សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ស្ទឹងត្រែង ៖ លំនៅឋានរាប់រយខ្នងរបស់ពលរដ្ឋក្នុងស្រែគរ២ ឃុំស្រែគរ ស្រុកសេសាន ខេត្តស្ទឹងត្រែង បានសង់ឡើងយ៉ាងមានរបៀប និងមានរចនាបថបែបខ្មែរដូចៗគ្នាទាំងអស់ ដែលក្រលេកមើលទៅគួរឱ្យទាក់ទាញជាទីបំផុត ។ សំណង់ភូមិឋានដែលគួរឱ្យទាក់ទាញ និងមានរបៀបនេះ ត្រូវបានលេចរូបរាងឡើងក្រោយមានការអភិវឌ្ឍប្រភពថាមពលទំនប់វារីអគ្គិសនីសេសានក្រោម២ ក្នុងស្រុកសេសាន ខេត្តស្ទឹងត្រែង ។
បើតាមពលរដ្ឋជាច្រើនក្នុងភូមិស្រែគរ២ ឃុំស្រែគរ ស្រុកសេសាន ខេត្តស្ទឹងត្រែង បានប្រាប់សារព័ត៌មានឱ្យដឹងថា ដំបូងឡើយពួកគាត់មិនមែនរស់នៅជុំគ្នា និងមានរបៀបរៀបរយដូច្នេះទេ ពោលគឺទើបតែប៉ុន្មានឆ្នាំចុងក្រោយនេះ ដែលពួកគាត់បានឡើងមករស់នៅក្នុងភូមិឋានថ្មី រៀបចំឡើងដោយអាជ្ញាធរ និងក្រុមហ៊ុនអភិវឌ្ឍន៍ទំបន់វារីអគ្គិសនី ។
បើតាមអ្នកស្រី ផា វី ប្រជាពលរដ្ឋម្នាក់រស់នៅភូមិស្រែគរ២ ឃុំស្រែគរ ស្រុកសេសាន ខេត្តស្ទឹងត្រែង បានឱ្យដឹងថា កាលពីដើមឡើយ អ្នកស្រីក៏ដូចជាអ្នកភូមិផ្សេងទៀត គឺរស់នៅ និងប្រកបរបរកសិកម្ម ដោយធ្វើស្រែ និងដាំដំណាំ ប៉ុន្តែក្រោយពេលមានគម្រោងអភិវឌ្ឍន៍ទំនប់វារីអគ្គិសនីសេសានក្រោម តម្រូវឱ្យពលរដ្ឋដែលរស់នៅតំបន់អភិវឌ្ឍន៍នោះ ត្រូវរកកន្លែងថ្មីសម្រាប់រស់នៅ ហើយក្រុមហ៊ុន និងអាជ្ញាធរបានដោះស្រាយជូនពួកគាត់ដោយឱ្យពួកគាត់មករស់នៅតំបន់ថ្មីគឺក្នុងឃុំស្រែគរ ស្រុកសេសាន នេះតែម្ដង ។
អ្នកស្រីបន្តថា ផ្ទះដែលពួកគាត់រស់នៅនេះ គឺក្រុមហ៊ុនជាអ្នកចេញថវិកាសាងសង់ជូនជាថ្នូរនឹងការដោះស្រាយផលប៉ះពាល់ ដោយផ្ទះនេះត្រូវសាងសង់ឡើងលើទំហំដី ២០ម៉ែត្រ X ៥០ម៉ែត្រ ជាមួយដីសម្រាប់បង្កបង្កើនផលទំហំ ៥ហិកតាបន្ថែមទៀត ។
អ្នកស្រីបានបន្ថែមថា ៖
«ក្រោយពេលមានការរៀបចំភូមិឋានថ្មីនេះ ឃើញថាការរស់នៅមានភាពស្រួលជាងមុន មានផ្លូវបេតុង ផ្លូវលំ មានភ្លើងអគ្គិសនីប្រើប្រាស់ខ្វាត់ខ្វែង ហើយការរស់នៅរបស់ពលរដ្ឋក៏អ៊ូរអរជាងពេលដែលពួកគាត់រស់នៅទីតាំងចាស់ដាច់ដោយឡែកពីគ្នា»។
លោក ឡាំង ទុយ អាជីវករលក់ដូរនៅក្នុងភូមិ-ឃុំ ដូចគ្នានេះក៏បាននិយាយដែរថា ពីមុនលោកក៏មិនមែនមានទីលំនៅក្នុងភូមិ-ឃុំនេះដែរ គឺរស់នៅតំបន់ដែលស្ថិតនៅក្នុងគម្រោងអភិវឌ្ឍន៍វារីអគ្គិសនីសេសានក្រោមទី២ ។ ក្រោយពេលពលរដ្ឋឡើងមកនៅតំបន់ដែលរៀបចំឡើងដោយអាជ្ញាធរ និងក្រុមហ៊ុនអភិវឌ្ឍន៍ឃើញថាមានការរីកចម្រើនជាងមុន។ ជាក់ស្ដែង រូបលោកកាលពីនៅតំបន់ចាស់ លោកប្រកបរបរតែធ្វើស្រែ និងចម្ការប៉ុណ្ណោះ ប៉ុន្តែពេលនេះ លោកអាចប្រកបរបរជាអ្នកលក់ដូរនៅផ្ទះបន្ថែមពីលើរបរធ្វើស្រែចម្ការដែលមានស្រាប់។
លោក ខៀន ផែវ ប្រធានភូមិស្រែគរ២ ឃុំស្រែគរ ស្រកសេសាន ខេត្តស្ទឹងត្រែង បានលើកឡើងថា នៅក្នុងតំបន់ថ្មីដែលពលរដ្ឋបានផ្លាស់ទីពីទីតាំងដែលត្រូវទឹកលិចនោះ ត្រូវបានរាជរដ្ឋាភិបាលយកចិត្តទុកដាក់អភិវឌ្ឍន៍ហេដ្ឋារចនាសម្ព័ន្ធ មិនចាញ់តំបន់អភិវឌ្ឍន៍ផ្សេងទៀតឡើយ ដូចជា មានសាលារៀន ដែលកូនៗរបស់ប្រជាពលរដ្ឋនៅតំបន់នេះអាចរៀនបានរហូតដល់ថ្នាក់អនុវិទ្យាល័យ (ថ្នាក់ទី៩ ) ដែលកាលពីមុនមានត្រឹមតែថ្នាក់ទី៥ប៉ុណ្ណោះ ។ ក្រៅពីនេះ ក៏មានមណ្ឌលសុខភាព មានវត្តអារាម សាលាឃុំ សម្រាប់បម្រើសេវារដ្ឋបាលសាធារណៈជូនប្រជាពលរដ្ឋ មានផ្លូវថ្នល់ ទាំងផ្លូវលំ និងផ្លូវចាក់បេតុងផងដែរ ។
លោកបញ្ជាក់ថា ៖
«បើប្រៀបធៀបជីវភាពរបស់ពលរដ្ឋ និងការរស់នៅរបស់ពួកគាត់ពីតំបន់ចាស់ ផ្លាស់មកតំបន់ថ្មីឃើញថា ការរស់នៅតំបន់ថ្មីនេះ មានភាពល្អប្រសើរជាងតំបន់ចាស់ ព្រោះទីនេះមានភ្លើងអគ្គិសនីតភ្ជាប់ជូនគ្រប់ៗគ្នាផ្ទះ មានប្រព័ន្ធទឹកស្អាតជាដើម»។
លោកបន្ថែមថា ភូមិឋាននេះ ទើបតែកើតឡើងក្នុងរយៈពេលប្រមាណមិនទាន់បាន១០ឆ្នាំនៅឡើយទេ ដូច្នេះនៅពេលអនាគត នៅពេលមានពលរដ្ឋចូលមករស់នៅក្នុងភូមិកាន់តែច្រើន មានការរៀបចំផ្ទះសម្បែងបានស្អាត ត្រឹមត្រូវ ជាមួយនឹងការយកចិត្តទុកដាក់ពីអាជ្ញាធរ រាជរដ្ឋាភិបាលផងដែរនោះ នឹងធ្វើឱ្យតំបន់នេះនឹងកាន់តែស្រស់ស្អាត និងទាក់ទាញបន្ថែមទៀត ។
គួរបញ្ជាក់ថា គម្រោងទំនប់វារីអគ្គិសនីសេសានក្រោម២ គឺជាគម្រោងវារីអគ្គិសនី ដែលមានសមត្ថអាចផលិតអានុភាពថាមពលបានរហូតដល់ ៤០០មេហ្កាវ៉ាត់ ក្រោមទឹកប្រាក់វិនិយោគប្រមាណជិត៨០០លានដុល្លារអាមេរិក ។ គម្រោងនេះត្រូវបានធ្វើឡើងក្នុងទម្រង់ BOT ក្នុងរយៈពេល៤០ឆ្នាំដែលន័យថា សាងសង់ ធ្វើអាជីវកម្ម និងផ្ទេរ ដោយចូលរួមវិនិយោគរវាង ៣ក្រុមហ៊ុន គឺក្រុមហ៊ុនកម្ពុជា ក្រុមហ៊ុនចិន និងក្រុមហ៊ុនវៀតណាម ៕
Account
Security
Favourite Content