សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងរយៈពេលប៉ុន្មានឆ្នាំចុងក្រោយនេះ រាជរដ្ឋាភិបាលកម្ពុជា បានចំណាយថវិកាជាច្រើនវិនិយោគលើហេដ្ឋារចនាសម្ព័ន្ធ ជាពិសេសហេដ្ឋារចនាសម្ព័ន្ធតភ្ជាប់ពីភ្នំពេញទៅកាន់បណ្ដាខេត្តនានា ដែលនឹងអាចទាក់ទាញទាំងវិនិយោគិនក្នុងស្រុក និងបរទេស ងាកទៅបណ្តាក់ទុនវិនិយោគនៅតាមបណ្ដាខេត្តទាំងនោះក្រៅតែពីភ្នំពេញ ។
បើយើងក្រលេកទៅមើលផ្លូវជាតិសំខាន់ៗដែលតភ្ជាប់ពីភ្នំពេញទៅបណ្ដាខេត្ត ដូចជាផ្លូវជាតិលេខ១ លេខ២ លេខ៣ លេខ៤ លេខ៥ និងផ្លូវ៦ ត្រូវបានរាជរដ្ឋាភិបាលសាងសង់ និងកែលម្អកាន់តែស្អាត មានគុណភាពជាងមុន ដែលសម្រួលដល់ការធ្វើដំណើររបស់ពលរដ្ឋ ទេសចរ និងវិនិយោគិន។ តាមរយៈការអភិវឌ្ឍផ្លូវជាតិសំខាន់ៗទាំងនេះបាននាំការវិនិយោគថ្មីៗទៅកាន់តំបន់តាមបណ្ដោយផ្លូវជាតិទាំងនោះ និងតំបន់តាមបណ្ដាខេត្តនានាជាច្រើនទៀត ដូចជាខេត្តស្វាយរៀង ខេត្តតាកែវ កំពង់ស្ពឺ ក្រចេះ ព្រះសីហនុ និងបណ្ដាខេត្តសក្ដានុពលមួយចំនួន ។
ឯកឧត្តម ជា វុទ្ធី អគ្គលេខាធិការនៃគណៈកម្មាធិការវិនិយោគកម្ពុជា ក្រុមប្រឹក្សាអភិវឌ្ឍន៍កម្ពុជាបានមានប្រសាសន៍ឱ្យដឹងនៅព្រឹកថ្ងៃទី៣១ ខែមីនា ឆ្នាំ២០២៥ថា ហេដ្ឋារចនាសម្ព័ន្ធដែលមានលក្ខណៈល្អប្រសើរ នឹងចូលរួមចំណែកក្នុងការកាត់បន្ថយចំណាយធុរកិច្ច និងសន្សំសំចៃពេលវេលា ខណៈដែលរាជរដ្ឋាភិបាលបានវិនិយោគយ៉ាងច្រើនសន្ធាប់សន្ធាប់លើគម្រោងហេដ្ឋារចនាសម្ព័ន្ធចម្បង រួមមាន ការសាងសង់ផ្លូវល្បឿនលឿនជាពិសេសផ្លូវល្បឿនលឿនភ្នំពេញ-បាវិត ដែលគ្រោង នឹងបញ្ចប់ការសាងសង់នៅឆ្នាំ២០២៧ កំពង់ទឹកជ្រៅព្រែកជីកប្រវត្តិសាស្ត្រហ្វូណនតេជោ អាកាសយដ្ឋានអន្តរជាតិ និងមជ្ឈមណ្ឌលភស្តុភារកម្មជាដើម ។
ឯកឧត្តមបន្តថា ហេដ្ឋារចនាសម្ព័ន្ធទាំងនេះ នឹងចូលរួមចំណែកដោយផ្ទាល់ ក្នុងការលើកកម្ពស់ការតភ្ជាប់ក្នុងតំបន់ព្រមទាំងធានាលទ្ធភាពក្នុងការដឹកជញ្ជូនឆ្លងកាត់តាមច្រករបៀងសេដ្ឋកិច្ចសំខាន់ៗនៅក្នុងប្រទេសកម្ពុជា និងក្នុងតំបន់ប្រកបដោយប្រសិទ្ធភាពខ្ពស់ ។
ឯកឧត្តមបន្ថែមថា ក្នុងគោលបំណងបង្កើតបរិយកាសធុរកិច្ចដែលឆ្លើយតបទៅនឹងតម្រូវការក្ដីកង្វល់ របស់វិនិយោគិន រាជរដ្ឋាភិបាលបានបង្កើតយន្តការនានាជាច្រើន ។ តួយ៉ាងសម្ដេចធិបតីនាយករដ្ឋមន្ត្រី បានដឹកនាំវេទិការាជរដ្ឋាភិបាល ផ្នែកឯកជនលើកទី១៩ កាលពីខែវិច្ឆិកា ឆ្នាំ២០២៣កន្លងទៅ ដើម្បីដោះស្រាយបញ្ហាប្រឈម និងក្ដីកង្វល់ដែលធុរកិច្ច និងវិនិយោគិនជួបប្រទះក្នុងប្រតិបត្តិការរបស់ខ្លួននៅកម្ពុជា ។
អ្នកជំនាញនៃវិស័យអចលនទ្រព្យនៅកម្ពុជាជាច្រើនបានបញ្ចេញទស្សនស្រដៀងគ្នាថា តំបន់ណាដែលមានផ្លូវតភ្ជាប់ល្អ តំបន់នោះតែងតែមានការទាក់ទាញវិនិយោគថ្មីៗ ជាក់ស្ដែងផ្លូវជាតិលេខ៣ ផ្លូវលេខ៥១ ដែលតភ្ជាប់ពីផ្លូវជាតិលេខ៤ ទៅផ្លូវជាតិលេខ៥និងគម្រោងផ្លូវជាតិសំខាន់ៗផ្សេងទៀត ។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាបានបង្ហាញថា ក្នុងរយៈពេល៣ខែ ដើមឆ្នាំ២០២៥នេះ កម្ពុជាទទួលបានគម្រោងវិនិយោគចំនួន១៧២គម្រោង ដែលមានចំនួនលើសឆ្នាំ២០២១ទាំងមូល ដែលមានត្រឹមតែ ១៦៩គម្រោង ខណៈឆ្នាំ២០២៤កន្លងទៅ គម្រោងវិនិយោគទាំងអស់ដែលក្រុមប្រឹក្សាអភិវឌ្ឍន៍កម្ពុជាបានចុះបញ្ជីមានចំនួន៤១៤គម្រោងមានទឹកប្រាក់ប្រមាណជិត៧ពាន់លានដុល្លារអាមេរិក ៕
Account
Security
Favourite Content