សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ប្រមុខរាជរដ្ឋាភិបាលកម្ពុជា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានជំរុញឱ្យអនុវត្តន៍គម្រោងផ្លូវរថភ្លើងធុនស្រាល តភ្ជាប់ពីអាកាសយានដ្ឋានអន្តរជាតិសៀមរាបអង្គរ ទៅក្រុងសៀមរាប ឱ្យបានលឿនរហ័ស ខណៈដែលនៅព្រឹកថ្ងៃទី២៦ ខែធ្នូ ឆ្នាំ២០២៣នេះ គម្រោងនេះត្រូវបានក្រុមការងារថ្នាក់ជាតិ និងក្រុមហ៊ុនអភិវឌ្ឍន៍លើកយកមកពិភាក្សាដើម្បីជំរុញនីតិវិធីបន្ត។
កិច្ចប្រជុំដំបូងរបស់គណៈកម្មការអន្តរក្រសួង ដើម្បីជំរុញដំណើរការសិក្សាគម្រោងអភិវឌ្ឍផ្លូវរថភ្លើងធុនស្រាលភ្ជាប់ពីអាកាសយានដ្ឋានអន្តរជាតិសៀមរាប-អង្គរ ទៅក្រុងសៀមរាប ជាមួយក្រុមហ៊ុន China Metro Group ត្រូវបានធ្វើឡើងនៅក្រុមប្រឹក្សាអភិវឌ្ឍន៍កម្ពុជា ដឹកនាំដោយឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ក្រុមប្រឹក្សាអភិវឌ្ឍន៍កម្ពុជា ។
កិច្ចប្រជុំនេះត្រូវបានរៀបចំឡើងក្នុងគោលបំណងពិនិត្យជំរុញការងារអនុវត្តគម្រោងអភិវឌ្ឍផ្លូវរថភ្លើងធុនស្រាល តភ្ជាប់ពីអាកាសយានដ្ឋានអន្តរជាតិសៀមរាប-អង្គរ ឆ្ពោះទៅក្រុងសៀមរាប តាមអនុសាសន៍ណែនាំដ៏ខ្ពង់ខ្ពស់របស់សម្តេចមហាបវរធិបតី ដើម្បីជាការឆ្លើយតបទៅនឹងកំណើននៃភ្ញៀវទេសចរ និងសេវាកម្មដឹកជញ្ជូននានា និងជៀសវាងការកកស្ទះចរាចរណ៍ពីអាកាសយានដ្ឋានអន្តរជាតិសៀមរាប-អង្គរ ឆ្ពោះទៅក្រុងសៀមរាប។
ក្នុងនោះដែរក៏មានការជជែកពិភាក្សាយកចិត្តទុកដាក់លើការសិក្សាតម្រាយផ្លូវរថភ្លើងធុនស្រាល (Urban Light Rail Transit) សំដៅបញ្ចៀសកុំឱ្យមានការរំខានដោយប្រការណាមួយនៅតំបន់អង្គរ តំបន់ដែលជាបូរាណដ្ឋាន ឬ តំបន់ដែលស្ថិតក្នុងដែនអភិរក្សរបស់អាជ្ញាធរអប្សរា ។
សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងនាពេលកន្លងមកថា ក្រោយអាកាសយានដ្ឋានអន្តរជាតិសៀមរាបអង្គរដាក់ដំណើរការ ហើយអាជ្ញាធរពាក់ព័ន្ធទាំងអស់ ទាំងថ្នាក់ជាតិ និងថ្នាក់មូលដ្ឋាន ត្រូវទាក់ទាញ និងជំរុញឱ្យមានការវិនិយោគនៅតំបន់ជុំវិញព្រលានយន្តហោះថ្មីមួយនេះ និងត្រូវតភ្ជាប់តំបន់ជុំវិញអាកាសយានដ្ឋានអន្តរជាតិទៅនឹងក្រុងសៀមរាប ដើម្បីតភ្ជាប់ប្រជាជននៅតំបន់ជុំវិញព្រលានយន្តហោះទៅនឹងប្រជាជននៅកណ្ដាលទីក្រុង ។
សម្ដេចធិបតី បានលើកទឹកចិត្តឱ្យភាគីពាក់ព័ន្ធអភិវឌ្ឍន៍នៅជុំវិញព្រលានយន្តហោះថ្មីនេះ ដើម្បីបង្កើតឱកាសការងារជូនប្រជាពលរដ្ឋនៅនឹងកន្លែង បង្កើតប្រាក់ចំណូលជូនពលរដ្ឋដោយមិនចាំបាច់ធ្វើដំណើរទៅឆ្ងាយដើម្បីធ្វើការនោះទេ ។
បើតាមលោក កែវ សុធារ៉ា អ្នកជំនាញអចលនទ្រព្យនៅក្នុងខេត្តសៀមរាបបានមើលឃើញថា ក្រោយព្រលានយន្តហោះអន្តរជាតិសៀមរាបអង្គរដាក់ដំណើរការ ឃើញថាមានអ្នកវិនិយោគស្វះស្វែងរកដីធ្លីនៅជុំវិញតំបន់ដើម្បីត្រៀមអភិវឌ្ឍន៍គម្រោងរបស់ពួកគេនៅពេលអនាគត ហើយនៅក្រុងសៀមរាបក៏ឃើញថាមានអ្នកសួររកទិញដីធ្លីដើម្បីអភិវឌ្ឍគម្រោងរបសខ្លួននៅពេលអនាគតឆាប់ៗនេះដែរ៕
Account
Security
Favourite Content