សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងរយៈពេលប៉ុន្មានថ្ងៃមកនេះ គេឃើញមានព័ត៌មានអំពីបញ្ហាជុំវិញនឹងអាជីវកម្មដីឡូត៍ដោយមានគម្រោងមួយចំនួនធ្វើឱ្យអតិថិជនដែលជាអ្នកទិញនោះ មិនពេញចិត្ត និងចេញមកតវ៉ាឱ្យអ្នកអភិវឌ្ឍន៍ដោះស្រាយបញ្ហាជូន ដូចជាគម្រោងខ្លះមានតែក្រដាសមិនមានដីពិតប្រាកដ ហើយគម្រោងខ្លះទៀតអ្នកលក់ផ្សេង ម្ចាស់ដីផ្សេង។ ថ្ងៃនេះ យើងនឹងបង្ហាញពីកត្តាមួយចំនួនដែលគួរយល់ដឹងមុននឹងសម្រេចចិត្តទិញដីឡូត៍ពីម្ចាស់គម្រោងណាមួយ ។
លោក ផូន សុអុនដែន ប្រធានផ្នែកលក់នៃគម្រោងអភិវឌ្ឍន៍អចលនទ្រព្យមួយនៅប៉ែកខាងលិចរាជធានីភ្នំពេញបានឱ្យដឹងថា កាលពីមុនទីផ្សារដីឡូត៍នៅក្នុងប្រទេសកម្ពុជា ជាពិសេសនៅតំបន់តាមបណ្ដោយផ្លូវ៥១គេឃើញថាមានកំណើនខ្ពស់ ហើយអតិថិជនជាច្រើនទាំងនៅរាជធានីភ្នំពេញ និងបណ្ដាខេត្តនានាសម្រុកទៅទិញយ៉ាងច្រើន ប៉ុន្តែមួយរយៈក្រោយមកគម្រោងអភិវឌ្ឍន៍ដីឡូត៍កាន់តែមានទីផ្សារចង្អៀតក្រោយមានការអភិវឌ្ឍកាន់តែច្រើនពីម្ចាស់គម្រោង។
លោកបន្តថា ៖
“តាមពិតទៅម្ចាស់គម្រោងអភិវឌ្ឍន៍ទាំងអស់មិនសុទ្ធតែល្អទាំងនោះទេ ហើយក៏មិនអាក្រក់នោះដែរ។ អតិថិជនមុននឹងសម្រេចចិត្តទិញដីឡូត៍ ឬក៏ទិញផ្ទះគួរតែសិក្សានូវចំណុចមួយចំនួនជាមុនសិន ក្នុងនោះត្រូវសិក្សាពីភាពស្របច្បាប់នៃគម្រោងអភិវឌ្ឍន៍នោះ ថាតើមានអាជ្ញាប័ណ្ណអភិវឌ្ឍន៍ដែរទេ និងមានអាជ្ញាបណ្ណធ្វើអាជីវកម្មដែរឬទេ។ ក្រៅពីនេះ ក៏ត្រូវសិក្សាពីកេរ្តិ៍ឈ្មោះរបស់ក្រុមហ៊ុននោះផងដែរ ថាតើក្រុមហ៊ុននោះមានប្រវត្តិយ៉ាងណា ធ្លាប់មានប្រវត្តិបោកអតិថិជន ឬធ្លាប់មានបញ្ហាជាមួយនឹងអតិថិជនដែរ ឬអត់”
លោកបន្ថែមថា ៖
“មុននឹងទិញដីឡូត៍ក៏ត្រូវសិក្សាមើលផងដែរពីការគាំទ្ររបស់អាជ្ញាធរក្នុងមូលដ្ឋានតាំងពីថ្នាក់ភូមិ ឃុំ និងស្រុក ។ បើសិនជាគម្រោងអភិវឌ្ឍន៍មិនមានការគាំទ្រពីអាជ្ញាធរទៅថ្ងៃខាងមុខអ្នកទិញដីឡូត៍នោះនឹងអាចមានបញ្ហាពិបាកក្នុងការអភិវឌ្ឍ។ អ្វីដែលពិសេស សូមមើលពីសក្ដានុពលនៃគម្រោងនោះ និងការអភិវឌ្ឍរបស់ម្ចាស់គម្រោង ដូចជាការអភិវឌ្ឍខាងក្នុង និងក្រៅគម្រោងទៅលើហេដ្ឋារចនាសម្ព័ន្ធ ហើយបើសិនជាបានដឹងពីចក្ខុវិស័យរបស់រដ្ឋក្នុងតំបន់ដែលយើងទិញដីនោះវារឹតតែប្រសើរថែមទៀតផង”
អ្នកអភិវឌ្ឍន៍គម្រោងដីឡូត៍លំហែ លោក ខូល័រ តាន់ ក៏បានបង្ហាញពីការព្រួយបារម្ភពីអាជីវកម្មមួយនេះ ដែលមានម្ចាស់គម្រោងខ្លះគាត់ផ្ដោតលើប្រាក់ចំណេញខ្លាំងពេក ដោយអភិវឌ្ឍន៍គ្រាន់តែបោះបង្គោលជាឡូត៍លក់យកលុយពីអតិថិជន ហើយក៏ដើរចេញដោយមិនគិតពីនិរន្តរភាព ដូចជាហេដ្ឋារចនាសម្ព័ន្ធទឹក ផ្លូវ ភ្លើងជាដើម ។ អាជីវកម្មដីឡូត៍អាចនឹងបាត់បង់ថ្ងៃណាមួយបើសិនជាអ្នកអភិវឌ្ឍន៍មិនគិតពីគុណភាពនៃគម្រោងរបស់ខ្លួន ។
លោកឧកញ៉ា សំ សុខនឿន ប្រធានសមាគមអចលនទ្រព្យសកលក៏បានបង្ហាញផងដែរថា ការអភិវឌ្ឍដីឡូត៍មែនទែនទៅគឺមិនសូវជាបានចូលរួមចំណែកក្នុងការអភិវឌ្ឍសេដ្ឋកិច្ចជាតិនោះទេ ផ្ទុយទៅវិញវាអាចនឹងធ្វើឱ្យតំបន់ដីឡូត៍ពិបាកក្នុងការអភិវឌ្ឍនៅពេលអនាគត ដោយសារតែតំបន់មួយមានម្ចាស់ច្រើន ហើយតំបន់នឹងអាចក្លាយជាតំបន់លំនៅដ្ឋានគ្មានសណ្តាប់ធ្នាប់ ខ្វះស្តង់ដារ និងអាណាធិបតេយ្យទៀតផង ៕
Account
Security
Favourite Content