ភ្នំពេញ ៖ កំណើននៃអ្នកទិញផ្ទះ​បង់រំលស់​នៅក្នុងប្រទេ​សកម្ពុជា​បានកើនឡើ​ងខ្លាំង​ក្នុ​ងអំឡុង​មុនពេល​នៃ​វិបត្តិ​​កូវីដ​១៩ ពោលគឺនៅមុនឆ្នាំ២០២០​ ក្នុងគ្រាដែលសេដ្ឋកិច្ច​កម្ពុជាកំពុង​មានសន្ទុះកើនខ្លាំង ពោលគឺពល​រដ្ឋ​​ងាយស្រួលក្នុងកា​ររកបានចំណូលដែលធ្វើឱ្យ​សន្ទុះនៃការទិញផ្ទះបង់រំលស់កើនឡើង ប៉ុន្តែក្នុងនោះមានពលរដ្ឋ​មួយ​ចំនួនធំ​​មិន​បាន​សិក្សា​​​លំអិត​ពីចរន្តហិរញ្ញវត្ថុ​ឱ្យបានច្បាស់​ ហើយ​ភាគ​ច្រើន​ទិ​ញជា​មួយ​បុរី​​ដោយ​ការ​រំលស់​សុទ្ធ​។​

ការទិញផ្ទះបង់រំលស់​ជាមួយបុរី មិនមានភាពស្មុគ្រស្មាញសម្រាប់អតិថិជន​នោះទេ ដោយអតិថិ​ជនគ្រាន់តែ​កា​ន់​អ​​ត្ត​សញ្ញា​ណបណ្ណមួយសន្លឹក ​​និងមានប្រាក់​បង់ប្រចាំខែ​នោះបុរីនឹង​ធ្វើកិច្ច​សន្យា​ភ្លាម​ ​ហើយក៏ចាប់ផ្ដើម​គិតការ​ប្រាក់ពីអតិថិជន​ភ្លាម ទាំង​ដែលផ្ទះនោះមិនទាន់បានសាងសង់នៅឡើយ ។ ការទិញផ្ទះបង់រំលស់​ជាមួយបុរីផ្ទាល់​មានអត្រាការ​ប្រាក់ខ្ពស់ជាង​ធនាគារ ដោយ​បុរីខ្លះមានអត្រា​ការប្រាក់ដល់ទៅ១ភាគរយ​ក្នុងមួយខែ ខ្លះទាប​ជាង​នេះ ប៉ុន្តែជាទូទៅ​គឺ​១ភាគរយ​​​ ខណៈធនាគារ​បានផ្ដល់​ប្រាក់កម្ចីសម្រាប់ទិញផ្ទះ គិតអត្រា​ការ​ប្រាក់​ត្រឹម​តែ ៧ ទៅ ៩ភាគរយប៉ុណ្ណោះក្នុងមួយឆ្នាំ  ដែល​មានន័យថា ក្នុង​មួយខែការប្រាក់មិនដល់​១ភាគរយ​នោះទេ ។

ការទិញផ្ទះ​ដោយមិនបានសិក្សា​លម្អិត​ពីហិរញ្ញវត្ថុ​ ចំណូល​និងចំណូល ធ្វើឱ្យ​ប្រឈមនឹងកត្តា​ជាច្រើន ជាក់​ស្ដែង​​កន្លងមកនេះមាន​ប្រជាពលរដ្ឋជាច្រើន​បានជួបប្រទះ​នឹង​បញ្ហា​ ដោយក្រុមហ៊ុន​រឹបអូស​ផ្ទះត្រ​លប់​ទៅ​វិ​ញ​​​ព្រោះតែមិនមាន​លទ្ធភាពបង់​ប្រចាំខែទៅក្រុមហ៊ុន​ដោយសារវិបត្តិសេដ្ឋកិច្ច ។​

ក្រុមហ៊ុនអភិវឌ្ឍន៍មិនបានខាត​នោះទេ គឺមានតែចំណេញលើចំណេញ​ក្នុងពេលដែលក្រុមហ៊ុន​រឹបអូស​ផ្ទះពីអតិ​ថិជ​ន ទី១​ ផ្ទះនោះ​អាច​លក់​ចេញវិញក្នុងតម្លៃដដែល ឬខ្ពស់​ជាង​តម្លៃដើម។ ឧទាហរណ៍ថា ផ្ទះនោះកាល​ពី​លក់​ឱ្យអតិថិជនទី១​ក្នុងតម្លៃ៥ម៉ឺនដុល្លារ ​​ហើយរឹបអូស​មកវិញ ​និងលក់​បន្ត​អាច​បាន​លើស​ពី៥ម៉ឺនដុល្លារអាមេរិក ។ ទី២ ប្រាក់ដែលអតិថិជន​បង់ទៅក្រុមហ៊ុន​ភាគច្រើនគឺជា​ការ​ប្រាក់​ បើទោះបី​ជា​ក្រុម​ហ៊ុន​យល់ព្រមឱ្យ​ប្រាក់​ទៅ​អតិថិជនវិញក៏​ឱ្យ​ប្រាក់ដើម​ប៉ុណ្ណោះ។ ឧទាហរណ៍ថា​​ អតិថិជនបង់​ប្រាក់អស់​៣០​ខែ​ដោ​យមួយខែ​៥០០​ដុល្លារ​អាមេរិក​ សរុបទាំងអស់១៥០០០ដុល្លារអាមេរិក។ ភាគច្រើននៃប្រាក់ ១៥ ០០០ដុល្លារ​នេះ គឺការ​ប្រាក់​ ហើយប្រាក់ដើមយ៉ាងច្រើនត្រឹម ២០០០ ទៅ ៣០០០ដុល្លារ​ប៉ុណ្ណោះ។​

កន្លងទៅនេះ ក៏មាន​ពលរដ្ឋ​ទិញផ្ទះក្នុង​បុរី​មួយ​តម្លៃ២០ម៉ឺនដុល្លារ​អាមេរិក ហើយ​បានបង់រំលស់​ជាច្រើនខែ សរុបជាទឹកប្រាក់១០​ម៉ឺនដុល្លារអាមេរិក តែ​អ្វីដែលភ្ញាក់​ផ្អើល​នោះ គឺប្រាក់ដើម​ដែល​បានបង់​មានត្រឹម​តែ ​៩ ០០០​​​ដុល្លារ​អាមេរិកប៉ុណ្ណោះ ហើយ​ ៩១ ០០០ដុល្លារទៀត​គឺជា​អត្រា​ការប្រាក់​ទាំងអស់។ នេះគឺជា​មេរៀន​សម្រាប់​​ពលរដ្ឋក្នុងការ​ពិចារណា​លើការ​ទិញផ្ទះបង់រំសល់ជាមួយក្រុមហ៊ុនអភិវឌ្ឍន៍​។

ត្រង់ចំណុចនេះ អ្នកជំនាញនៃវិស័យហិរញ្ញវត្ថុ​បានបង្ហាញពីការគណនា​ហិរញ្ញវត្ថុមុននឹង​សម្រេចចិត្តទិញផ្ទះ ដោយក្នុងនោះ អតិថិជនមិនគួរ​ទិញផ្ទះបង់រំលស់​ដោយចំណាយលើស​ពី៣០ភាគរយ​នៃប្រាក់ចំណូលប្រចាំខែនោះទេ។ អតិថិជនត្រូ​វចេះ​បែង​ចែកហិរញ្ញវត្ថុ​ដែលទទួលបានប្រចាំខែទៅលើផ្នែកផ្សេងទៀត ដូចជា​ថ្លៃហូប​ចុក ថ្លៃចំណាយ​ប្រចាំថ្ងៃ​ និង​សន្សំទុ​ក​មួយផ្នែក។ ប៉ុន្តែ​ពលរដ្ឋមួយចំនួនមិនសូវ​បានគិតគូរពីចំណុច​នេះ​ឡើយ ហើយទិញ​បង់​ប្រចាំខែ​ស្ទើរ​តែ​៧០ភាគរយ ៨០ភាគរយ​នៃប្រាក់ចំណូល​របស់ខ្លួនក៏មានដែរ ដូច្នេះហើយទើប​ធ្វើឱ្យ​អ្នកទិញ​ផ្ទះខ្លះ​បានប៉ុ​ន្មាន​ឆ្នាំ​ត្រូវ​ប្រគល់ផ្ទះទៅក្រុមហ៊ុនវិញ ខ្លះទៀត​មិនទាន់ទាំងបានផ្ទះស្នាក់​នៅផងក៏​ត្រូវ​បោះបង់​ការ​បង់​ប្រចាំខែ ដែល​ធ្វើឱ្យ​ខាត​ទាំងថវិកា​ និងពេលវេលា​ ចំណែកឯក្រុមហ៊ុនវិញមិនមាន​ខាតបង់នោះទេ ព្រោះប្រសិនបើអតិថិជន​មិនមានលទ្ធភាពបង់ ​ក្រុមហ៊ុនមានសិទ្ធិ​យកផ្ទះដាក់លក់​បន្តជាការ​ស្រេច៕