សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កោះកុង រំពឹងនឹងទទួលបានភ្ញៀវទេសចរជាតិ និងអន្តរជាតិ កាន់តែច្រើន ស្របនឹងស្ពានខ្ពស់ជាងគេនៅកម្ពុជាស្ថិតនៅលើបណ្ដោយផ្លូវជាតិលេខ១០ដែលជាផ្លូវជាតិថ្មីនៅក្នុងប្រទេសកម្ពុជា គ្រោងនឹងដាក់ឱ្យប្រើប្រាស់នៅថ្ងៃទី១៨ ខែមីនា ឆ្នាំ ២០២៥ខាងមុខនេះ ខណៈពេលក្រសួងសាធារណការ និងដឹកជញ្ជូន ក៏កំពុងជំរុញស្ថាបនា និងលើកកម្ពស់ផ្លូវ២ខ្សែបុកទៅកាន់ខេត្តមួយនេះឱ្យបញ្ចប់នៅមុនដំណាច់ឆ្នា២០២៥ ។
បើតាមសេចក្ដីប្រកាសព័ត៌មានរបស់ក្រសួងសាធារណការ និងដឹកជញ្ជូន បានឱ្យដឹងថា ស្ពានលេខ២៨ ដែលស្ថិតនៅក្នុងគម្រោងផ្លូវជាតិលេខ១០ និងជាស្ពានខ្ពស់ជាងគេ (កម្ពស់៩០ម៉ែត្រ ) សម្រេចបាន៩៣ភាគរយហើយ និងគ្រោងដាក់ឱ្យប្រើប្រាស់បណ្ដោះអាសន្ននៅថ្ងៃទី១៨ ខែមីនា ឆ្នាំ២០២៥ ។ ចំណែកផ្លូវជាតិលេខ១០ ក៏សម្រេចបាន ៩៦,១៦ភាគរយ ។
ក្នុងសេចក្ដីប្រកាសដដែលនេះបានឱ្យដឹងថា ការងារសាងសង់ផ្លូវជាតិលេខ ១០ (អតីតផ្លូវជាតិ១៥៥១) ប្រវែងសរុប ១៩៨,៥១ គ.ម ចាប់ពីផ្លូវជាតិលេខ ៥៧ ត្រង់គីឡូម៉ែត្រលេខ ៣៥+៩០០ ស្ថិតក្នុងភូមិបញ្ចាំង ឃុំស៊ុង ស្រុកសំឡូត ខេត្តបាត់ដំបង ឆ្លងកាត់ឃុំប្រម៉ោយ ស្រុកវាលវែង ខេត្តពោធិ៍សាត់ រហូតដល់ផ្លូវជាតិលេខ ៤៨ត្រង់គីឡូម៉ែត្រលេខ PK១+៧០០ ស្ថិតក្នុងសង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។ គម្រោងនេះបានជួបនឹងផលប៉ះពាល់បរិស្ថានជាច្រើន ដែលតម្រូវឱ្យមានការផ្លាស់ប្តូរគន្លងផ្លូវថ្មីពី East Line មក West Line មានប្រវែង ៦៥,៧៤ គ.ម ខណៈបច្ចុប្បន្នសម្រេចការសាងសង់បាន ៩៦,១៦% គិតត្រឹមចុងឆ្នាំ ២០២៤ ។
ទន្ទឹមការស្ថាបនាស្ពានខ្ពស់ជាងគេនៅកម្ពុជា និងគម្រោងផ្លូវជាតិលេខ១០ រដ្ឋាភិបាលក៏បានជំរុញការស្ថាបនាផ្លូវមួយទៀតឆ្ពោះទៅកាន់ខេត្តកោះកុង គឺគម្រោងផ្លូវជាតិលេខ៤៨ ដែលគម្រោងផ្លូវជាតិនេះ ក្រសួងនឹងជំរុញឱ្យបញ្ចប់ជាស្ថាពរ មុនពិធីបុណ្យសមុទ្រនាចុងឆ្នាំ ២០២៥ ដែលកោះកុងនឹងធ្វើជាម្ចាស់ផ្ទះក្នុងការរៀបចំ ។
ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងថា ផ្លូវជាតិពីរខ្សែ រួមមានផ្លូវជាតិលេខ៤៨ និងផ្លូវជាតិលេខ១០ បុកចំខេត្តកោះកុង តារារះនាទិសនិរតីកំពុងលេខចេញវឌ្ឍនភាពដ៏ប្រសើរក្រៃលែង ត្រៀមខ្លួនរួចជាស្រេចទទួលបងប្អូនប្រជាពលរដ្ឋ ពីគ្រប់ទិសទីមកលេងបុណ្យសមុទ្រ និងទស្សនាខេត្តកោះកុងនាចុងឆ្នាំ ២០២៥ ខាងមុខ ។
ស្របនឹងគម្រោងហេដ្ឋារចនាសម្ព័ន្ធ តភ្ជាប់ទៅកាន់ខេត្តកោះកុង កំពុងស្ថាបនានិងគ្រោងបញ្ចប់នៅឆ្នាំ២០២៥ នេះ អ្នកវិនិយោគក្នុងស្រុកមួយរូប អ្នកឧកញ៉ា សួ វិរៈ ក៏បានបង្ហាញទស្សនីយភាពគម្រោងរីស៊តរបស់ខ្លួន ដែលបានសាងសង់ឡើងនៅលើកោះតូចមួយនាស្រុកបទុមសាគរ ខេត្តកោះកុង ។
អ្នកឧកញ៉ា សួ វិរៈ ម្ចាស់គម្រោង មេដ ម័ងឃី កោះស្ដេច រីស៊ត បានឱ្យដឹងថា Mad Monkey Koh Sdach នឹងក្លាយជាផលិតផលទេសចរណ៍ដ៏ថ្មីសន្លាងលើទឹកដីកោះស្ដេច ហើយផលិតផលថ្មីមួយនេះ នឹងក្លាយជាទំព័រប្រវត្តិសាស្ត្រថ្មីមួយទៀត ដែលអាចទាក់ទាញទេសចរណ៍អន្តរជាតិឱ្យបានស្គាល់ទឹកដីកោះស្ដេច ហើយកោះស្ដេចនឹងសំបូរទៅដោយទេសចរបរទេសពាសពេញកោះជាក់ជាមិនខាន ។ ផលិតផលទេសចរណ៍ថ្មីមួយនេះ នឹងនាំមកនូវសេដ្ឋកិច្ចដ៏រឹងមាំសម្រាប់ប្រជាជនដែលរស់នៅលើកោះស្ដេចផងដែរ ។
លោកជំទាវ មិថុនា ភូថង អភិបាលខេត្តកោះកុងបានមានប្រសាសន៍តាមទូរស័ព្ទឱ្យដឹងថា បច្ចុប្បន្ននេះខេត្តកោះកុង បានអភិវឌ្ឍន៍ផលិតផលទេសចរណ៍ជាបន្តបន្ទាប់ ដូចជា ស្តូបវិមានឈ្នះឈ្នះ និងរីស៊តមួយចំនួនទៀត ដែលវិនិយោគដោយក្រុមហ៊ុនឯកជន ។
លោកជំទាវបន្តថា ក្នុងរយៈពេលប៉ុន្មានចុងក្រោយនេះ ក៏មានការវិនិយោគលើសណ្ឋាគារ ផ្ទះសំណាក់ ក្នុងខេត្តកោះកុងជាបន្តបន្ទាប់ដែរ ក្នុងពេលផ្លូវមកកាន់ខេត្តកោះកុងបានសាងសង់កាន់តែជិតរួចរាល់ ដូច្នេះហើយ នៅពេលអនាគត ខេត្តកោះកុងនឹងទទួលបានភ្ញៀវទេសចរកាន់តែច្រើនមកសម្រាក និងលម្ហែកាយ ដែលអាចនឹងច្រើនលើសពី១០ម៉ឺននាក់ជាមិនខាន៕
Account
Security
Favourite Content