សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ យោងតាមប្រសាសន៍របស់ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ក្រសួងត្រូវបានរាជរដ្ឋាភិបាលប្រគល់ភារកិច្ចចំនួន២ទៀតឱ្យមកធ្វើ គឺជាការគ្រប់គ្រងបឹងទន្លេសាប និងដឹកនាំសម្របសម្រួលគ្រប់គ្រងតំបន់អង្គរ ។
ជាមួយគ្នានេះ ដើម្បីគ្រប់គ្រងតំបន់ទាំងពីរនេះបានល្អប្រសើរ ក្រសួងរៀបចំដែនដី នគរូបនីយកម្ម និងសំណង់ បានរៀបចំជាប្លង់គោលនៃការប្រើប្រាស់ដីធ្លីនៅតាមតំបន់បឹងទន្លេសាប និងតំបន់អង្គរ ។ ការរៀបចំប្លង់គោលនៃការប្រើប្រាស់ដីនេះទៀតសោត គឺធានាបាននូវការគ្រប់គ្រងជាក់លាក់ ទាំងតំបន់អង្គរ និងតំបន់បឹងទន្លេសាប ព្រមទាំងការរស់នៅរបស់ពលរដ្ឋឱ្យកាន់តែល្អប្រសើរឡើង ។
ឯកឧត្តមឧបនាយករដ្ឋមន្ត្រី សាយ សំអាល់ បានមានប្រសាសន៍ថា ដើម្បីគ្រប់គ្រងតំបន់ទាំងពីរនេះបានល្អ ក្រសួងបានប្រើយុទ្ធសាស្ត្រតែមួយគត់សម្រាប់គ្រប់គ្រងទាំងតំបន់អង្គរ និងតំបន់ទន្លេសាប ហើយយុទ្ធសាស្ត្រនេះ នឹងធានាបានថា តំបន់អប្សរា នឹងអាចគ្រប់គ្រងថែរក្សាប្រាង្គប្រាសាទ ជាមួយការរស់នៅរបស់ពលរដ្ឋក្នុងតំបន់នោះកាន់តែមានសុភមង្គល ។
ឯកឧត្តមបានបន្តថា ៖
«បងប្អូនប្រជាពលរដ្ឋដែលរស់នៅក្នុងតំបន់អង្គរនៅតែអាចបន្តរស់នៅបាន ហើយប្រាសាទក៏នៅតែអាចការពារបានមិនថានៅក្នុងជំនាន់នេះ ឬជំនាន់ក្រោយៗទៀត ដោយត្រូវធ្វើយ៉ាងណាឱ្យបងប្អូននៅក្នុងតំបន់អង្គរក្លាយជាអ្នកថែរក្សាអង្គរ ហើយដើម្បីឱ្យពួកគាត់ថែទាំអង្គរបានល្អ និងគង់វង្សគឺត្រូវតែឱ្យពួកគាត់រស់នៅស្រួល មានជីវិតប្រកបដោយសេចក្ដីសុខ ប៉ុន្តែបើសិនជាពួកគាត់ធ្វើអ្វីក៏មិនបាន វាហាក់ដូចជាយើងបានដាក់លក្ខខណ្ឌជីវិតរបស់ពួកគាត់យ៉ាងដូច្នោះដែរ» ។
ឯកឧត្តមឧបនាយករដ្ឋមន្ត្រី បានសង្កត់ធ្ងន់ថា ៖
«ចាប់ពីពេលនេះតទៅ យើងមិនត្រូវទាស់ទែងគ្នា មិនត្រូវឈ្លោះគ្នាទៀតនោះទេ គឺយើងត្រូវរួមសាមគ្គីគ្នាដើម្បីអភិវឌ្ឍន៍ប្រទេស ហើយការដែលក្រសួងប្រើប្រាស់ប្លង់គោលនៅតំបន់អង្គរ និងតំបន់ទន្លេសាបនេះ គឺដើម្បីឱ្យពលរដ្ឋក្នុងតំបន់នេះរស់នៅកាន់តែប្រសើរ ទទួលបានប្រាក់ចំណូលបន្ថែម ជីវភាពកាន់តែល្អតាមរយៈការបង្កើតចំណូលនៅក្នុងមូលដ្ឋានផ្ទាល់តែម្ដង»។
គួររម្លឹកថា នៅក្នុងតំបន់អង្គរដែលមានភូមិសរុបចំនួន ១១៤ភូមិ រាជរដ្ឋាភិបាលនឹងរៀបចំភូមិទាំងអស់ឱ្យក្លាយជាភូមិឋានក្សេមក្សាន្ត ពលរដ្ឋរស់នៅប្រកបដោយសាមគ្គីភាពគ្នា ប្រកបដោយសុខភមង្គល ជាពិសេស មិនមានវិវាទនឹងគ្នារវាងអ្នកជិតខាងនោះទេ ។
ដោយឡែក តំបន់បឹងទន្លេសាប កន្លងមកឯកឧត្តម សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក៏បានលើកឡើងផងដែរថា បឹងទន្លេសាប គឺជាធនធានរបស់កម្ពុជាមួយដ៏សំខាន់ដែលផ្ដល់នូវចំណូលសម្រាប់ផ្គត់ផ្គង់សេដ្ឋកិច្ចប្រមាណជា ២ពាន់លានដុល្លារអាម៉េរិកក្នុងមួយឆ្នាំ តាមរយៈការផ្ដល់នូវផលត្រី ជីវជាតិដីសម្រាប់បង្កបង្កើនភោគផលដំណាំនានា ។ ក្រៅពីនេះ បឹងទន្លេសាបនេះក៏ជាតំបន់ទេសចរណ៍ បង្កើនចំណូលដល់ពលរដ្ឋក្នុងសហគមន៍ កែប្រែជីវភាពកាន់តែប្រសើរជាងមុន ដូច្នេះហើយ រាជរដ្ឋាភិបាលត្រូវតែការពារតំបន់បឹងទន្លេសាបឱ្យបានជាដាច់ខាត ។ ក្រៅពីតំបន់ទាំងពីរនេះ ក្រសួងរៀបចំដែនដី នគរូបនីយកម្ម និងសំណង់ ក៏នឹងត្រូវរៀបចំនគរូបនីយកម្មសម្រាប់តំបន់នានាតាមបណ្ដាខេត្ត រៀបចំទីក្រុងឱ្យមានសណ្ដាប់ធ្នាប់ មានរបៀបរៀបរយ ពោរពេញដោយសោភ័ណភាព៕
Account
Security
Favourite Content