សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ពោធិ៍សាត់ ៖ ស្ពានខ្ពស់ជាងគេនៅកម្ពុជាដែលស្ថិតនៅបណ្ដោយផ្លូវជាតិលេខ១០ក្នុងខេត្តពោធិ៍សាត់ ត្រូវបានចាក់បេតុងតភ្ជាប់មុខតំណហើយ និងអនុញ្ញាតឱ្យពលរដ្ឋឆ្លងកាត់បណ្ដោះអាសន្ននៅថ្ងៃទី១១ ដល់ថ្ងៃទី១៧ ខែមេសា ឆ្នាំ២០២៥ ពោលគឺក្នុងឱកាសបុណ្យចូលឆ្នាំប្រពៃណីជាតិខ្មែរ ។
នៅថ្ងៃទី០៨ មេសា ឆ្នាំ ២០២៥ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានចូលរួមក្នុងពិធីចាក់បេតុងតភ្ជាប់មុខតំណស្ពានខ្ពស់ជាងគេនៅកម្ពុជា នៃគម្រោងផ្លូវជាតិលេខ១០ និងបើកដំណើរការជាបណ្តោះអាសន្ន ចាប់ពីថ្ងៃទី១១ ដល់១៧ ខែមេសា ឆ្នាំ២០២៥ ។ បើតាមសេចក្ដីប្រកាសព័ត៌មានរបស់ក្រសួងសាធារណការ និងដឹកជញ្ជូនបានឱ្យដឹងថា គម្រោងផ្លូវជាតិលេខ១៥៥១ (ផ.ជ.១០) និងស្ពាននេះ នឹងត្រូវបើកឱ្យប្រើប្រាស់ជាបណ្តោះអាសន្នសម្រាប់រថយន្តធុនតូច (ប្រភេទទេសចរណ៍/គ្រួសារ) ឆ្លងកាត់រយៈពេល១សប្តាហ៍ ចាប់ពីថ្ងៃទី១១ ដល់ថ្ងៃទី១៧ ខែមេសា ឆ្នាំ២០២៥ ក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំម្សាញ់ សប្តស័ក ព.ស.២៥៦៩ គ.ស .២០២៥ ខាងមុខនេះ ។
ស្ពាននេះជាផ្នែកមួយនៃគម្រោងសាងសង់ផ្លូវជាតិលេខ១០ ដែលបានប្រកាសបើកការដ្ឋានសាងសង់ជាផ្លូវការកាលពីថ្ងៃទី៩ ខែមីនា ឆ្នាំ២០២០ ក្រោមអធិបតីភាពដ៏ខ្ពង់ខ្ពស់ សម្តេចតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភានៃព្រះរាជាណាចក្រកម្ពុជា
ស្ពានខ្ពស់ជាងគេនេះ ជាស្ពានទី២៨ ក្នុងចំណោមស្ពានសរុបចំនួន៣២ ដែលសាងសង់សម្រេចបាន៩៨ភាគរយ មានប្រវែង ៥៣៧ម៉ែត្រ និងកម្ពស់ ៩០ម៉ែត្រ(ដោយគិតពីបាតស្ទឹងដល់បាតធ្នឹមក្រោមស្ពាន) ទទឹងស្ពានទាំងសងខាងមានប្រវែង១០ម និងចំណុចកណ្តាលសងខាង នៃស្ពានមានទីធ្លាសម្រាប់សំចតថតរូបអនុស្សាវរីយ៍មានទទឹងសរុប១៥ម(ក្នុងប្រវែងសរុប១០ម ពង្រីកម្ខាង ២,៥ម) ។
តាមរយៈគម្រោងផ្លូវជាតិលេខ១០ និងស្ពានខ្ពស់ជាងគេនេះដែរ នឹងជំរុញឱ្យខេត្តរបស់កម្ពុជាដែលស្ថិតនៅជាប់ព្រំដែនថៃ កាន់តែខិតជិតគ្នា ដោយកាលពីមុនខេត្តទាំងនេះ រួមមានបាត់ដំបង ពោធិ៍សាត់ និងកោះកុង មិនមានផ្លូវតភ្ជាប់ ដូច្នេះរាល់ការធ្វើដំណើរទៅវិញទៅមក ប្រើពេលយូរ និងចំណាយច្រើន ប៉ុន្តែឆាប់ៗនេះ ពលរដ្ឋអាចធ្វើដំណើរទៅមកដោយងាយស្រួលនិងឆាប់រហ័ស ។
ក្រៅពីគម្រោងផ្លូវជាតិលេខ១០ ដែលកំពុងសាងសង់ និងកាន់តែជិតរួចរាល់ ខេត្តកោះកុងក៏មានផ្លូវមួយខ្សែទៀតកំពុងសាងសង់ និងជិតរួចរាល់ដូចគ្នាគឺផ្លូវជាតិលេខ៤៨ តភ្ជាប់ពីផ្លូវជាតិលេខ៤ ត្រង់ចំណុចផ្លូវបំបែកស្រែអំបិល ទៅកាន់ទីរួមខេត្តកោះកុង ។ ផ្លូវនេះនឹងអាចនាំភ្ញៀវទេសចរ និងវិនិយោគិនទាំងក្នុង និងក្រៅប្រទេសទៅកាន់ខេត្តកោះកុងបន្ថែមទៀតផងដែរ ៕
Account
Security
Favourite Content