សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ បានដាក់ចេញនូវសមរភូមិចំនួន៥ សម្រាប់បេសកកម្មរបស់ខ្លួននៅឆ្នាំ២០២៦ និងឆ្នាំបន្តបន្ទាប់ ដែលសមរភូមិទាំង៥នេះ មានគោលដៅគាំទ្រ និងលើកទឹកចិត្តដល់វិស័យឯកជន ។ នេះបើតាមរបាយការណ៍របស់ក្រសួង ស្ដីពីការរួមចំណែកលើកកម្ពស់បរិយាកាសវិនិយោគ និងការងារនៅកម្ពុជា ។
នៅក្នុងរបាយការណ៍របស់ក្រសួងដែនដីបានបង្ហាញពីសមរភូមិទាំង៥ ដែលនឹងត្រូវអនុវត្តបន្ត រួមមាន ការចុះបញ្ជីដីបង្ហើយ និងបរិយាកាសគ្មានវិវាទ ការផ្ដល់សេវាគាប់ចិត្ត ការសម្របសម្រួលកម្ចីក្នុងវិស័យអចលនទ្រព្យ ការកសាងផែនការរៀបចំដែនដី និងការរៀបចំលិខិតបទដ្ឋានគតិយុត្ត ។
សម្រាប់សមរភូមិនៃការចុះបញ្ជីដីបង្ហើយ និងបរិយាកាសគ្មានវិវាទ ត្រូវបានដាក់ឱ្យអនុវត្ត សំដៅធានាសុវត្ថិភាពនៃការកាន់កាប់ដីធ្លី ផ្ដល់ទុនដល់ប្រជាពលរដ្ឋ បង្កើតបរិយាកាសវិជ្ជមានដល់ការវិនិយោគ និងបង្កើតបរិយាកាសគ្មានវិវាទនៅកម្ពុជា ។ ជាក់ស្ដែង គិតត្រឹមចុងឆ្នាំ២០២៥ ក្រសួងបានវាស់វែងក្បាលដីរួចរាល់ទាំងស្រុង និងបានចេញបណ្ណកម្មសិទ្ធិសរុប ៩លានក្បាលដី ចេញវិញ្ញាបនបត្រអគារសហកម្មសិទ្ធិប្រមាណ ៨ម៉ឺនចំណែកឯកជន ក្នុងនោះ ជនបរទេសកាន់កាប់ប្រមាណ ៩ពាន់ចំណែកឯកជន ។ ទន្ទឹមនេះ ក៏បានដោះស្រាយវវាទដីធ្លីនៅសល់ក្រោម ៥០ករណី ហើយបានដោះស្រាយវិវាទបុរីចំនួន ១១៥គម្រោង ក្នុងចំណោមគម្រោង១៧៧គម្រោង ។ ជាមួយគ្នានេះដែរ ក្រសួងក៏បាន និងកំពុងដោះស្រាយសំណង់ចាស់ទ្រុឌទ្រោមចំនួន២១ទីតាំង និងសំណង់មិនរៀបរយសរុបចំនួន ៣ ២៣៧ខ្នងផ្ទះផងដែរ ។
សមរភូមិទី២ គឺការផ្ដល់សេវាគាប់ចិត្ត ដោយក្រសួងរៀបចំដែនដី បានផ្ដល់សេវាសាធារណៈតាមប្រព័ន្ធអនឡាញ ដើម្បីផ្ដល់ភាពងាយស្រួល ឆាប់រហ័ស ចំណាយតិច ហើយបានកែសម្រួលបែបបទ និងនីតិវិធីក្នុងការចុះបញ្ជីដីបន្ត ព្រមជាមួយនឹងការសម្រួលនីតិវិធីពាក់ព័ន្ធនឹងក្បាលដីចុះបញ្ជីដីធ្លីមានលក្ខណៈជាប្រព័ន្ធដែលជាប់ពន្ធសូន្យ ។ ក្រៅពីនោះ ក្រសួងក៏បានសម្រួលនីតិវិធីក្នុងការស្នើសុំសាងសង់លើករណីកំណត់ធ្លាគម្លាតអគារ និងការសាងសង់លើក្បាលដីមួយ ឬច្រើន ដែលមានរូបភាពប្រើប្រាស់ដីកសិកម្ម ។
ដោយឡែក សមរភូមិទី៣ របស់ក្រសួងដែនដី គឺការសម្របសម្រួលកម្ចីក្នុងវិស័យអចលនទ្រព្យ ដោយក្រសួងបានសម្របសម្រួលជាមួយធនាគារ ដើម្បីបន្ទាបអត្រាការប្រាក់កម្ចីទិញផ្ទះ និងកំពុងសម្របសម្រួលជាមួយធនាគារដៃគូ ដើម្បីបន្ទាបអត្រាការប្រាក់កម្ចីអាជីវកម្មផងដែរ ។ ទន្ទឹមនេះដែរ ក្រសួងក៏បាន និងកំពុងសម្របសម្រួលជាមួយភាគីពាក់ព័ន្ធ ដើម្បីសិក្សាសមិទ្ធិលទ្ធភាពក្នុងការរៀបចំឥណទានឡើងវិញជូនដល់អតិថិជនទិញផ្ទះ និងខុដូ ។
ក្នុងរបាយការណ៍របស់ក្រសួងដែនដីដដែល ក៏បានបង្ហាញខ្លឹមសារសំខាន់ៗនៃសមរភូមិទី៤ គឺការកសាងផែនការរៀបចំដែនដី ដែលផែនការនេះសំដៅធានាដល់ការអភិវឌ្ឍនៅមូលដ្ឋាន និងការប្រើប្រាស់ធនធានធម្មជាតិ ការប្រើប្រាស់ដីឱ្យបានស្របតាមសក្ដានុពលរបស់ដីប្រកបដោយតម្លាភាព និងប្រសិទ្ធភាព ។ បន្ថែមពីនេះ ក្រសួងក៏បានរៀបចំនូវប្លង់គោលប្រើប្រាស់ដីរាជធានីភ្នំពេញ និងផែនការរៀបចំដែនដីខេត្ត រៀបចំប្លង់គោលប្រើប្រាស់ដីថ្នាក់ក្រុង ស្រុក ខណ្ឌ និងទីប្រជុំជន ផែនការប្រើប្រាស់ដីថ្នាក់ឃុំ សង្កាត់ និងកំពុងរៀបចំផែនការប្រើប្រាស់ដីតំបន់អង្គរ រួមទាំងតំបន់ជុំវិញបឹងទន្លេសាបផងដែរ។ ដោយឡែក ការរៀបចំលិខិតបទដ្ឋានគតិយុត្តដែលពាក់ព័ន្ធនានា ក៏ជាចំណុចសំខាន់ដែលក្រសួងរៀបចំដែនដី នគរូបនីយកម្ម និងសំណង់ យកចិត្តទុកដាក់ជាអាទិភាព ដែលស្ថិតនៅក្នុងសមរភូមិទី៥ ។
គ្រប់ចំណុចសំខាន់ដូចដែលបានលើកយកមកបង្ហាញជូនខាងលើនេះ សុទ្ធតែទទួលបានការសារទរពីសំណាក់ប្រជាពលរដ្ឋគ្រប់លំដាប់ថ្នាក់នៅទូទាំងប្រទេស ដែលក្រៅពីជៀសផុតពីវិវាទ ថែមទាំងបង្កើនទំនុកចិត្តទៅលើការវិនិយោគពីវិស័យឯកជនទៀតផង៕
Account
Security
Favourite Content