សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាជរដ្ឋាភិបាលកម្ពុជា បានដាក់ចេញនូវកម្មវិធីផ្ដល់ដីការពារព្រៃ ដោយនឹងអាចចែកដីជូនដល់ពលរដ្ឋដែលមិនមានដីកម្មសិទ្ធិពិតប្រាកដសម្រាប់បង្កបង្កើនផល និងរស់នៅលើទីតាំងដីដែលរដ្ឋផ្ដល់ជូននោះ ហើយការផ្ដល់ជូននេះអាចនឹងចាប់ផ្ដើមទទួលពាក្យស្នើសុំពីពលរដ្ឋនៅក្នុងអំឡុងខែកុម្ភៈ ឆ្នាំ២០២៥ ខាងមុខនេះតទៅ ។
នៅក្នុងសេចក្ដីថ្លែងការណ៍ពិសេសរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា កាលពីល្ងាចថ្ងៃទី២៨ ខែមករា ឆ្នាំ២០២៥ បានមានប្រសាសន៍ថា កម្មវិធីផ្ដល់ដីការពារព្រៃរបស់រាជរដ្ឋាភិបាល មានគោលបំណងដោះស្រាយដីជូនប្រជាពលរដ្ឋខ្មែរក្រីក្រដែលគ្មានដីពិតប្រាកដ។ បន្ថែមពីលើនេះ កម្មវិធីនេះនឹងចូលរួមទប់ស្កាត់សកម្មភាពទន្ទ្រានដីរដ្ឋធ្វើជាកម្មសិទ្ធិឯកជន និងជំរុញការចូលរួមរបស់ប្រជាពលរដ្ឋក្នុងកិច្ចការពារ និងអភិរក្សព្រៃឈើ ។
សម្ដេចធិបតីបានរម្លឹកពីសាវតានៃការដោះស្រាយបញ្ហាកម្មសិទ្ធិឯកជនលើវិស័យដីធ្លីជូនប្រជាពលរដ្ឋថា សង្គ្រាមរាប់ទសវត្សរ៍នាអតីតកាល បានបំផ្លាញមិនត្រឹមតែអាយុជីវិតរបស់ប្រជាពលរដ្ឋខ្មែរស្លូតត្រង់រាប់លាននាក់ប៉ុណ្ណោះទេ ប៉ុន្តែថែមទាំងបំផ្លាញហេដ្ឋារចនាសម្ព័ន្ធរូបវ័ន្ត និងសង្គម ដូចជា ផ្លូវថ្នល់ សាលារៀន និងមន្ទីរពេទ្យ ព្រមទាំងធនធានមនុស្ស ជាពិសេស កម្មវិធីឯកជនលើដីធ្លី ត្រូវបានលុបបំបាត់ចោលទាំងស្រុងនៅក្នុងរបបប្រល័យពូជសាសន៍ប៉ុលពត ។ នៅក្រោយថ្ងៃ៧មករា ឆ្នាំ១៩៧៩ ក្រោមការដឹកនាំដ៏ត្រឹមត្រូវរបស់គណបក្សប្រជាជនកម្ពុជា រដ្ឋាភិបាលបានបែងចែកដីកសិកម្មលើកដំបូងនៅឆ្នាំ ១៩៨៥ និងទទួលស្គាល់កម្មសិទ្ធិឯកជនលើដីលំនៅឋានក្នុងឆ្នាំ១៩៨៩ ។
សម្ដេចធិបតីបានបន្តថា បន្ថែមពីលើនេះ រដ្ឋាភិបាលក៏បានដាក់ចេញនូវគោលនយោបាយ និងបានផ្ដល់ដីជូនប្រជាពលរដ្ឋតាមកម្មវិធីជាដំណាក់កាលៗនាពេលកន្លងមកដែលរួមមាន ទី១ គឺកម្មវិធីផ្ដល់ដីជូនប្រជាពលរដ្ឋធ្វើមាតុភូមិនិវត្តន៍ពីជាយដែនកម្ពុជាថៃ នៅឆ្នាំ១៩៩១ ដល់ឆ្នាំ១៩៩៣ , ទី២គឺ ផ្ដល់ដីជូនអតីតកម្លាំងខ្មែរក្រហមដែលធ្វើសមាហរណកម្មនៅឆ្នាំ១៩៩៨ , ទី៣ គឺកម្មវិធីប្រទានកម្មដីរដ្ឋជូនប្រជាពលរដ្ឋតាមការអនុវត្តបទបញ្ជា០១ ដែលហៅថា បប០១ នៅឆ្នាំ២០១២ ប្រមាណ៦៤ម៉ឺនក្បាលដី ស្មើនឹងជាង ១លាន ២សែនហិកតា និងទី៤ គឺកម្មវិធីប្រធានដីរដ្ឋ តាមរយៈកម្មវិធីដីសម្បទានសង្គមកិច្ចជូនអតីតកងកម្លាំងប្រដាប់អាវុធ និងគ្រួសារកងទ័ព នគរបាលជាតិតាមព្រំដែន ព្រមទាំងប្រជាពលរដ្ឋក្រីក្រស៊ីវិលទូទៅ ចាប់ពីឆ្នាំ២០១៣ ដោយបានបែងចែកដីសរុបប្រមាណ ១លាន ៤សែនហិកតាសម្រាប់ប្រជាពលរដ្ឋសរុបជិត៤៩ម៉ឺនគ្រួសារ ។
សម្ដេចធិបតី ហ៊ុន ម៉ាណែត បានបន្ថែមថា រាជរដ្ឋាភិបាលនីតិកាលទី៧នៃរដ្ឋសភា ក៏បាន និងកំពុងបន្តយកចិត្តទុកដាក់លើការលើកកម្ពស់សិទ្ធិកាន់កាប់ដីធ្លីរបស់ប្រជាពលរដ្ឋ តាមរយៈការជំរុញការវាស់វែង ការចុះបញ្ជីដីធ្លី និងការចេញប័ណ្ណកម្មសិទ្ធិជូនប្រជាពលរដ្ឋក៏ដូចជាការបន្តផ្ដល់ដីសម្បទានសង្គមកិច្ចជូនអតីតកងកម្លាំងប្រដាប់អាវុធ និងគ្រួសារកងទ័ព នគរបាលជាតិនៅតាមព្រំដែន និងប្រជាពលរដ្ឋក្រីក្រ ។ ក្រៅពីកង្វះដីធ្លី បញ្ហាមួយចំនួនទៀតដូចជាការទន្ទ្រានដីរដ្ឋធ្វើជាកម្មសិទ្ធិឯកជន និងការបំផ្លាញធនធានធម្មជាតិ ក៏ចោទជាបញ្ហាដែលធ្វើឱ្យរាជរដ្ឋាភិបាលត្រូវដាក់ចេញនូវវិធានការជាបន្តបន្ទាប់ដើម្បីទប់ស្កាត់។
សម្ដេចធិបតីក៏បានបញ្ជាក់ផងដែរថា ដើម្បីឱ្យការអនុវត្តកម្មវិធីនេះទទួលបានជោគជ័យ រាជរដ្ឋាភិបាលបានបង្កើតគណៈកម្មការជាតិដឹកនាំ អនុវត្តន៍កម្មវិធីផ្ដល់ដីការពារព្រៃ ដើម្បីរួមគ្នាអភិវឌ្ឍន៍ដោយចីរភាពដែលហៅកាត់ថា ( ផកអ ) ដោយមានលេខាធិការដ្ឋានមួយជាសេនាធិការ ហើយចំពោះនីតិវិធី និងទីកន្លែងដាក់ពាក្យស្នើសុំ ព្រមទាំងលក្ខណៈសម្បត្តិគ្រប់គ្រាន់ក្នុងការស្នើសុំដី លេខាធិការដ្ឋាននឹងចាប់ផ្ដើមជូនដំណឹងជាបន្តបន្ទាប់នាពេលឆាប់ៗ ដែលអាចនឹងចាប់ផ្ដើមទទួលពាក្យស្នើសុំរបស់ប្រជាពលដ្ឋចាប់ពីខែកុម្ភៈ ឆ្នាំ ២០២៥ខាងមុខនេះតទៅ ។
យ៉ាងណាក្ដី សម្រាប់នីតិវិធី និងទីតាំងដាក់ពាក្យស្នើសុំដីពីរាជរដ្ឋាភិបាល ខាង AMS Economy នឹងលើកយកមកបង្ហាញជូននាពេលបន្ទាប់ ក្រោយមានការបញ្ជាក់ច្បាស់ភាគីរាជរដ្ឋាភិបាល ឬគណៈកម្មការជាតិដឹកនាំអនុវត្តន៍ ដើម្បីផ្ដល់ដីការពារព្រៃ ៕
Account
Security
Favourite Content