សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ចាប់តាំងពីកម្ពុជា ក៏ដូចជាពិភពលោកបានជួបប្រទះបញ្ហាវិបត្តិកូវីដ១៩ និងបញ្ហាសេដ្ឋកិច្ចនោះ មានគម្រោងអភិវឌ្ឍន៍អចលនទ្រព្យជាច្រើនបានជួបប្រទះនឹងបញ្ហា ខណៈគិតត្រឹមថ្ងៃទី២២ ខែសីហា ឆ្នាំ២០២៤នេះ ក្រសួងរៀបចំដែនដី នគរូបនីយកម្ម និងសំណង់ បានដោះស្រាយគម្រោងអភិវឌ្ឍន៍ដែលមានបញ្ហាបានចំនួន ៩ គម្រោងហើយក្នុងចំណោមគម្រោងជួបបញ្ហាទាំងអស់ចំនួន៣៧ និងកំពុងពន្លឿនការដោះស្រាយជាបន្តបន្ទាប់ ។ នេះបើតាមប្រសាសន៍សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងសេចក្ដីថ្លែងការណ៍ពិសេសកាលពីរាត្រីថ្ងៃទី២២ ខែសីហា ឆ្នាំ២០២៤ ។
សម្ដេចមហាបវរធិបតី ហ៊ុន ម៉ាណែត បានមានប្រសាសន៍ថា តាមរយៈក្រសួងរៀបចំដែនដី នគរូបនីយកម្ម និងសំណង់ បាន និងកំពុងខិតខំសម្របសម្រួលដោះស្រាយគម្រោងអភិវឌ្ឍន៍អចលនទ្រព្យដែលកំពុងមានបញ្ហា ដោយឈរលើគោលការណ៍ សម្របសម្រួល និងច្បាប់ ដើម្បីស្វែងរកច្រកចេញក្នុងគ្រាលំបាក និងស្របតាមយុទ្ធសាស្ត្រឈ្នះឈ្នះ ។ ជាក់ស្ដែងក្នុងចំណោមគម្រោងដែលកំពុងមានបញ្ហា ៣៧ គម្រោង ក្រសួងបានបញ្ចប់នីតិវិធីនូវកម្រិតក្រសួង បានចំនួន ៩គម្រោង និងបន្តដោះស្រាយគម្រោងដែលនៅសេសសល់ ។
សម្ដេចធិបតី ក៏បានថ្លែងអំណរគុណដល់ភាគីពាក់ព័ន្ធ ដែលរួមមានម្ចាស់បុរី ម្ចាស់បំណុល និងអតិថិជន ដែលបានផ្ដល់ការយោគយល់ និងសហការជាមួយក្រសួងរៀបចំដែនដី នគរូបនីយកម្ម និងសំណង់ ដើម្បីព្យាយាមសម្របសម្រួលដោះស្រាយបញ្ហានេះ ហើយក៏សូមឱ្យគ្រប់ភាគីទាំងអស់បន្តចូលរួមដើម្បីដោះស្រាយបញ្ចប់បានឆាប់ៗនៅពេលខាងមុខ ។
ជាការកត់សម្គាល់ ក្នុងរយៈពេលចុងក្រោយនេះ ជាពិសេសចាប់តាំងពីដើមឆ្នាំ២០២៤ គេតែងសង្កេតឃើញក្រសួងរៀបចំដែនដី នគរូបនីយកម្ម និងសំណង់ ប្រកាសអញ្ជើញអតិថិជនដែលបានទិញលំនៅឋានរបស់គម្រោងអភិវឌ្ឍន៍ដែលមានបញ្ហាមកចូលរួមដោះស្រាយនៅក្នុងក្រសួង ហើយជាលទ្ធផល គម្រោងជាច្រើនត្រូវបានដោះស្រាយចប់សព្វគ្រប់ជាស្ថាពរ ហើយក្រសួងក៏បាន និងកំពុងបន្តដោះស្រាយបញ្ហាជាបន្តបន្ទាប់ចំពោះគម្រោងដែលមានបញ្ហាជាមួយអតិថិជន ។
ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានថ្លែងកោតសរសើរចំពោះក្រុមការងារដោះស្រាយវិវាទរបស់ក្រសួងរៀបចំដែនដី នគរូបនីយកម្ម និងសំណង់ ដែលបានព្យាយាមដោះស្រាយបញ្ចប់បញ្ហាជាបន្តបន្ទាប់ ដូចជា បញ្ហារវាងអតិថិជន និងបុរីពិភពថ្មី, បញ្ហារវាងអតិថិជន និងគម្រោងរបស់បុរីខេភី ម៉នដានី រួមជាមួយនឹងបញ្ហារវាងអតិថិជន និងគម្រោងរបស់បុរី VIP ជាដើម ។
គួរបញ្ជាក់ថា ក្រៅពីការដោះស្រាយបញ្ហាគម្រោងអភិវឌ្ឍន៍អចលនទ្រព្យដែលបានបន្សល់ក្នុងអំឡុងវិបត្តិកូវីដ១៩ និងវិបត្តិសេដ្ឋកិច្ចសកល ក្រសួងរៀបចំដែនដី នគរូបនីយកម្ម និងសំណង់ ក៏បានដោះស្រាយនូវបញ្ហាទំនាស់ដីធ្លីរ៉ាំរ៉ៃ ដែលបានកើតឡើងតាំងពីយូរយាណាស់មកហើយ និងបានដោះស្រាយរួចរាល់រាប់ពាន់ករណីមកហើយ និងបន្តដោះស្រាយបន្ថែមទៀត ដើម្បីបញ្ចប់នៅពេលឆាប់ៗ ។ ទន្ទឹមនឹងនេះក្រសួងក៏នឹងពន្លឿនការវាស់វែង និងចុះបញ្ជីដីធ្លីទូទាំងប្រទេសឱ្យបានចប់សព្វគ្រប់ទាំងជាង ៧លានក្បាលដីនៅមុនឆ្នាំ២០៣០ខាងមុខនេះផងដែរ ៕
Account
Security
Favourite Content