សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងសាងសង់ស្ពានមិត្តភាពកម្ពុជា-ចិន មេគង្គ ក្រចេះ និងផ្លូវតភ្ជាប់ទៅកាន់ក្រុងក្រចេះ ខេត្តក្រចេះ ក្នុងតម្លៃទឹកប្រាក់សរុបប្រមាណជាង ១១១លានដុល្លារអាម៉េរិក គិតមកដល់ដើមខែកញ្ញា ២០២៥នេះ សម្រេចបានប្រមាណជាង ៨៧ភាគរយហើយ ។ នេះបើតាមសេចក្ដីប្រកាសព័ត៌មានរបស់ក្រសួងសាធារណការ និងដឹកជញ្ជូន នៅថ្ងៃទី០៨ ខែកញ្ញា ឆ្នាំ២០២៥ ។
បើតាមក្រសួងសាធារណការ និងដឹកជញ្ជូនបានបញ្ជាក់ថា គម្រោងសាងសង់ស្ពានឆ្លងកាត់ទន្លេមេគង្គ ក្នុងខេត្តក្រចេះនេះ សម្រេចប្រមាណ៩៨,១៣ភាគរយ ខណៈគម្រោងទាំងមូល និងផ្លូវតភ្ជាប់ទៅកាន់ក្រុងក្រចេះ សម្រេចបាន៨៧,១៣ភាគរយ ។
ទន្ទឹមនឹងស្ពានសម្រេចការសាងសង់ស្ទើរតែ១០០ភាគរយ ក្រសួងសាធារណការ និងដឹកជញ្ជូន និងរដ្ឋបាលខេត្តក្រចេះ បានសម្រេចបើកឱ្យពលរដ្ឋធ្វើដំណើរជាបណ្ដោះអាសន្នរយៈពេល២១ថ្ងៃ ក្នុងឱកាសបុណ្យភ្ជុំបិណ្ឌ ចាប់ពីថ្ងៃទី០៨ ដល់ថ្ងៃទី២៨ ខែកញ្ញា ឆ្នាំ២០២៥ ដើម្បីសម្រួលដល់ធ្វើដំណើរក្នុងឱកាសពិធីបុណ្យប្រពៃណីជាតិ ។ ការបើកឱ្យដំណើរឆ្លងកាត់ស្ពានមិត្តភាពកម្ពុជា-ចិនមេគង្គក្រចេះនេះ សម្រាប់តែអ្នកថ្មើរជើង ទោចក្រយានយន្ត(ម៉ូតូ) រថយន្តធុនតូច និងរថយន្តទេសចរណ៍ដែលមានចំណុះ១២កៅអីចុះ ។
ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងថា ស្ពានមិត្តភាពកម្ពុជា-ចិន មេគង្គក្រចេះ បានបើកការដ្ឋានសាងសង់កាលពីថ្ងៃទី០២ ខែមករា ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់របស់សម្តេចតេជោ ហ៊ុន សែន អតីតនាយករដ្ឋមន្ត្រី និងឯកឧត្តម វ៉ាង វិនធៀន អតីតឯកអគ្គរដ្ឋទូតចិនប្រចាំកម្ពុជា ។ ស្ពាននេះ មានទីតាំងត្រើយខាងកើតស្ថិតនៅត្រង់ភូមិតាលុស ឃុំបុសលាវ ស្រុកចិត្របុរី និងត្រើយខាងលិច ស្ថិតនៅត្រង់ភូមិថ្មរាប ឃុំព្រែកប្រសព្វ ស្រុកព្រែកប្រសព្វ។
ឯកឧត្តមបន្តថា ស្ពាននេះស្ថាបនាឡើងមានមុខកាត់ទទឹងជាង ១៣ម៉ែត្រ មានគន្លងផ្លូវសម្រាប់រថយន្តចរាចរណ៍ចំនួន ២គន្លងទៅ-មក ,គន្លងផ្លូវសម្រាប់ទោចក្រយានចំនួន២គន្លងទៅ-មក និងផ្លូវថ្មើរជើងចំនួន ២គន្លងទៅ-មក ប្រវែង ១ម៉ែត្រ និងបង្កាន់ដៃស្ពានសងខាង។ ផ្លូវតភ្ជាប់មានប្រវែងជិត ៣២គីឡូម៉ែត្រ រួមមាន៖ ផ្លូវតភ្ជាប់ពីក្បាល ស្ពានមានប្រវែងជាង ១៥គីឡូម៉ែត្រ និងផ្លូវខ្នែងចំនួន ៤ខ្សែ នៅក្នុងក្រុងក្រចេះ មានប្រវែងជាង ១៦គីឡូម៉ែត្រ។ ខ្សែផ្លូវទាំងនេះសាងសង់ពង្រីក និងលើកកម្រិត គុណភាពដោយក្រាលបេតុងកៅស៊ូ(AC) កម្រាស់ ៧សង់ទីម៉ែត្រដូចគ្នា។ ក្នុងនោះកំណាត់ផ្លូវ ៤ខ្សែប្រវែងជិត ២៧គីឡូម៉ែត្រ ស្ថាបនាពង្រីកទទឹងចាប់ពី ៩ម៉ែត្រ រហូតដល់ ១៣ម៉ែត្រ លើតួផ្លូវចាប់ពី ១១ម៉ែត្រ រហូតដល់ជិត ២០ម៉ែត្រ និងកំណាត់ផ្លូវ១ខ្សែ ប្រវែងជាង ៥គីឡូម៉ែត្រ ពង្រីកទទឹង ១៩ម៉ែត្រ លើតួផ្លូវ ៣០ម៉ែត្រ ដែលមានគន្លងផ្លូវសម្រាប់រថយន្តធ្វើចរាចរណ៍ចំនួន ៤គន្លង ដែល២ទៅ ២មក ,គន្លងផ្លូវសម្រាប់ទោចក្រយានចំនួន ២គន្លង ដោយ១ទៅ ១មកនិងមានសួន ពុះទ្រូងផ្លូវនៅចំកណ្តាលប្រវែង ៤ម៉ែត្រផងដែរ ។
គួរបញ្ជាក់ថា ការសាងសង់ស្ពានឆ្លងទន្លេមេគង្គ ក្នុងខេត្តក្រចេះនេះ នឹងអាចទាក់ទាញនូវការវិនិយោគចូលទៅកាន់តំបន់ភូមិភាគឦសានបានមួយកម្រិតទៀត ស្របជាមួយនឹងរាជរដ្ឋាភិបាលក៏បាន និងកំពុងអនុវត្តកម្មវិធីពិសេសជំរុញការវិនិយោគខេត្តទាំងបួនក្នុងភូមិភាគឦសានដែលរួមមានខេត្តរតនគិរី មណ្ឌលគិរី ស្ទឹងត្រែង និងក្រចេះ ។
សម្រាប់ខេត្តក្រចេះ មានគម្រោងធំមួយដែលក្រុមការងារជំរុញការវិនិយោគខេត្តភូមិភាគឦសានកំពុងពិនិត្យគឺគម្រោងសាងសង់កំពង់ផែពហុបំណង ក្នុងស្រុកព្រែកប្រសព្វ ដែលមានទុនវិនិយោគប្រមាណ៣៥លានដុល្លារអាមេរិក ។ គម្រោងនេះអាចជួយសម្រួលដល់ការដឹកជញ្ជូនកសិផលរបស់កសិករក្នុងតំបន់ទៅចែកចាយនៅលើទីផ្សារទាំងក្នុងស្រុក និងអន្តរជាតិផងដែរ ៕
Account
Security
Favourite Content