បរទេស ៖ រាប់ចាប់ពីទីក្រុង New York, San Frascisco ទៅដល់ Honululu និង Chicago បច្ចុប្បន្ន ទីក្រុងចិន (Chinatown) ដែលស្ថិតនៅតាមបណ្តាទីក្រុងធំៗទាំងនោះនៅទូទាំងសហរដ្ឋអាមេរិកគឺមានចំនួនរហូតទៅដល់៥០កន្លែង និងកំពុងចូលរួមចំណែកដ៏សំខាន់ដល់សេដ្ឋកិច្ចអាមេរិកជាមួយនឹងចំណូលជាទឹកប្រាក់រាប់សិបពាន់លានដុល្លារជារៀងរាល់ឆ្នាំ។

ទីក្រុងចិនដែលសំដៅទៅដល់តំបន់ប្រជុំជនរស់នៅនៃក្រុមពលរដ្ឋជនជាតិចិនដើមដែលរស់នៅក្រៅប្រទេសកំណើត ហើយប្រមូលផ្តុំគ្នារស់នៅតាមទីក្រុងធំៗជាច្រើននៅជុំពិភពលោក ហើយក្នុងនោះគេជឿជាក់ថានៅក្នងសហរដ្ឋអាមេរិក ទីក្រុងចិន មានចំនួនច្រើនជាងគេបំផុតធៀបទៅនឹងបណ្តាប្រទេសដទៃទោះបីជាជាក់ស្តែងប្រវត្តិនៃក្រុងចិនគឺចេញមកពីប្រទេសសិង្ហបុរីអស់រយៈពេលជាច្រើនទសវត្សរ៍មកហើយក្តី។

Chinatown នៅអាមេរិកត្រូវបានគេមើលឃើញថា ជាមជ្ឈមណ្ឌលវប្បធម៍ដ៏សំបូរបែបសម្រាប់ការទាក់ទាញទេសចរគ្រប់សញ្ជាតិ ប៉ុន្តែលើសពីការកំសាន្ត និងសេវាកម្មទេសចរណ៍ តំបន់ប្រជុំជនរស់នៅទាំងនោះបានជះឥទ្ធិពលយ៉ាងខ្លាំងទៅដល់សេដ្ឋកិច្ចជាតិរបស់អាមេរិក ក្រោមការស្រាវជ្រាវរបស់ក្រុមប្រឹក្សាពាណិជ្ជកម្មអាស៊ី និងអាមេរិកបានរកឃើញថា Chinatown ទីក្រុងចិនបានទាញយកចំណូលដល់ទៅរាប់ពាន់លានដុល្លារចាក់ចូលក្នុងផលិតផលជាតិសរុបរបស់អាមេរិកជារៀងរាល់ឆ្នាំ។

កំណើតនៃក្រុងចិននៅអាមេរិកគឺបានចាប់ផ្តើមឡើងតាំងតែពីឆ្នាំ១៨៦៣ មកម្ល៉េះ ក្នុងរូបភាពដំបូងជាទីតាំងដែលប្រមូលផ្តុំទៅដល់រោងចក្រផលិតកម្ម ជាពិសេសគឺរោងចក្រកាត់ដេរ ប៉ុន្តែគេសង្កេតឃើញថាអាជីវកម្មទាំងនោះនៅមានសកម្មភាពតិចតួចនៅឡើយនៅតាមក្រុងចិនមួយចំនួន។

ថ្វីត្បិតតែមិនមានទិន្នន័យសរុបប្រាកដចំពោះ GDP របស់អាមេរិកក្តីពីសំណាក់ប្រតិបត្តិការអាជីវកម្មនៅតាមក្រុងចិនទាំង៥០ ប៉ុន្តែគេជឿជាក់ថា វាមានទំហំរាប់សិបពាន់លានដុល្លារជារៀងរាល់ឆ្នាំ ពីព្រោះថា បើគិតត្រឹមឧស្សាហកម្មម្ហូបអាហារដែលទទួលបានពីអាជីវកម្មភោជនីយដ្ឋានប៉ុណ្ណោះសមាគមភោជនីយដ្ឋានអាមេរិកបង្ហាញថា ចំណូលពីការលក់កាលពីឆ្នាំ២០១២មានទៅដល់ ៧២ពាន់លានដុល្លារដែលក្នុងនោះ Chinatown គឺជាចំណែកធំជាងគេ។

ដោយឡែកសម្រាប់ចំណូលបានពីទេសចរណ៍វិញគេអាចសន្មតថាក៏មានចំណូលរាប់សិបលានដុល្លារផងដែរ ពីព្រោះថាជារៀងរាល់ឆ្នាំភ្ញៀវទេសចរដែលមកពីជុំវិញពិភពលោកមានចំនួនដល់ទៅរាប់សិបលាននាក់បានធ្វើដំណើរមកកំសាន្តនៅតាមក្រុងចិនទាំងនោះ។ ក្រៅពីនោះវិស័យហិរញ្ញវត្ថក៏ស្ថិតនៅក្នុងប្រព័ន្ធអេកូឡូស៊ីនៃសេដ្ឋកិច្ចក្នុងតំបន់ Chinatown ផងដែរ ពីព្រោះគេក៏សង្កេតឃើញមានស្ថាប័នផ្តល់កម្ចី និងធនាគារចិនជាច្រើន និងបុគ្គលិករាប់ពាន់នាក់ដែលនិយាយភាសាចិនកំពុងទាញយកចំណូលពីទីនេះ៕