សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រុមហ៊ុនប្រព័ន្ធផ្សព្វផ្សាយដ៏ធំមួយរបស់ប្រទេសជប៉ុនបានប្ដេជ្ញាថា នឹងបន្តកៀរគរវិនិយោគិនជប៉ុន និងអ្នកវិនិយោគនៃប្រទេសផ្សេងទៀតចូលមកបណ្ដាក់ទុននៅកម្ពុជា ដោយក្រុមហ៊ុននេះនឹងផ្សព្វផ្សាយពីសក្ដានុពល និងកាលានុវត្តភាពនៃការវិនិយោគនៅក្នុងប្រទេសកម្ពុជា ខណៈពេលដែលកម្ពុជាក៏បានត្រៀមបង្កើតតំបន់សេដ្ឋកិច្ចពិសេសសម្រាប់វិនិយោគិនជប៉ុន ។
នៅក្នុងជំនួបជាមួយ លោក Tsuyosi Hasabe ប្រធានក្រុមហ៊ុន Nikkei Inc ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ក្រុមប្រឹក្សាអភិវឌ្ឍន៍កម្ពុជាបានឱ្យជម្រាបជូនអំពីគោលនយោបាយថ្មី ដែលដឹកនាំដោយសម្តេចធិបតី ហ៊ុន ម៉ាណែត ក្នុងការអភិវឌ្ឍប្រទេសឱ្យកាន់តែរីកចម្រើន ដើម្បីសម្រេចបានគោលដៅប្រែក្លាយកម្ពុជាទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០ ក៏ដូចជាកត្តាអំណោយផលផ្សេងៗក្នុងការបណ្តាក់ទុនវិនិយោគនៅប្រទេសកម្ពុជា ។
ឯកឧត្តមឧបនាយករដ្ឋមន្ត្រី ក៏បានគូសបញ្ជាក់ពីការអភិវឌ្ឍហេដ្ឋារចនាសម្ព័ន្ធថ្មីៗដែលរាជរដ្ឋាភិបាលសម្រេចបាន និងផែនការថ្មីៗទៀតជាច្រើន រួមមាន គម្រោងសាងសង់ចំណតផែកុងតឺន័រទឹកជ្រៅថ្មីជំហានទី១ ប្រវែង៣៥០ម៉ែត្រ គម្រោងផ្លូវល្បឿនលឿនភ្នំពេញ-ក្រុងព្រះសីហនុ ការលើកកម្រិតផ្លូវជាតិលេខ៥ ពី២គន្លង ទៅ៤គន្លង គម្រោងសាងសង់ផ្លូវល្បឿនលឿនភ្នំពេញ-បាវិត គម្រោងផែនការកសាងផ្លូវល្បឿនលឿនភ្នំពេញ-សៀមរាប-ប៉ោយប៉ែត និងគម្រោងព្រែកជីកហ្វូណនតេជោផងដែរ។ បន្ថែមពីនេះ ឯកឧត្តមឧបនាយករដ្ឋមន្ត្រី ក៏បានជម្រាបលោកប្រធានក្រុមហ៊ុនអំពីតួនាទីរបស់ក្រុមប្រឹក្សាអភិវឌ្ឍន៍កម្ពុជា ក្នុងការផ្តល់កិច្ចសម្របសម្រួលជូនដល់វិនិយោគិនដែលមកបណ្តាក់ទុនវិនិយោគនៅកម្ពុជា និងស្នើសុំឱ្យក្រុមហ៊ុនជប៉ុនមកបណ្តាក់ទុនរួមមាន វិស័យអេឡិចត្រូនិក វិស័យយានយន្ត និងបច្ចេកវិទ្យាជាដើម ដើម្បីជំរុញការប្រែក្លាយប្រទេសកម្ពុជាពីការប្រើប្រាស់កម្លាំងពលកម្ម ទៅការប្រើប្រាស់ជំនាញបច្ចេកទេសសម្រាប់វិស័យឧស្សាហកម្ម ។
លោក Tsuyosi Hasabe ប្រធានក្រុមហ៊ុន បានបង្ហាញនូវចំណាប់អារម្មណ៍លើការអភិវឌ្ឍន៍យ៉ាងឆាប់រហ័សរបស់ព្រះរាជាណាចក្រកម្ពុជា និងបានប្តេជ្ញាចិត្តជួយផ្សព្វផ្សាយ និងណែនាំក្រុមហ៊ុនជប៉ុនឱ្យបណ្តាក់ទុនវិនិយោគនៅប្រទេសកម្ពុជាផងដែរ ។
លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា បានបង្ហាញពីភាពសុទិដ្ឋិនិយមចំពោះវិនិយោគិនជប៉ុន ដោយលោកបានលើកឡើងថា វិនិយោគិនជប៉ុនគឺជាវិនិយោគិនដែលមានផែនការច្បាស់លាស់មុននឹងបណ្ដាក់ទុនវិនិយោគ ហើយជប៉ុនជាប្រទេសដែលមានអាជីវកម្មប្រភេទសហគ្រាសខ្នាតតូច និងមធ្យមយ៉ាងច្រើន ដែលអាចចូលរួមនៅក្នុងកិច្ចជួយជំរុញ និងគាំទ្រដល់សេដ្ឋកិច្ចកម្ពុជា ជាពិសេសផ្តល់់នូវឱកាសការងារដល់ពលរដ្ឋកម្ពុជា ។
គួរបញ្ជាក់ថា ដើម្បីទាក់ទាញវិនិយោគិនជប៉ុនចូលមកបណ្ដាក់ទុនវិនិយោគ កម្ពុជាបានជំរុញ និងលើកទឹកចិត្តឱ្យមានការបង្កើតឡើងនូវតំបន់សេដ្ឋកិច្ចពិសេសសម្រាប់វិនិយោគិនជប៉ុន ដោយក្រុមហ៊ុនជប៉ុនមួយបានបង្ហាញពីបំណងបង្កើតតំបន់សេដ្ឋកិច្ចពិសេសជប៉ុននេះនៅក្នុងខេត្តពោធិ៍សាត់ ជាមួយទំហំទឹកប្រាក់ប្រមាណ ៦៥០លានដុល្លារអាមេរិក ៕
Account
Security
Favourite Content