សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ថ្លែងនៅក្នុងឱកាសអញ្ជើញជាអធិបតីក្នុងពិធីបើកការដ្ឋានសាងសង់ស្ពានអាកាសភ្លោះនៅចំណុចប្រសព្វផ្លូវ៦០ម៉ែត្រ និងផ្លូវជាតិលេខ២ នៅព្រឹកថ្ងៃទី១៧ ខែមិថុនា ឆ្នាំ២០២៤ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានមានប្រសាសន៍ជំរុញឱ្យមន្ត្រីក្រសួងស្ថាប័នពាក់ព័ន្ធ ត្រូវគិតគូរគម្រោងប្លង់មេនៅតំបន់ក្រុងរណប និងត្រូវអនុវត្តន៍ឱ្យបានតឹងរ៉ឹងបំផុត ។
សម្ដេចធិបតីមានប្រសាសន៍ថា នៅតំបន់រណប តំបន់ទីក្រុងថ្មី ត្រូវមានការគិតគូរលើគម្រោងប្លង់មេឱ្យបានត្រឹមត្រូវ និងត្រូវអនុវត្តន៍ឱ្យបានតឹងរ៉ឹង ។ កន្លងមក តាមបុរីមួយចំនួនបានរៀបចំនូវគម្រោងប្លង់មេត្រឹមត្រូវ ប៉ុន្តែដោយសារតែតម្លៃដីធ្លីនៅតំបន់អភិវឌ្ឍន៍កើនឡើងជាបន្តបន្ទាប់ ធ្វើឱ្យអ្នកអភិវឌ្ឍន៍ត្រូវកាត់បន្ថយដីដែលត្រៀមបម្រុងទុកសម្រាប់អភិវឌ្ឍន៍ហេដ្ឋារចនាសម្ព័ន្ធ ផ្លូវ សួនកម្សាន្ត ធ្វើឱ្យបុរីមួយចំនួនមានភាពចង្អៀត។
សម្ដេចធិបតីបានបន្តថា ចាប់ពីពេលនេះតទៅ ការរៀបចំប្រព័ន្ធគមនាគមន៍ ការរៀបចំហេដ្ឋារចនាសម្ព័ន្ធរូបវ័ន្តនៅតំបន់ក្រុងរណបថ្មី ត្រូវរៀបចំ និងគិតគូរឱ្យបានម៉ត់ចត់ ហើយត្រូវអនុវត្តន៍ឱ្យបានម៉ឺងម៉ាត់ ដើម្បីធានាដល់សុខុមាលភាពរបស់ប្រជាពលរដ្ឋ អ្នករស់នៅក្នុងតំបន់នោះ ។ ជាក់ស្ដែងតំបន់ក្រុងរណបផ្លូវ៦០ម៉ែត្រ តំបន់បុរីនានានៅក្នុងរាជធានីភ្នំពេញ និងតំបន់ភូមិថ្មីៗ ត្រូវគិតគូរដល់ការរស់នៅរបស់ប្រជាពលរដ្ឋប្រកបដោយគុណភាព ។
សម្ដេចធិបតីបានបន្ថែមថា ៖
«ការរៀបចំទីក្រុង ត្រូវគិតគូរទុកជាមុន និងត្រូវគិតដល់ការរីកចម្រើននាពេលអនាគត ជាក់ស្ដែងរាជរដ្ឋាភិបាលបានអភិវឌ្ឍន៍ហេដ្ឋារចនាសម្ព័ន្ធជាច្រើននៅតំបន់ជាយក្រុង តំបន់ដែលមិនទាន់មានមនុស្សទៅដល់ ពីព្រោះថានៅពេលអនាគត តំបន់ដែលរដ្ឋាភិបាលអភិវឌ្ឍន៍ ដូចជាតំបន់ផ្លូវ៦០ម៉ែត្រ តំបន់ជុំវិញព្រលានយន្តហោះអន្តរជាតិតេជោ នឹងមានមនុស្សទៅរស់នៅច្រើន ហើយនៅពេលនោះ យើងមានហេដ្ឋារចនាសម្ព័ន្ធ មានផ្លូវ ទឹក ភ្លើង និងការដឹកជញ្ជូនរួចជាស្រេច ។ ពោល គឺយើងលែងដេញតាមសេះហើយ គឺយើងធ្វើក្រោលទុកជាមុន»។
សម្ដេចធិបតីក៏បានជំរុញឱ្យក្រសួងស្ថាប័ន និងអាជ្ញាធរ ត្រូវរៀបចំប្រព័ន្ធដឹកជញ្ជូនក្នុងក្រុងឱ្យមានសណ្ដាប់ធ្នាប់ ជាពិសេសការរៀបចំផ្លូវសម្រាប់រថយន្តក្រុងសាធារណៈ ដើម្បីផ្ដល់សេវា និងជំរុញឱ្យពលរដ្ឋងាកមកប្រើប្រាស់សេវារថយន្តក្រុងសាធារណៈរបស់រដ្ឋឱ្យបានច្រើន ហើយត្រូវរៀបចំភ្ជាប់ពីតំបន់មួយទៅតំបន់មួយទៀតឱ្យបានកាន់តែច្រើននៅក្នុងរាជធានីភ្នំពេញ ។
សម្ដេចក៏បានបញ្ជាក់ផងដែរថា អនាគតខាងមុខនេះ រាជធានីភ្នំពេញនឹងកាន់តែរីកសាយ ហើយបណ្ដាតំបន់ជាយក្រុងនាពេលបច្ចុប្បន្ននឹងក្លាយជាតំបន់ក្រុង ហើយតំបន់ដែលនៅដាច់ស្រយាលនៅពេលនេះ ក៏នឹងក្លាយជាតំបន់ជាយក្រុង ក្នុងនោះប៉ែកខាងត្បូងភ្នំពេញ តំបន់ជាយក្រុងនឹងអាចរីកដល់ស្រុកបាទី ឬភ្នំតាម៉ៅ នៅរយៈពេល២០ ឬក៏៣០ឆ្នាំខាងមុខទៀត ៕
Account
Security
Favourite Content