បរទេស៖ យោងតាមប្រភពព័ត៌មានពី Global Times បានរាយការណ៍ថា ពាណិជ្ជកម្មចិនជាមួយនឹងប្រទេសដទៃផ្សេងទៀតនៅតែមានសកម្មភាពមមាញឹកបើទោះបីជាមានការគំរាមកំហែងពីអត្រាពន្ធគយរបស់ប្រធានាធិបតីអាម៉េរិក Donald Trump ក៏ដោយ។

កាលពីថ្ងៃចន្ទ សប្ដាហ៍នេះ រដ្ឋបាលគយចិន (GAC) បានបង្ហាញថា ក្នុងរយៈពេល ៥ខែដំបូងក្នុងឆ្នាំ២០២៥ ពាណិជ្ជកម្មចិនជាមួយនឹងបរទេសបានកើនឡើង ៣,៥% បើធៀបនឹងរយៈពេលដូចគ្នាកាលពីឆ្នាំមុន ជាមួយនឹងការនាំចូល និងការនាំចេញសរុបឈានដល់ ២៩,៥៧ ទ្រីលានយ័ន (៤,១៤ ទ្រីលានដុល្លារ)។ ដោយឡែក ត្រឹមតែក្នុងចន្លោះខែមិថុនា​ និងខែសីហា ការនាំចេញបានកើនឡើង ៤,៨% ខណៈពេលដែលការនាំចូលបានកើនឡើង ១,៧%។

លោក Lü Daliang ប្រធាននាយកដ្ឋានស្ថិតិ និងការវិភាគរបស់ GAC បានលើកឡើងថា បើទោះបីជាមានសម្ពាធពីបរិយាកាសខាងក្រៅក៏ដោយ ពាណិជ្ជកម្មចិនជាមួយនឹងបរទេសនៅតែមានភាពធន់ និងកាន់តែមានសក្តានុពល ដោយសារមានការគាំទ្រគោលនយោបាយ ការច្នៃប្រឌិត និងការធ្វើពិពិធកម្មទីផ្សារឲ្យមានភាពចម្រុះ។ ការនេះបញ្ជាក់ថា គុណសម្បត្តិនៃប្រព័ន្ធឧស្សាហកម្មរបស់ចិននៅតែបន្តទទួលបានការទទួលស្គាល់ពីទីផ្សារអន្តរជាតិស្របពេលបរិយាកាសសេដ្ឋកិច្ចពិភពលោកកំពុងមានភាពមិនច្បាស់លាស់។ មិនត្រឹមតែប៉ុណ្ណោះ  ប្រទេសនានាកំពុងពង្រីកការនាំចូលយ៉ាងសកម្មពីប្រទេសចិន ជាពិសេសទំនិញអេឡិចត្រូនិក និងផលិតផលបច្ចេកវិទ្យាកម្រិតខ្ពស់ ដើម្បីបំពេញតម្រូវការសម្រាប់កិច្ចអភិវឌ្ឍសេដ្ឋកិច្ចរបស់ពួកគេ។ ជាក់ស្ដែង ក្នុងរយៈពេល ៨ខែដំបូង ការនាំចេញភាគច្រើនគឺផ្តោតលើផលិតផលគ្រឿងម៉ាស៊ីន និងអគ្គិសនី ដែលមានចំណែកប្រហែល ៦០,២% នៃការនាំចេញសរុបរបស់ចិន។ បន្ថែមពីនេះ ការនាំចេញឧបករណ៍ និងគ្រឿងបន្លាស់សម្រាប់បចេ្ចកវិទ្យាបានកើនឡើង ០,៦%,  សៀគ្វី អ៊ីសេ បានកើនឡើង ២៣,៣%, និងការនាំចេញយានយន្តកើនឡើង ១១,៩%។ ជាមួយគ្នានេះ ការពន្លឿនលំហូរការនាំចេញគ្រឿងម៉ាស៊ីន និងផលិតផលបច្ចេកវិទ្យាកម្រិតខ្ពស់បានបញ្ជាក់ពីការកែលម្អបន្ថែមទៀតនៃរចនាសម្ព័ន្ធពាណិជ្ជកម្មចិនជាមួយនឹងបរទេស និងភាពធន់នៃវិស័យផលិតកម្មរបស់ខ្លួន ដែលជួយក្រុមហ៊ុនផ្តោតលើការនាំចេញសម្របខ្លួននឹងបញ្ហាប្រឈមខាងក្រៅ។

ស្របពេលជាមួយគ្នានេះ អាស៊ាន ក៏នៅតែរក្សាជំហររបស់ខ្លួនក្នុងនាមជាដៃគូពាណិជ្ជកម្មធំបំផុតរបស់ចិន ដោយទំហំពាណិជ្ជកម្មទ្វេភាគីបានកើនឡើង ៩,៧% ធៀបនឹងរយៈពេលដូចគ្នាកាលពីឆ្នាំ២០២៤ ដែលមានចំណែក ១៦,៧% នៃពាណិជ្ជកម្មបរទេសសរុបរបស់ចិន។ សហភាពអឺរ៉ុបជាប់ចំណាត់ថ្នាក់ទី២ ជាមួយនឹងពាណិជ្ជកម្មកើនឡើង ៤,៣% ធៀបនឹងឆ្នាំមុន ដែលមានចំណែក ១៣,‌១% នៃតម្លៃពាណិជ្ជកម្មបរទេសសរុបរបស់ចិន។ អាម៉េរិកជាប់ចំណាត់ថា្នក់ទី ៣ ដែលចំណែក ៩,២% នៃតម្លៃពាណិជ្ជកម្មបរទេសសរុបរបស់ចិន ដោយសារពាណិជ្ជកម្មទ្វេភាគីធ្លាក់ចុះ ១៣,៥% ធៀបនឹងឆ្នាំមុន។ មិនត្រឹមតែប៉ុណ្ណោះ ពាណិជ្ជកម្មរបស់ចិនជាមួយបណ្តាប្រទេសដែលចូលរួមក្នុងគំនិតផ្តួចផ្តើមខ្សែក្រវាត់ និងផ្លូវ បានឈានដល់ ១៥,៣ ទ្រីលានយ័ន (២,១៤ ទ្រីលានដុល្លារ) កើនឡើង ៥,៤% ធៀបនឹងឆ្នាំមុន។

លោក Yu Xiangrong ប្រធានសេដ្ឋវិទូនៃក្រុមហ៊ុន Citigroup China បានលើកឡើងថា ភាពប្រកួតប្រជែង និងភាពធន់នៃវិស័យនាំចេញរបស់ចិនមិនអាចមើលស្រាលបានទេ ខណៈដែលទំនិញរបស់ចិនមានតម្លៃសមរម្យជាមួយនឹងគុណភាពខ្ពស់ និងប្រកបដោយភាពច្នៃប្រឌិត និងការធ្វើឱ្យប្រសើរឡើងជាបន្តបន្ទាប់ និងកាន់តែមានភាពទាក់ទាញនៅក្នុងទីផ្សារអន្តរជាតិ។ លើសពីនេះ សហគ្រាសចិនមួយចំនួនបានខិតខំពង្រីកខ្លួននៅក្រៅប្រទេស ធ្វើឲ្យខ្សែសង្វាក់ផលិតកម្មឧស្សាហកម្មរបស់ចិនកាន់តែរឺកចម្រើន។ ជាមួយគ្នានេះ បណ្តាញនាំចេញរបស់ចិនត្រូវបានធ្វើពិពិធកម្មដែលមានលក្ខណៈចម្រុះ ជួយជំរុញឲ្យការនាំចេញរបស់ក្រុមហ៊ុនចិនទៅកាន់ទ្វីបអាហ្រ្វិកមានការកើនឡើងក្នុងអត្រាលើសពី ៣០% នារយៈពេលប៉ុន្មានខែថ្មីៗនេះបើទោះបីជាអត្រាពន្ធគយដែលកំណត់ដោយសហរដ្ឋអាម៉េរិកមានអត្រាខ្ពស់ក៏ដោយ៕