សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ថ្លែងចេញពីខេត្តតាកែវ នាឱកាសជួបសំណេះសំណាលជាមួយកម្មករកម្មការិនីជិត២ម៉ឺននាក់ក្នុងស្រុកបាទី សម្ដេចមហាបវរធិបតី ហ៊ុន ម៉ាណែត បានប្រាប់ទៅអភិបាលខេត្ត ឬថ្នាក់ដឹកនាំខេត្តទាំងអស់ក្នុងប្រទេសកម្ពុជា បង្កើនភាពទាក់ទាញការវិនិយោគ ទេសចរណ៍ ដោយឱ្យមានការប្រកួតប្រជែងដូចនឹងប្រទេសមួយចំនួនបានធ្វើ ។
សម្ដេចមានប្រសាសន៍ថា ខេត្តទាំងអស់ក្នុងប្រទេសកម្ពុជាគួរចាប់ផ្ដើមប្រកួតគ្នាទាក់ម៉ូយ ដែលសំដៅលើទាក់ទាញការវិនិយោគ មិនថាទេសចរណ៍ ឬឧស្សាហកម្មនោះទេ ខេត្តខ្លះមានសក្ដានុពលទេសចរណ៍ ដូច្នេះគួរទាក់ទាញលើផ្នែកទេសចរណ៍ ខេត្តខ្លះទៀតមានសក្ដានុពលខាងឧស្សាហកម្មអាចទាក់ទាញអ្នកវិនិយោគមកបណ្ដាក់ទុនខាងឧស្សាហកម្ម ចំណែកខេត្តដែលមានសក្ដានុពលខាងកសិកម្ម អាចទាក់ទាញមកបណ្ដាក់ទុនវិនិយោគលើកសិកម្ម ។
សម្ដេចបន្តថា នៅប្រទេសមួយចំនួន ខេត្តរបស់គេនីមួយៗប្រកួតប្រជែងគ្នាទាក់ម៉ូយ ដូច្នេះកម្ពុជាគួរចាប់ផ្ដើមអនុវត្តន៍ពីពេលនេះតទៅ ។ កន្លងមករាជរដ្ឋាភិបាល បានខិតខំទាក់ម៉ូយតែម្នាក់ឯង ហើយពេលទាក់ម៉ូយបានហើយ ខេត្តខ្លះអត់ខិតខំទាក់ទាញបន្ត ដូច្នេះ ក៏រាងហត់បន្តិចដែរ អញ្ចឹងខេត្តនីមួយៗ ចាប់ផ្ដើមទាក់ម៉ូយបន្តពីរាជរដ្ឋាភិបាល ។
សម្ដេចបន្ថែមថា ៖
«មុននឹងឱ្យគេមកលេងយើង យើងគួររៀបចំផ្ទះឱ្យបានស្អាត ។ ក្នុងន័យនេះ គឺសំដៅលើខេត្តនីមួយៗ ត្រូវចេះរៀបចំ សម្របសម្រួល និងរង់ចាំស្វាគមន៍វិនិយោគិនចូលមកកាន់ទឹកដីរបស់ខ្លួន ។ ក្នុងរយៈពេល៣សប្ដាហ៍នេះ ខ្ញុំបានចេញទាក់ម៉ូយ ទាំងម៉ូយក្នុងប្រទេស និងម៉ូយនៅក្រៅប្រទេស ដូចជាទៅប្រទេសឥណ្ឌូនេស៊ី និងបានជួបម៉ូយមកពីច្រើនប្រទេស ដូចជាមេដឹកនាំអាស៊ាន ជប៉ុន និងចិន បន្ទាប់មកទៅប្រទេសចិនដើម្បីជួបវិនិយោគិនជនជាតិចិនជាច្រើនទៀត ហើយនៅថ្ងៃទី២១ខាងមុខនេះ ខ្ញុំនឹងទៅអាមេរិក ដោយគ្រោងជួបជាមួយវិនិយោគិននៅអាមេរិកជាច្រើនទៀត»។
ឯកឧត្តម អ៊ូច ភា អភិបាលខេត្តតាកែវ បានមានប្រសាសន៍តាមទូរសព្ទឱ្យដឹងផងដែរថា បច្ចុប្បន្ននេះខេត្តតាកែវក៏បានខិតខំប្រឹងប្រែងក្នុងការទាក់ទាញអ្នកវិនិយោគទាំងក្នុងវិស័យកសិកម្ម និងវិស័យ ឧស្សាហកម្មជាពិសេសរោងចក្រសហគ្រាស ។
ឯកឧត្តមបន្តថា ថ្មីៗនេះមានរោងចក្រចំនួន៣បន្ថែមទៀតបានចូលមកកាន់ទឹកដីនៃខេត្តតាកែវ និងកំពុងស្វែងរកទីតាំងបណ្ដាក់ទុនលើគម្រោងវិនិយោគរបស់ខ្លួន ដែលការវិនិយោគលើគម្រោងរោងចក្រសហគ្រាសនេះ បានផ្ដល់ឱកាសការងារដល់ពលរដ្ឋក្នុងខេត្តតាកែវរាប់ម៉ឺននាក់ ។ បច្ចុប្បន្នរោងចក្រឧស្សាហកម្មក្នុងខេត្តតាកែវបានផ្ដល់ការងារដល់កម្មករជិត៧ម៉ឺននាក់ និងបានផ្ដល់ប្រាក់ចំណូលជាង២០០លានដុល្លារអាមេរិកក្នុងមួយឆ្នាំ ៕
Account
Security
Favourite Content