បរទេស៖ យោងតាមប្រភពព័ត៌មានពី CNA បានដកស្រង់ពីការព្យាករណ៍របស់មូលនិធិរូបិយវត្ថុអន្តរជាតិ IMF ថា ការចុះខ្សោយនៃប្រាក់យ៉េនមានអត្ថប្រយោជន៍សម្រាប់សេដ្ឋកិច្ចរបស់ប្រទេសជប៉ុន ដោយសារវាជំរុញកំណើនការនាំចេញលើសពីតម្លៃនៃការនាំចូល។

កាលពីពេលថ្មីៗនេះ ប្រាក់យ៉េនបានបន្តធ្លាក់ចុះធៀបនឹងប្រាក់ដុល្លារ ហើយភាពខុសគ្នានៃអត្រាការប្រាក់របស់អាមេរិក និងជប៉ុននឹងនៅតែធំ ដែលបង្កជាសម្ពាធសម្រាប់អាជ្ញាធរព្រួយបារម្ភពីផលប៉ះពាល់ដល់គ្រួសារ ដោយសារការចុះខ្សោយនៃប្រាក់យ៉េនធ្វើឲ្យតម្លៃនាំចូលថ្លៃ។ យ៉ាងណាមិញ Nada Choueiri ប្រធានបេសកកម្មជប៉ុនរបស់មូលនិធិរូបិយវត្ថុអន្តរជាតិ (IMF) លើកឡើងថា ការចុះខ្សោយនៃប្រាក់យ៉េនអាចជំរុញការនាំចេញដើម្បីឲ្យមានតុល្យភាពនឹងការនាំចូលដែលមានតម្លៃថ្លៃសម្រាប់ប្រទេសជប៉ុន។ លើសពីនេះ Choueiri ក៏បានជំរុញឱ្យប្រទេសជប៉ុនដំឡើងអត្រាការប្រាក់ក្នុងល្បឿនបន្តិចម្តងៗ និងបង្កើតថវិកាបន្ថែមដើម្បីឆ្លើយតបទៅនឹងវិបត្តិសេដ្ឋកិច្ច។ ជាមួយគ្នានេះដែរ ធនាគារកណ្តាលជប៉ុននៅបន្តរក្សាការប្រុងប្រយ័ត្នដូចដែលពួកគេបានធ្វើកន្លងមក ជាមួយនឹងការដំឡើងអត្រាការប្រាក់ក្នុងល្បឿនយឺតៗ ដោយសារទស្សនវិស្ស័យលើអតិផរណានៅតែមានភាពមិនច្បាស់លាស់។

កាលពីថ្ងៃពុធសប្ដាហ៍កន្លងទៅនេះ ការធ្លាក់ថ្លៃរបស់ប្រាក់យ៉េនបានបង្កឱ្យមានការព្រមានពីរដ្ឋមន្ត្រីក្រសួងហិរញ្ញវត្ថុជប៉ុន លោក Katsunobu Kato ថា ការផ្លាស់ប្តូរយ៉ាងរហ័សត្រូវតែមានភាពប្រុងប្រយ័ត្នខ្ពស់លើការធ្លាក់ចុះនៃប្រាក់យ៉េន ដោយសារវាមានសារៈសំខាន់ណាស់ដែលអាជ្ញាធរជប៉ុនអាចសម្របខ្លួនទៅនឹងអត្រាប្តូរប្រាក់ដែលមានភាពបត់បែន។ គួររំលឹកដែរថា កាលពីខែកក្កដា ធនាគារកណ្តាលជប៉ុនបានដំឡើងអត្រាការប្រាក់រយៈពេលខ្លីក្នុងអត្រា ០,២៥ ភាគរយដើម្បីឆ្ពោះទៅរកគោលដៅអតិផរណា ២ ភាគរយ។

ទន្ទឹមនឹងនេះ IMF បានព្យាករណ៍ដែរថា អតិផរណារបស់ប្រទេសជប៉ុននឹងធ្លាក់ពីអត្រាបច្ចុប្បន្ន ២,៥ ភាគរយមកត្រឹមគោលដៅ ២ ភាគរយប្រកបដោយនិរន្តរភាពជាមួយនឹងកំណើនតម្លៃដែលជំរុញដោយតម្រូវការក្នុងស្រុក ។ មិនត្រឹមតែប៉ុណ្ណោះ ធនាគារកណ្តាលជប៉ុនត្រូវតែប្រុងប្រយ័ត្នក្នុងការបង្កើនអត្រាការប្រាក់ ដោយសារវាអាចផ្តល់ហានិភ័យផ្សេងៗដូចជា ការនាំចេញដែលមានរនាំងពាណិជ្ជកម្ម លទ្ធភាពនៃការធ្លាក់ចុះប្រាក់ឈ្នួល និងការធ្លាក់ចុះនៃប្រាក់យ៉េន។ គេរំពឹងទុកថា ធនាគារកណ្តាលជប៉ុនអាចនឹងរក្សារអត្រាការប្រាក់នៅថេរត្រឹម ០,២៥ ភាគរយនៅក្នុងកិច្ចប្រជុំគោលនយោបាយនៅសប្តាហ៍ក្រោយ ប៉ុន្តែអាចនឹងដំឡើងអត្រាការប្រាក់ម្តងទៀតនៅខែមីនាឆ្នាំ ២០២៥។

នៅក្នុងទស្សនវិស័យសេដ្ឋកិច្ចពិភពលោករបស់ IMF ដែលបានចេញផ្សាយក្នុងខែនេះបានព្យាករណ៍ថា កំណើនសេដ្ឋកិច្ចរបស់ជប៉ុននឹងកើនឡើងដល់ ១,១ ភាគរយនៅឆ្នាំ២០២៥ ដែលកើនឡើងពី ០,៣ ភាគរយនៅឆ្នាំនេះ ដោយសារការកើនឡើងប្រាក់ឈ្នួលបានជំរុញការប្រើប្រាស់។ ទន្ទឹមនឹងនេះ ជប៉ុនកំពុងពង្រឹងការប្រើប្រាស់ ដើម្បីអាចមានឱកាសក្នុងការសម្រេចបាននូវការដំឡើងប្រាក់ឈ្នួលដ៏រឹងមាំនៅឆ្នាំក្រោយ។ ជប៉ុនមានបំណងទប់ស្កាត់ការប៉ះទង្គិចដល់គ្រួសារពីការកើនឡើងថ្លៃរស់នៅ ដោយសារការធ្លាក់ចុះនៃប្រាក់យ៉េនបានជំរុញឱ្យមានការឡើងថ្លៃនៃតម្លៃប្រេងឥន្ធនៈ និងអាហារ។​

លោក Shigeru Ishiba នាយករដ្ឋមន្ត្រីថ្មីរបស់ជប៉ុនបានសន្យាថា នឹងបង្កើតថវិកាបន្ថែមដើម្បីផ្តល់ហិរញ្ញប្បទានដល់ផែនការចំណាយដ៏សំខាន់មួយទៀត ដោយវិធានការនេះនឹងបន្ថែមពីលើការចំណាយមួយចំនួនដែលបានអនុវត្តចាប់តាំងពីការរាតត្បាតរួមមាន ការឧបត្ថម្ភធនទូទៅដល់ការបញ្ចុះថ្លៃប្រើប្រាស់ និងប្រេងសាំង។ យ៉ាងណាមិញ ជំហាននេះនឹងរឹតតែបង្កើនបំណុលសាធារណៈដល់ប្រទេសជប៉ុន៕