សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ខេត្តចំនួន៣ នៅប៉ែកខាងលិចរាជធានីភ្នំពេញ រួមមានខេត្តកំពង់ស្ពឺ ខេត្តព្រះសីហនុ និងខេត្តកោះកុង ត្រូវបានប្រមុខរាជរដ្ឋាភិបាលសម្ដេចមហាបវរធិបតី ហ៊ុន ម៉ាណែត បង្ហើបពីការកំណត់យកធ្វើជាតំបន់អភិវឌ្ឍន៍ឧស្សាហកម្ម ដោយសារតែខេត្តទាំង៣នេះមានសក្ដានុពលខ្ពស់ក្នុងការទាក់ទាញការវិនិយោគលើវិស័យឧស្សាហកម្ម ។
ថ្លែងនៅក្នុងពិធីសំណេះសំណាលជាមួយកម្មករ កម្មការិនីប្រមាណជាង ១ម៉ឺន ៥ពាន់នាក់នៅខេត្តព្រះសីហនុ កាលពីពេលថ្មីៗនេះ សម្ដេចមហាបវរធិបតី ហ៊ុន ម៉ាណែត បានមានប្រសាសន៍ថា រដ្ឋាភិបាលបានកំណត់យកខេត្តព្រះសីហនុ ជាប៉ូលសេដ្ឋកិច្ចទី២ របស់ប្រទេសកម្ពុជា ហើយដើម្បីឱ្យប៉ូលសេដ្ឋកិច្ចនេះកាន់តែមានសក្ដានុពល ត្រូវធ្វើឱ្យខេត្តជាប់នឹងខេត្តព្រះសីហនុមានភាពទាក់ទាញដូចគ្នាដែរ ដោយក្នុងនោះខេត្តកំពង់ស្ពឺ និងខេត្តកោះកុង បាន និងកំពុងទទួលបានការវិនិយោគលើរោងចក្រឧស្សាហកម្មជាបន្តបន្ទាប់ផងដែរ ។
សម្ដេចបន្ថែមថា ដើម្បីឱ្យប្រជាជនកាន់តែមានភាពជីវភាពធូធា និងល្អប្រសើរនោះ មិនមែនតែវិស័យរោងចក្រឧស្សាហកម្មមួយប៉ុណ្ណោះនោះទេ គឺត្រូវការវិនិយោគលើវិស័យផ្សេងទៀត ដោយក្នុងនោះដែរខេត្តព្រះសីហនុ បាន និងកំពុងមានការវិនិយោគច្រើនទៅលើវិស័យទេសចរណ៍ និងវិស័យសំណង់អគារខ្ពស់ៗ បន្ថែមពីលើការវិនិយោគរោងចក្រឧស្សាហកម្ម ។ ចំណែកខេត្តកោះកុងវិញ ក៏គួរបន្ថែមភាពទាក់ទាញលើវិស័យទេសចរណ៍ ពីព្រោះថាខេត្តនេះក៏មានសក្ដានុពលក្នុងវិស័យទេសចរណ៍ដែរ ។
សម្ដេចធិបតីបានបញ្ជាក់ផងដែរថា ដើម្បីឱ្យប្រជាជនមានជីវភាពកាន់តែប្រសើរ មានភាពទាក់ទាញលើការវិនិយោគ ចាំបាច់ណាស់គឺត្រូវតែមានសន្តិភាព ដូច្នេះរាជរដ្ឋាភិបាលត្រូវការពារសន្តិភាពឱ្យខាងតែបាន ទោះលះបង់ក្នុងតម្លៃណាក៏ដោយ ។ ក្រៅពីខេត្តទាំងបីនេះ ខេត្តនៅតំបន់សមុទ្រពីរផ្សេងទៀត រួមមានខេត្តកែប និងខេត្តកំពត ក៏ត្រូវបានរាជរដ្ឋាភិបាលកំណត់ជាខេត្តអាទិភាពក្នុងការទាក់ទាញលើការវិនិយោគផងដែរ ប៉ុន្តែដោយសារតែខេត្តទាំងពីរជាខេត្តដែលមានសក្ដានុពលលើវិស័យទេសចរណ៍ ដូច្នេះ កែប និងកំពត នឹងត្រូវរៀបចំទាក់ទាញលើការវិនិយោគបម្រើឱ្យវិស័យទេសចរណ៍វិញ ។
រាជរដ្ឋាភិបាលបានចំណាយច្រើនទៅលើការវិនិយោគហេដ្ឋារចនាសម្ព័ន្ធ តភ្ជាប់ពីរាជធានីភ្នំពេញ ទៅកាន់តំបន់សមុទ្រ ដែលមានខេត្តទាំងបួនរួមមានកោះកុង ព្រះសីហនុ កំពត និងខេត្តកែប ។ ជាក់ស្ដែងការធ្វើដំណើរពីរាជធានីភ្នំពេញទៅកាន់ខេត្តទាំងនេះ គឺមានភាពងាយស្រួលជាងមុន ដោយមានផ្លូវស្រួលចំណាយពេលខ្លី និងចំណេញថវិកា ។
បើតាមអ្នកជំនាញនៃវិស័យអចលនទ្រព្យជាច្រើនបានមើលឃើញពីសក្ដានុពលនៃការវិនិយោគនៅតំបន់ប៉ែកខាងលិច រួមមានខេត្តកំពង់ស្ពឺ កោះកុង និងខេត្តព្រះសីហនុ ពីព្រោះតំបន់នេះជាតំបន់ដែលនៅជិតកំពង់ផែទឹកជ្រៅរបស់កម្ពុជា ដែលងាយស្រួលក្នុងការដឹកទំនិញពីប្រទេសក្រៅមកផលិតកែច្នៃ រួចហើយដឹកទំនិញសម្រេចចេញទៅក្រៅប្រទេសវិញ ៕
Account
Security
Favourite Content