សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ការវិនិយោគលើគម្រោងថ្មីៗនៅក្នុងប្រទេសកម្ពុជាក្នុងឆ្នាំ២០២២នេះនៅតែបន្តមានសកម្មភាពកើនឡើងជាបន្តបន្ទាប់ ជាក់ស្ដែងនៅក្នុងត្រីមាសទី៣នៃឆ្នាំ២០២២នេះ រាជរដ្ឋាភិបាលតាមរយៈក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគថ្មីចំនួន៤៦គម្រោងមានទឹកប្រាក់សរុបជាង ៤៤០លានដុល្លារអាមេរិក។
យោងតាមសេចក្ដីប្រកាសព័ត៌មានជាបន្តបន្ទាប់របស់ក្រុមប្រឹក្សាអភិវឌ្ឍន៍កម្ពុជាបង្ហាញថា ក្នុងរយៈពេល១ត្រីមាស ពោលគឺត្រីមាសទី៣នៃឆ្នាំនេះ គម្រោងវិនិយោគភាគច្រើនត្រូវបានមើលឃើញថា ជាគម្រោងរោងចក្រឧស្សាហកម្ម ដែលមានទីតាំងនៅតាមបណ្ដាខេត្តនានារួមទាំងភ្នំពេញផងដែរ ដែលខុសពីមុនការវិនិយោគទាំងនេះផ្ដោតទៅលើរាជធានីភ្នំពេញភាគច្រើន ។
នៅក្នុងចំណោមគម្រោងទាំង៤៦គម្រោងនោះមានគម្រោងមួយដែលមានទឹកប្រាក់ច្រើនជាងគេប្រចាំត្រីមាសទី៣ ដែលមានទុនវិនិយោគរហូតដល់ទៅ ៨៤,៥លានដុល្លារអាមេរិក ជាប្រភេទគម្រោងបង្កើតរោងចក្រផលិតបន្ទះសូឡា មានទីតាំងនៅតំបន់សេដ្ឋកិច្ចពិសេស យូ ប៊ី អ៊ី ស្រុកស្នួល ខេត្តក្រចេះ វិនិយោគដោយក្រុមហ៊ុន L-Q New Energy CO., LTD ។ គម្រោងនេះក៏បានបង្កើតការងារចំនួនប្រមាណ ១ ០០០នាក់ផងដែរ។
លោក វ៉ា វីរៈ អ្នកជំនាញអចលនទ្រព្យអន្តរជាតិបានលើកឡើងថា សកម្មភាពវិនិយោគចាប់ផ្ដើមឡើងវិញនៅពេលរដ្ឋាភិបាលបើកប្រទេសកាលពីអំឡុងចុងឆ្នាំ២០២១ ក្រោយស្ថានភាពកូវីដ១៩នៅក្នុងប្រទេសកម្ពុជាបានធូរស្រាលឡើងវិញ ។ តាមរយៈសកម្មភាពវិនិយោគនេះដែរ គេរំពឹងថានឹងកើតមានឱកាសការងារដល់ប្រជាពលរដ្ឋកម្ពុជាដែលបានបាត់បង់ក្នុងអំឡុងកូវីដសាជាថ្មី ។
លោកបន្តថា ការវិនិយោគនៅពេលបច្ចុប្បន្ននេះ និងបន្តទៅពេលអនាគតនឹងត្រូវងាកទៅទិសខាងលិចនៃរាជធានីភ្នំពេញ ឬក៏ខាងលិចទន្លេមេគង្គ ពីព្រោះតំបន់នេះ ជាតំបន់ដែលមានសក្ដានុពលក្នុងការទាក់ទាញ និងជាទីតាំងអំណោយផលខ្ពស់ក្នុងការដឹកជញ្ជូនទំនិញទៅកាន់កំពង់ផែទឹកជ្រៅ ក៏ដូចជាទៅកាន់ព្រំដែនកម្ពុជាថៃ ជាដើម។
លោក ឌិត ចណ្ណា អគ្គនាយកក្រុមហ៊ុន Lucky Realty ក៏បានឱ្យដឹងថា ការវិនិយោគលើវិស័យឧស្សាហកម្មនៅក្នុងប្រទេសកម្ពុជាបានជំរុញឱ្យមានតម្រូវការដីធ្លីសម្រាប់សាងសង់ឃ្លាំង និងរោងចក្រកាន់តែច្រើន ដូច្នេះហើយទើបគេមើលឃើញពីសកម្មភាពនៃការទិញលក់ដីធ្លីសម្រាប់បម្រើសេចក្ដីត្រូវការនៃការវិនិយោគទាំងនេះ ។
យោងតាមការចេញផ្សាយរបស់ក្រុមប្រឹក្សាអភិវឌ្ឍន៍កម្ពុជាបានបង្ហាញថា គម្រោងទាំង៤៦គម្រោងនោះភាគច្រើនមានទីតាំងនៅតំបន់ជុំវិញរាជធានីភ្នំពេញ ខេត្តកណ្ដាល កំពង់ស្ពឺង និងខេត្តព្រះសីហនុ ហើយអ្នកជំនាញនៃវិស័យអចលនទ្រព្យក៏រំពឹងថានៅពេលខាងមុខនេះថា ខេត្តព្រះសីហនុនឹងទទួលបានការវិនិយោគលើវិស័យឧស្សាហកម្មកាន់តែច្រើនបន្ថែមទៀត ស្របទៅនឹងផែនការរបស់រាជរដ្ឋាភិបាលកំណត់យកខេត្តមួយនេះជាប៉ូលសេដ្ឋកិច្ចដ៏សំខាន់មួយក្នុងការអភិវឌ្ឍន៍ឧស្សាហកម្មនៅកម្ពុជា ៕
Account
Security
Favourite Content