សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ថ្លែងនៅក្នុងពិធីសំណេះសំណាលជាមួយសិស្សជាប់និទ្ទេស A កាលពីព្រឹកថ្ងៃទី២ ខែកុម្ភៈ ឆ្នាំ២០២៣ ព្រឹកមិញនេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានជំរុញឱ្យមន្ត្រីជំនាញពាក់ព័ន្ធសិក្សាគម្រោងសាងសង់អន្តេវាសិកដ្ឋានថ្មីមួយទៀតនៅប៉ែកខាងជើងរាជធានីភ្នំពេញសម្រាប់និស្សិតស្រីមកពីបណ្ដាខេត្តនានាស្នាក់នៅក្នុងពេលមកបន្តការសិក្សាថ្នាក់ឧត្តម។
សម្ដេចតេជោ ហ៊ុន សែន បានមានប្រសាសន៍ថា និស្សិតប្រុសៗ ដែលមកពីបណ្ដាខេត្ត និងមិនសូវមានលទ្ធភាពក្នុងជួលផ្ទះស្នាក់នៅបានពួកគេអាចស្នាក់នៅក្នុងវត្តនានានៅរាជធានីភ្នំពេញបាន ប៉ុន្តែសម្រាប់និស្សិតស្រីដែលគ្មានលទ្ធភាពក្នុងការជួលផ្ទះស្នាក់នៅ គឺមិនអាចទៅស្នាក់នៅក្នុងវត្តដូចនិស្សិតប្រុសបាននោះទេ ដូច្នេះហើយគប្បីសិក្សារកទីតាំងសម្រាប់សង់កន្លែងស្នាក់នៅរបស់និសិ្សតស្រីៗដើម្បីសម្រួលដល់ការចំណាយរបស់ពួកគេ ។
សម្ដេចតេជោបានបន្តថា ៖
“ផ្ដើមចេញពីចំណេះដឹង ចំណេះធ្វើនេះ អាចនឹងធ្វើឱ្យនិសិ្សតដែលមានសមត្ថភាពអាចអភិវឌ្ឍន៍ខ្លួនឯងឱ្យរីកចម្រើន និងអាចជួយគ្រួសារ ព្រមទាំងសង្គមជាតិនៅពេលអនាគត។ ខ្ញុំសង្ឃឹមថា មាតាបិតា អាណាព្យាបាល នឹងខិតខំផ្ដល់ឱកាសសម្រាប់កូនៗបន្តការសិក្សា ហើយអភិបាលរាជធានីភ្នំពេញពិនិត្យមើលបន្ថែមទៀត តើទីកន្លែងណាដែលអាចបង្កើតអន្តេវាសិកដ្ឋានមួយទៀត ដើម្បីរៀបចំសម្រាប់និស្សិតស្រី ពីព្រោះបន្តិចទៀតយើងនឹងទទួលនិស្សិតមកពីខាងក្រៅប្រទេស និងនិស្សិតក្នុងស្រុកក្រីក្រ ជាពិសេសនិស្សិតស្រីតែម្ដង”
សម្ដេចបន្ថែមឱ្យដឹងថា សម្រាប់អន្តេវាសិកដ្ឋានថ្មីនេះ សម្ដេចចង់បានទំហំដែលអាចដាក់និស្សិតបាន ២០០ ទៅ ៣០០គ្រែបន្ថែមទៀត ស្ថិតនៅប៉ែកខាងរាជធានីភ្នំពេញនៅម្ដុំពហុកីឡដ្ឋានជាតិមរតតេជោ បើសិនជាទីតាំងនៅបរិវេណសាលាតិចណូមិនអាចសាងសង់បាន។
សម្ដេចបានបញ្ជាក់ថា ៖
“ថ្វីត្បិតតែនៅពហុកីឡដ្ឋានជាតិមរតកតេជោរាងឆ្ងាយពីភ្នំពេញពិតមែន តែក៏វាប្រសើរជាងនៅបណ្ដាខេត្ត។ ប៉ុន្តែបើពិនិត្យមើលទៅវាក៏មិននៅឆ្ងាយប៉ុន្មានដែរ ពីព្រោះយើងមានផ្លូវស្អាតៗ ហើយផ្លូវធំៗ ដែលអាចឱ្យនិសិ្សតធ្វើដំណើរមកសិក្សានៅសាលាសកលវិទ្យាល័យក្នុងរាជធានីភ្នំពេញបានស្រួលផងដែរ”
សម្ដេចបានចាត់ឱ្យសាលារាជធានីភ្នំពេញ ក្រសួងអប់រំយុវជន និងកីឡា និងផ្នែកកីឡា ចាប់ផ្ដើមសិក្សាពីការសាងសង់អន្តេវាសិកដ្ឋាននៅក្នុងតំបន់ពហុកីឡដ្ឋានជាតិមរតកតេជោ និងចាប់ផ្ដើមសាងសង់បន្តិចម្ដងៗ ដោយក្នុងមួយឆ្នាំអាចសង់មួយអគារ ឬពីរអគារទៅតាមតម្រូវការចាំបាច់ ៕
Account
Security
Favourite Content