សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ព្រះសីហនុ ៖ របាយការណ៍ប្រចាំត្រីមាសទី៤ ឆ្នាំ២០២៥ របស់កំពង់ផែស្វយ័តក្រុងព្រះសីហនុបានឱ្យដឹងថា នៅក្នុងត្រីមាសទី៤ ឆ្នាំ២០២៥កន្លងទៅនេះ កំពង់ផែស្វយ័តក្រុងព្រះសីហនុរកចំណូលបានសរុបប្រហែល ៤៧,៤៧ លានដុល្លារ (១៨៩ ៩០០ ២៦៦ ពាន់រៀល) កើនឡើង ៤៩,៨៦% បើធៀបនឹងត្រីមាសទី៤ ឆ្នាំ២០២៤ ដែលមាន ៣១,៦៧ លានដុល្លារ (១២៦ ៧១៦ ៣៧២ ពាន់រៀល)។
របាយការណ៍ដដែលនេះ បានបង្ហាញថា ប្រភពចំណូលសំខាន់ៗរបស់កំពង់ផែស្វយ័តក្រុងព្រះសីហនុ ក្នុងត្រីមាសទី៤ ឆ្នាំ២០២៥ រួមមាន ចំណូលពីការលើកដាក់ពីនាវាទៅទីលាន, ចំណូលលើកដាក់លើទីលាន, ចំណូលពីសេវាកម្មនាវាចរ, ចំណូលស្តុក ឃ្លាំង និងទីលាន, ចំណូលដឹកជញ្ជូន, ចំណូលនាវាទេសចរណ៍, ចំណូលពីតំបន់សេដ្ឋកិច្ចពិសេស, ចំណូលជួលទីតាំង, និងចំណូលផ្សេងៗទៀត។
កំពង់ផែក៏បានចំណាយលើការបង់ពន្ធផ្សេងៗ ដែលធ្វើឱ្យកំពង់ផែមានប្រាក់ចំណេញសុទ្ធក្នុងការិយបរិច្ឆេទ នាត្រីមាសទី៤ ឆ្នាំ២០២៥ ចំនួន ១៩,៣៣ លានដុល្លារ (៧៧ ៣៣៧ ៦៨៦ ពាន់រៀល) កើនឡើង ២១,៨២% ពីចំនួន ១៥,៨៧ លានដុល្លារ (៦៣ ៤៨៣ ៨៤៣ ពាន់រៀល)។
នៅត្រីមាសទី៤ឆ្នាំ២០២៥ កំពង់ផែមានបរិមាណកុងតឺន័រឆ្លងកាត់ចំនួន ៣៨៨ ៤៣៦ TEUs កើនឡើង ១១៦ ៩៨៣ TEUs ស្មើនឹង ៤៣,១០% ធៀបត្រីមាសទី៤ ឆ្នាំ២០២៤។
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា ធ្លាប់បានមានប្រសាសន៍នាពេលកន្លងមកថ្មីៗថា៖ កម្ពុជាគ្រោងវិនិយោគនូវទំហំទឹកប្រាក់ជិត ១ ពាន់លានដុល្លារ សម្រាប់អភិវឌ្ឍចំណតកំពង់ផែខេត្តព្រះសីហនុដើម្បីប្រែក្លាយទឹកនៃខេត្តសមុទ្រមួយនេះទៅជាតំបន់សេដ្ឋកិច្ចពិសេសគំរូពហុបំណងនាពេលដ៏ខ្លីខាងមុខនេះ។
គម្រោងកំពង់ផែជំហានទី១នៅពេលដាក់ឱ្យដំណើរការនឹងអនុញ្ញាតឱ្យនាវាប្រមាណ ៩៣% ក្នុងតំបន់ចូលចតនៅកំពង់ផែស្វយ័តក្រុងព្រះសីហនុ ដែលបច្ចុប្បន្នមានត្រឹមតែ ១៨% ប៉ុណ្ណោះអាចចូលចតបាន។ ជំហានទី២ និងជំហានទី៣ នឹងផ្តល់លទ្ធភាពបន្ថែមសម្រាប់ការនាំទំនិញចេញ-ចូលដោយផ្ទាល់ពីកម្ពុជាទៅកាន់បណ្តាកំពង់ផែក្នុងតំបន់អឺរ៉ុប និងអាមេរិក ដោយពុំចាំបាច់ឆ្លងកាត់បណ្តាកំពង់ផែផ្សេងៗ នៅក្នុងតំបន់ទៀតឡើយ។
គម្រោងកំពង់ផែសាងសង់ទាំង៣ ជំហាន នឹងប្រើប្រាស់ថវិកាសរុបប្រមាណ ៩៧៣ លានដុល្លារអាមេរិក ក្នុងនោះ ឥណទានសម្បទានពីរដ្ឋាភិបាលនៃប្រទេសជប៉ុនចំនួនប្រមាណ ៧៦០ លានដុល្លារអាមេរិក ថវិកាបដិភាគរបស់រាជរដ្ឋាភិបាលកម្ពុជាសម្រាប់ពន្ធអាករផ្សេងៗចំនួនប្រមាណ ១៩២ លានដុល្លារអាមេរិក និងថវិកាផ្ទាល់របស់កំពង់ផែស្វយ័តក្រុងព្រះសីហនុចំនួនប្រមាណ ២១លានដុល្លារអាមេរិក។ ការសាងសង់ចំណតកំពង់ផែថ្មីដែលចំណាយថវិការហូតដល់ទៅជិត ១ពាន់លានដុល្លារអាមេរិកនេះ គឺដើម្បីពង្រីកសមត្ថភាពដឹកជញ្ជូនទំនិញតាមផ្លូវសមុទ្រឱ្យកាន់តែខ្លាំងក្លាថែមទៀត ឆ្លើយតមកំណើនសេដ្ឋកិច្ច និងពាណិជ្ជកម្មរបស់កម្ពុជា៕
Account
Security
Favourite Content