កំពត ៖ កំណាត់ផ្លូវថ្មីប្រវែងជាង ៦០ គីឡូម៉ែត្រ តភ្ជាប់ពីផ្លូវជាតិលេខ ៤ មកឧទ្យានជាតិបូកគោបានសម្រេចការឈូសបើកផ្លូវបញ្ចប់ ១០០% និងកំពុងឈានទៅចាក់បេតុង ដោយគ្រោងចំណាយថវិកា​សាងសង់​ប្រហែល ៣ លានដុល្លារក្នុងប្រវែងផ្លូវមួយគីឡូម៉ែត្រ។ ផ្លូវនេះចាក់បេតុងបានជាង ២គីឡូម៉ែត្រ ហើយនឹងកំពុងបន្តស្ថាបនា។

ការអភិវឌ្ឍផ្លូវថ្មីនេះមានការចូលរួមពីអ្នកឧកញ៉ា ម៉ុង រិទ្ធី ជាអ្នកផ្ដល់ដីសម្បទានដូងប្រេង រីឯអ្នកឧកញ៉ាបណ្ឌិត សុខ គង់ ជាអ្នកចំណាយថ្លៃការសាងសង់ក្រោមកិច្ចសម្របសម្រួលរបស់លោកឧបនាយករដ្ឋមន្ដ្រី ជា សុផារ៉ា និងអនុម័តដោយសម្តេចតេជោ ហ៊ុន​សែន ប្រធានព្រឹទ្ធសភាកម្ពុជា។

លោក ស្វាយ វុឌ្ឍី នាយកនីតិកម្ម និងទំនាក់ទំនងសាធារណៈនៃក្រុមហ៊ុន សុខា ហូថែល បានប្រាប់ក្រុមអ្នកសារព័ត៌មានក្នុងឱកាសដំណើរទស្សនកិច្ចស្វែងយល់ពីគម្រោងអភិវឌ្ឍនៅតំបន់ឧទ្យានជាតិបូកគោកាលពីថ្ងៃទី២៨ ខែឧសភា ឆ្នាំ២២៩ ថា ៖ ការចាយថវិកាអស់ច្រើន ដោយសារផ្លូវដែលត្រូវស្ថាបនាជាផ្លូវថ្មីទាំងស្រុង ហើយតាមការសិក្សាពីមន្រ្តីជំនាញនិងមន្រ្តីក្រសួងសាធារណការ និងដឹកជញ្ជូនក្នុងមួយគីឡូម៉ែត្រត្រូវចាយថវិកាអស់ប្រហែល ៣ លានដុល្លារ ដោយសារជាផ្លូវស្ថាបនាថ្មីទាំងស្រុង ហើយការសាងសង់ត្រូវកាត់ព្រៃ ឈូសឡើងចុះភ្នំ ការធ្វើស្ពាន និងលូបន្ថែមទៀត។

លោក ស្វាយ វុឌ្ឍី បានបន្តថា ឧទ្យាជាតិបូកគោមានផ្ទៃដីលាតសន្ធឹងដ៏វែង ដោយកន្លងទៅមានតែផ្លូវមួយខ្សែពីផ្លូវជាតិលេខ ៣។ ដូចនេះ ដោយមានការអនុញ្ញាតពីរាជរដ្ឋាភិបាល ក្រុមហ៊ុនបានស្ថាបនាផ្លូវមួយខ្សែថ្មីមួយទៀតតភ្ជាប់ពីផ្លូវជាតិលេខ ៤ ចំណុចគីឡូម៉ែត្រលេខ ១៥៨ ត្រង់ចម្ការដូងប្រេងឧកញ៉ា ម៉ុង ឫទ្ធី មកឧទ្យានជាតិបូកគោ។ ក្រោយឈូសឆាយជាទម្រង់ផ្លូវសម្រេចបាន ១០០% ក្រុមការងារកំពុងចាប់ផ្តើមចាក់បេតុងពីការដ្ឋានសាងសង់ព្រះពុទ្ធបដិមាកម្ពស់ ១០៨ ម៉ែត្រនៅលើឧទ្យានបូកគោចុះទៅខាងក្រោម ដោយសម្រេចចាក់បេតុងបានជាង ២ គីឡូម៉ែត្រ ហើយកំពុងបន្តទៅមុខជាជំហានៗទៀត។គម្រោងផ្លូវនេះទទួលបន្ទុករ៉ាប់រ៉ងស្ថាបនាទាំងស្រុងដោយក្រុមហ៊ុន។ ចំពោះផែនការបញ្ចប់នៅពេលណា លោក ស្វាយ វុឌ្ឍី មិនទាន់ហ៊ានកំណត់ដោយផ្អែកលើស្ថានភាពសេដ្ឋកិច្ច។

លោកបានបញ្ជាក់ថា ៖ ដោយសារបច្ចុប្បន្នស្ថានភាពសេដ្ឋកិច្ចកំពុងជួបវិបត្តិ បានជះឥទ្ធិពលដល់ការវិនិយោគ។ តែបើសេដ្ឋកិច្ចល្អប្រសើរឡើងវិញ នឹងជំរុញឲ្យបានលឿន។ នៅពេលបញ្ចប់ការសាងសង់ដាក់ឲ្យប្រើប្រាស់ ជម្រើសផ្លូវមួយខ្សែថ្មីនេះភ្ជាប់ចេញពីផ្លូវជាតិលេខ ៤ នឹងបើកឲ្យពលរដ្ឋធ្វើដំណើរដោយឥតគិតថ្លៃ។

អ្នកឧកញ៉ាបណ្ឌិត សុខ គង់ បានមានប្រសាសន៍ឲ្យដឹងកន្លងមកថា ៖ ផ្លូវថ្មីនេះនឹងដើរតួនាទីកាន់តែសំខាន់ក្នុងការលើកកំពស់សេដ្ឋកិច្ចនៅក្នុងខេត្តកំពត ពិសេសជំរុញការអភិវឌ្ឍទីក្រុងបូកគោកាន់តែសកម្ម និងរស់រវើកថែមទៀត ខណៈរហូតមកទល់ពេលនេះ ក្រុមហ៊ុនសុខាអូតែល បានចំណាយប្រាក់ចន្លោះពី៤០០ ទៅ ៥០០លានដុល្លាររួចហើយដើម្បី​មាន​ភាព​ងាយស្រួល​សម្រាប់​ប្រជាពលរដ្ឋ​ក្នុង​ការ​ធ្វើដំណើរចំណេញ​ពេលវេលា ​ជួយ​លើក​កម្ពស់​សេដ្ឋកិច្ច គាំទ្រ​ដល់ការ​វិនិយោគ​ និង​ទាក់ទាញ​ផ្នែក​ទេសចរណ៍។

គម្រោងស្ថាបនាផ្លូវតភ្ជាប់ឧទ្យានជាតិ​ព្រះមុនីវង្សបូកគោ​ មកផ្លូវជាតិលេខ៤ ត្រង់ចំណុច PK១៥៨+២០០ នេះ​ ត្រូវ​បាន​រាជរដ្ឋាភិបាលកម្ពុជា ​សម្រេច​​កាល​ពី​ដើម​ឆ្នាំ​២០២២ ឱ្យ​ក្រសួង​រៀបចំដែនដី នគរូបនីយកម្ម និង​សំណង់ ​សហការ​ជាមួយ​អ្នកជំនួញ​ជើង​ចាស់​ពីរ​រូប​គឺ អ្នកឧកញ៉ាបណ្ឌិត សុខ គង់ និង​អ្នកឧកញ៉ាបណ្ឌិត ម៉ុង ឬទ្ធី ​​បើក​ការ​​ឈូសឆាយ​ធ្វើ​ផ្លូវ​ថ្មី​នេះ​ឡើង ដើម្បី​មាន​ភាព​ងាយស្រួល​សម្រាប់​ប្រជាពលរដ្ឋ​ក្នុង​ការ​ធ្វើដំណើរ ចំណេញ​ពេលវេលា ​ជួយ​លើក​កម្ពស់​សេដ្ឋកិច្ច គាំទ្រ​ដល់ការ​វិនិយោគ​ និង​ទាក់ទាញវិស័យ​ទេសចរណ៍។ ការអនុវត្តគម្រោងសាងសង់ហេដ្ឋារចនាសម្ព័ន្ធផ្លូវថ្មីសន្លាងមួយនេះ គឺអនុវត្តតាមប្រសាសន៍របស់សម្តេចតេជោ ហ៊ុន សែន ។

ផ្លូវ​ធ្វើ​ដំណើរ​ឡើង​ភ្នំ​​​បូកគោ ​​ប្រវែង ៦១​គីឡូម៉ែត្រនេះជាផ្លូវថ្មីត្រូវសាងសង់ពុះកាត់ភ្នំ ផ្ទាំងថ្មធំៗ អូរ និងជ្រោះធំៗ​ជាច្រើន ដោយ​​​​ឆ្លង​កាត់​ចំការ​ដូង​ប្រេង​​របស់​អ្នក​ឧកញ៉ា ម៉ុង ឫទ្ធី ប្រវែង ១៥គីឡូម៉ែត្រ​ ​​មាន​ទទឹង​ផ្លូវ​សរុប​ប្រមាណ ២០ម៉ែត្រ ​​ក្នុង​នោះ​​មាន​ផ្លូវ​រថយន្ត​ទៅ​មក ​​៧​ម៉ែត្រ ផ្លូវ​ម៉ូតូ​ទៅ​មក ៦ម៉ែត្រ ​​និង​ចិញ្ចើម​ផ្លូវ​ប្រវែង ៣,៥ម៉ែត្រ​ទាំង​សងខាង៕