សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ទោះបីជាវិស័យអចលនទ្រព្យនាពេលបច្ចុប្បន្ននៅមិនទាន់មានភាពល្អប្រសើរដូចមុនពេលវិបត្តិកូវីដ១៩ក្ដី ប៉ុន្តែផ្នែកខ្លះនៃវិស័យនេះឃើញថាមានតម្រូវការ និងការផ្គត់ផ្គង់ច្រើនស្របពេលមានតម្រូវការខ្ពស់បន្ថែមទៀតទាំងពេលបច្ចុប្បន្ន និងនៅពេលអនាគត។ នេះបើតាមការឱ្យដឹងពីអ្នកជំនាញផ្នែកអភិវឌ្ឍក្នុងវិស័យអចលនទ្រព្យកម្ពុជា។
អ្នកឧកញ៉ា សៀ ឬទ្ធី ដែលជាវិនិយោគិនអចលនទ្រព្យមួយរូបនៅកម្ពុជាបានមានប្រសាសន៍ឱ្យដឹងថា បច្ចុប្បន្ននេះ កត់សម្គាល់ឃើញថា វិស័យអចលនទ្រព្យនៅកម្ពុជានៅបន្តជួបបញ្ហា ដូចជាការវិនិយោគលើលំនៅឋានដែលរួមមានខុនដូ និងលំនៅឋានក្នុងបុរី ប៉ុន្តែសម្រាប់ផ្នែកផ្សេងទៀតក្រៅពីលំនៅឋានឃើញថាកំពុងមានតម្រូវការខ្ពស់ទៅវិញ ។
អ្នកឧកញ៉ាបានសង្កត់ធ្ងន់ថា ៖
«បច្ចុប្បន្ននេះ និងអនាគត ការវិនិយោគលើឃ្លាំង និងរោងចក្រគឺមិនខកបំណងទេ ព្រោះតម្រូវការអចលនទ្រព្យទាំងពីរនេះមានទិន្នាការកើនឡើងខ្ពស់ ទាំងឃ្លាំងសម្រាប់ស្តុកផលិតផលសម្រេចមុននាំចេញ ឃ្លាំងសម្រាប់ស្តុកទំនិញមុនផលិត និងឃ្លាំងកសិផលក្នុងវិស័យកសិកម្មផងដែរ ដូច្នេះហើយការវិនិយោគលើឃ្លាំង នឹងមានការកើនឡើងបន្តបន្ទាប់ទៀត»។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា (CDC) បានបង្ហាញឱ្យឃើញថា ក្នុងឆ្នាំ២០២៤ គម្រោងវិនិយោគក្នុងវិស័យឧស្សាហកម្មដែលបានចុះបញ្ជីវិនិយោគតាមរយៈក្រុមប្រឹក្សាអភិវឌ្ឍន៍កម្ពុជាមានរហូតដល់ ៦៩ភាគរយ និងមានទឹកប្រាក់វិនិយោគរហូតដល់ ៤,៧ពាន់លានដុល្លារអាមេរិក ។ តាមរយៈការវិនិយោគលើគម្រោងឧស្សាហកម្មនេះដែរ នឹងធ្វើឱ្យតម្រូវការឃ្លាំង និងរោងចក្រកាន់តែមានតម្រូវការបន្ថែមទៀត ដើម្បីបំពេញតម្រូវការ ការវិនិយោគទាំងនេះ ។
បើតាមក្រុមប្រឹក្សាអភិវឌ្ឍន៍កម្ពុជាបានបង្ហាញថា ក្នុងឆ្នាំ២០២៤ ក្រុមប្រឹក្សាអភិវឌ្ឍន៍កម្ពុជាទទួលបានគម្រោងវិនិយោគចំនួន៤១៤គម្រោង មានទុនវិនិយោគប្រមាណជិត៧ពាន់លានដុល្លារអាមេរិក ។ ក្នុងនោះដែរ ខេត្តចំនួន៥ ដែលទទួលបានគម្រោងវិនិយោគច្រើនជាងគេក្នុងឆ្នាំ ២០២៤ រួមមានខេត្តកំពង់ស្ពឺ ទទួលបានគម្រោងវិនិយោគចំនួន ៩៣គម្រោង ខេត្តស្វាយរៀង ទទួលបានគម្រោងវិនិយោគចំនួន ៧២ ភ្នំពេញ ទទួលបានគម្រោងវិនិយោគចំនួន ៥២គម្រោង ខេត្តព្រះសីហនុទទួលបានគម្រោងវិនិយោគចំនួន ៥១គម្រោង និងខេត្តតាកែវ ទទួលបានគម្រោងវិនិយោគចំនួន ៤៣គម្រោង ។
តាមរយៈរបាយការណ៍នេះដែរ អ្នកវិនិយោគអាចពិចារណាក្នុងការសាងសង់ឃ្លាំង និងរោងចក្រដើម្បីផ្គត់ផ្គង់ដើម្បីបំពេញតម្រូវការជាក់ស្ដែង របស់វិនិយោគិន។
អ្នកសាងសង់ឃ្លាំង និងរោងចក្រនៅតំបន់ជាយក្រុងភ្នំពេញមួយចំនួន ក៏បានលើកឡើងថា បច្ចុប្បន្ននេះ ទាំងវិនិយោគិនខ្មែរ និងវិនិយោគិនចិន កំពុងស្វែងរកទីតាំងសម្រាប់សាងសង់ឃ្លាំង និងរោងចក្រ ឬក៏ត្រូវការជួលឃ្លាំង និងរោងចក្រទាំងមូល ដើម្បីទុកជួលឱ្យវិនិយោគិនក្នុងវិស័យឧស្សាហកម្មកាត់ដេរ ដូចជាកាត់ដេរសម្លៀកបំពាក់ និងស្បែកជើងជាដើម ។
ឯកឧត្តម គង់ វិមាន អគ្គលេខាធិការ នៃអគ្គលេខាធិការដ្ឋាន ក្រុមប្រឹក្សាអភិវឌ្ឍន៍កម្ពុជា ក៏បានថ្លែងក្នុងកិច្ចប្រជុំមួយកាលពីពេលថ្មីៗនេះថា ចាប់ពីឆ្នាំ ២០២៤ រហូតមកដល់ពេលនេះ ជាការកត់សម្គាល់ វិនិយោគិនចិន បានចាប់ផ្ដើមចូលមកកម្ពុជា និងកំពុងស្វែងរកទីតាំងសម្រាប់ការវិនិយោគរបស់ខ្លួន ទាំងទីតាំងក្នុងតំបន់សេដ្ឋកិច្ច និងទីតាំងក្រៅតំបន់សេដ្ឋកិច្ចពិសេស ដូច្នេះ ក្នុងឆ្នាំ ២០២៥នេះ ការវិនិយោគនៅកម្ពុជារំពឹងមានកំណើនខ្ពស់ជាងឆ្នាំ ២០២៤ ៕
Account
Security
Favourite Content