភិវឌ្ឍន៍ និងស្ថាប័នហិរញ្ញវត្ថុដៃគូ អង្គការអាចផ្តល់ផលប្រយោជន៍យ៉ាងច្រើនដល់សហគ្រាសជលផល ជាពិសេសផ្តល់តម្លៃបន្ថែម និង​បង្កើន​បរិមាណ​ផ្គត់ផ្គង់ផលិតផលជលផលដែលមានសុវត្ថិភាព ដើម្បីធ្វើឲ្យកាន់តែមានភាពប្រកួតប្រជែងក្នុងទីផ្សារអន្តរជាតិ រួមទាំង សហភាពអឺរ៉ុប។

លោក ប្រាយអិន ហ្វរណារី ប្រធានកិច្ចសហប្រតិបត្តិការនៃ ស្ថានប្រតិភូសហភាពអឺរ៉ុបប្រចាំនៅកម្ពុជា បានមានប្រសាសន៍ថា នៅពេលដែលសហគ្រាស អាច​បំពេញ​បាន​តាមលក្ខខណ្ឌតម្រូវនៃ ស្តង់ដារសុវត្ថិភាពម្ហូបអាហារ រួមទាំងការអនុវត្តប្រព័ន្ធអង្កេតដាន សហគ្រាសទាំងនោះ នឹងមិនត្រឹមតែអាចរីកចម្រើនក្នុងស្រុកប៉ុណ្ណោះទេ ថែមទាំង​អាច​ពង្រីកទៅកាន់ទីផ្សារអន្តរជាតិផងដែរ៕