សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ យោងតាមប្រសាសន៍សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាថ្លែងក្នុងពិធីបើកការដ្ឋានសាងសង់ស្ពានឆ្លងទន្លេមេគង្គខេត្តក្រចេះ នៅព្រឹកថ្ងៃទី២ ខែមករា ឆ្នាំ២០២៣ បានឱ្យដឹងថា ខេត្តក្រចេះ ឆ្នាំ២០២៣នេះអាចចាត់ទុកជាខេត្តដែលត្រូវប៉ាន់នៃការទទួលបានគម្រោងអភិវឌ្ឍន៍ថ្មីៗ ដូចជា ផ្លូវថ្មី ស្ពានថ្មីឆ្លងកាត់ទន្លេមេគង្គជាដើម។
សម្ដេចអគ្គមហាសេនាបតីតេជោ ហ៊ុន សែន បានមានប្រសាសន៍ថា ក្នុងចំណោមគម្រោងថ្មីៗដែលអភិវឌ្ឍន៍នៅក្នុងខេត្តក្រចេះរួមមាន ផ្លូវលេខ៧៣ ដែលតភ្ជាប់ពីផ្លូវជាតិលេខ៧ខេត្តត្បូងឃ្មុំដល់ព្រំដែនខេត្តក្រចេះ មានចំណាយ៥០គីឡូម៉ែត្រ ។ គម្រោងផ្លូវនេះបានបញ្ចប់នីតិវិធីលទ្ធកម្ម និងគ្រោងចុះហត្ថលេខានៅចុងខែមករា ឆ្នាំ២០២៣ ដោយប្រើប្រាស់ថវិកាប្រមាណ១៥លានដុល្លារអាមេរិក ។ ផ្លូវទី២ គឺផ្លូវលេខ៣៧៧ ពីក្រុងក្រចេះទៅសំបួរ មានប្រវែង ៣៥,៥គីឡូម៉ែត្រ ដែលផ្លូវនេះមានសារសំខាន់ក្នុងការនាំភ្ញៀវទេសចរទៅទស្សនារមណីយដ្ឋានអន្លង់ផ្សោត ។ ផ្លូវនេះនឹងត្រូវបើកការដ្ឋាននៅមុនចូលឆ្នាំខ្មែរខាងមុនេះដែរ ។
សម្ដេចតេជោបានបន្ថែមថា គម្រោងផ្លូវទី៣ គឺផ្លូវលេខ២៧៧ ពីសណ្ដាន់ទៅសង្គម ប្រវែង ១៣,៦គីឡូម៉ែត្រ បានបញ្ចប់នីតិវិធី និងគ្រោងចុះហត្ថលេខានៅចុងខែមករា ឆ្នាំ២០២៣ ដោយប្រើប្រាស់ថវិកាប្រមាណ ២៥,៧លានដុល្លារអាមេរិក ។ បន្ទាប់មកទៀតគឺផ្លូវជាតិលេខ៧ ចាប់ពីគីឡូម៉ែត្រលេខ ៣០០ដល់គីឡូម៉ែត្រលេខ៣១ រង្វង់ក្រចេះ ប្រវែង ៣១,២៥គីឡូម៉ែត្រ គ្រោងចុះហត្ថលេខានៅខែមីនា ខាងមុខនេះ ដោយប្រើប្រាស់ថវិកាប្រមាណ ១៥លានដុល្លារអាមេរិក ។
សម្ដេចបន្ថែមថា ពេលនេះសម្ដេចកំពុងតែខិតខំដើម្បីស្នើសុំឱ្យមិត្តចិនជួយទៅដល់ការកសាងនូវផ្លូវតភ្ជាប់ទៅកាន់ព្រំដែនកម្ពុជា-ឡាវ និងបានស្នើឱ្យឯកឧត្តម វ៉ាង វិនធាន ឯកអគ្គរដ្ឋទូតចិនយកសំណូមពរសម្ដេចជូនថ្នាក់ដឹកនាំប្រទេសចិន ពីព្រោះកន្លងទៅផ្លូវទាំងនោះបានធ្វើដោយមិត្តចិន និងបានសាងសង់មួយកំណាត់ដោយសង់មួយកំណាត់ទៀត ដែលត្រូវតភ្ជាប់ជាមួយឡាវ ។ ទាំងនេះគឺជាការគិតគូរកសាងប្រទេស ដោយផ្ដើមចេញពីសន្តិភាព ។
សម្ដេចបញ្ជាក់ថា ផ្លូវ និងស្ពាន ដែលរដ្ឋាភិបាលកសាងនៅខេត្តក្រចេះនេះ នឹងផ្ដល់អត្ថប្រយោជន៍ធំធេងដល់ប្រជាជនក្នុងខេត្តក្រចេះផ្ទាល់ ពីព្រោះថានៅពេលមានផ្លូវស្អាតស្រួលធ្វើដំណើរ ច្បាស់ណាស់ប្រជាពលរដ្ឋ ភ្ញៀវទេសចរ នឹងធ្វើដំណើរមកកាន់រមណីយដ្ឋាននានាក្នុងខេត្តក្រចេះ ហើយក្រចេះក៏មាននូវក្រឡានដែលឆ្ងាញ់មានក្រូចថ្លុងកោះទ្រង់សុទ្ធសឹងតែអាចផ្ដល់ចំណូលដល់ពលរដ្ឋ ។
ស្ពាន និងផ្លូវដែលសាងសង់នៅខេត្តក្រចេះនេះដែរ ក៏ជាផ្លូវសំខាន់សម្រាប់ពលរដ្ឋនៅខេត្តសៀមរាប ខេត្តព្រះវិហារ ខេត្តកំពង់ធំ ក្នុងការធ្វើដំណើរទៅកាន់ខេត្តក្រចេះ ខេត្តមណ្ឌលគីរី ជាដើម ហើយពលរដ្ឋខេត្តក្រចេះ និងមណ្ឌលគីរី ក៏អាចធ្វើដំណើរទៅលេងអង្គរវត្តដោយស្រួល និងចំណាយពេលវេលាលឿនទៀតផង ។
ស្របតាមការអភិវឌ្ឍរបស់រាជរដ្ឋាភិបាលនេះដែរ មួយរយៈពេលចុងក្រោយនេះ ខេត្តក្រចេះក៏ទទួលបាននូវគម្រោងអភិវឌ្ឍន៍ឯកជនមួយចំនួនផងដែរ ដូចជារោងចក្រឧស្សាហកម្ម មួយចំនួនបានដាក់ទីតាំងវិនិយោគរបស់ខ្លួននៅក្នុងខេត្តក្រចេះដែរ ដែលទាំងនេះនឹងផ្ដល់អត្ថប្រយោជន៍ ការងារប្រាក់ចំណូលដល់ប្រជាពលរដ្ឋក្នុងខេត្តក្រចេះដោយមិនចាំបាច់ធ្វើដំណើរចំណាកស្រុកទៅស្រុកផ្សេង ឬទៅប្រទេសផ្សេង ដើម្បីរកការងារទៀតនោះឡើយ ៕
Account
Security
Favourite Content