សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ យោងតាមទស្សនវិស័យ និងទិសដៅការងារឆ្នាំ២០២៤ របស់ធនាគារជាតិនៃកម្ពុជាបានព្យាករថា វិស័យសំណង់ និងអចលនទ្រព្យ ដែលបានទទួលរងឥទ្ធិពលពីវិបត្តិកន្លមក ត្រូវបានព្យាករថានឹងបន្តមានកំណើនទាប ដែលគាំទ្រដោយការបន្តអភិវឌ្ឍន៍ហេដ្ឋារចនាសម្ព័ន្ធសាធារណៈ គួបផ្សំនឹងការងើបឡើងវិញដោយសន្សឹមៗនៃតម្រូវការក្នុងស្រុក ដែលផ្ដោតលើលំនៅឋានតម្លៃសមរម្យ ។
នៅក្នុងរបាយការណ៍របស់ធនាគារជាតិក៏បានបង្ហាញផងដែរថា តម្រូវការសំណង់ប្រណីតដែលបម្រើដល់អនិវាសនជន ក៏ត្រូវបានរំពឹងថានឹងបន្តមានភាពទន់ខ្សោយ ។ ការងើបឡើងទន់ខ្សោយនៃវិស័យសំណង់ និងការថយចុះតម្រូវការក្នុងវិស័យអចលនទ្រព្យ ជាផ្នែកមួយនៃការប្រឈមនៃសេដ្ឋកិច្ចរបស់កម្ពុជាក្នុងឆ្នាំ២០២៤ នេះ ។
របាយការណ៍ធនាគារជាតិនៃកម្ពុជាក៏បានឱ្យដឹងថា កំណើនទាបជាងការរំពឹងទុកនៃសេដ្ឋកិច្ចប្រទេសជាដៃគូសេដ្ឋកិច្ចចម្បងៗរបស់ម្ពុជាដូចជាប្រទេសចិន ប្រទេសអាមេរិក និងអឺរ៉ុប ដែលអាចប៉ះពាល់ដល់ការវិនិយោគតម្រូវការសម្រាប់នាំចេញវិស័យទេសចរណ៍ សំណង់ និងអចលនទ្រព្យផងដែរ ស្របនឹងកម្ពុជានៅតែបន្តពឹងលើការវិនិយោគពីវិនិយោគិនក្រៅប្រទេស ។
តាមរយៈធនាគារជាតិនៃកម្ពុជា រាជរដ្ឋាភិបាលបាននលើកទឹកចិត្តឱ្យគ្រឹះស្ថានធនាគារ និងហិរញ្ញវត្ថុរៀបចំឥណទានឡើងវិញចំពោះវិស័យអចលនទ្រព្យ ជូនអតិថិជនដែលជួបប្រទះនឹងការលំបាកផ្នែកហិរញ្ញវត្ថុបណ្ដោះអាសន្ន ដោយត្រូវគោរពតាមបទប្បញ្ញត្តិដែលមានជាធរមាន ។
បើតាមអ្នកជំនាញអចលនទ្រព្យនៅក្នុងប្រទេសកម្ពុជាបានបញ្ចេញទស្សនស្រដៀងគ្នាផងដែរថា ការវិនិយោគនៅមានកំណើនទាប មិនទាន់ដូចនឹងមុនគ្រាដែលពិភពលោក និងកម្ពុជាជួបវិបត្តិកូវីដ១៩នោះទេ ប៉ុន្តែបើធៀបនឹងឆ្នាំ២០២១- ឆ្នាំ២០២២ និងឆ្នាំ២០២៣ នៅក្នុងឆ្នាំ២០២៤នេះគឺមានភាពប្រសើរ ។
អ្នកនាង គឹម គិនកេសា នាយិកាគ្រប់គ្រងក្រុមហ៊ុន CBRE Cambodia បានឱ្យដឹងថា ឆ្នាំ២០២៤នេះ គឺជាពេលវេលាដែលត្រូវស្វែងរកអ្នកទិញអចលនទ្រព្យដូចជា ខុនដូ អាផាតមិន ផ្សារទំនើបជាដើម ពីព្រោះថាវិស័យសំណង់ និងអចលនទ្រព្យកាលពីប៉ុន្មានឆ្នាំចុងក្រោយមុនពេលមានវិបត្តិគឺបានផ្គត់ផ្គត់លើសតម្រូវការ ដូច្នេះ ក្នុងឆ្នាំនេះ គឺទាមទារស្វែងរកអ្នកមានតម្រូវការជាជាងអ្នកផ្គត់ផ្គង់ ។
អ្នកនាងបានគាំទ្រទៅលើរបាយការណ៍របស់ធនាគារជាតិនៃកម្ពុជា ដែលបានចេញផ្សាយថា ឆ្នាំនេះ វិស័យអចលនទ្រព្យនិងសំណង់ នឹងមានកំណើនទាបដដែល ដោយមិនទាន់អាចកើនឡើងខ្ពស់បានទេ ។ អ្នកនាង កេសា បញ្ជាក់ថា វិស័យនេះត្រូវការរយៈពេល២ទៅ៣ឆ្នាំទៀតទើបអាចមានស្ថានភាពវិលទៅរកស្ថានភាពមុនកូវីដ១៩វិញ ៕
Account
Security
Favourite Content