សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងរយៈពេល៥ខែ ដើមឆ្នាំ២០២៥នេះ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគទូទាំងប្រទេសចំនួន២៩០គម្រោង ដែលមានទុនវិនិយោគចំនួន ៤,២ពាន់លានដុល្លារអាមេរិក ។ ក្នុងចំណោមគម្រោងវិនិយោគទាំង២៩០គម្រោងនោះឃើញថារាជធានី និងខេត្តចំនួន៦ក្នុងប្រទេសកម្ពុជា ទទួលបានការវិនិយោគច្រើនជាងគេ ។
បើតាមស្ថិតិទិន្នន័យរបស់ក្រុមប្រឹក្សាអភិវឌ្ឍន៍កម្ពុជាចេញផ្សាយនៅដើមខែមិថុនា ឆ្នាំ២០២៥កន្លងទៅនេះបានបង្ហាញឱ្យឃើញថា ខេត្តកំពង់ស្ពឺ ទទួលបានគម្រោងវិនិយោគច្រើនជាងគេ ដែលមានរហូតដល់ ៧២គម្រោង រីឯខេត្តស្វាយរៀង ទទួលបានគម្រោងច្រើនជាងគេបន្ទាប់ពីខេត្តកំពង់ស្ពឺ ។ សម្រាប់រាជធានីភ្នំពេញ ក៏ទទួលបានគម្រោងច្រើនជាងគេក្នុងចំណោមនោះដែរ ដោយទទួលបានចំនួន៣៤គម្រោង ខណៈខេត្តកោះកុងដែលស្ថិតនៅក្នុងតំបន់សមុទ្រទទួលបានចំនួន២៨គម្រោង ។
ដោយឡែក ខេត្តតាកែវ ដែលមានសក្ដានុពលខាងវិស័យឧស្សាហកម្មផងដែរនោះ ក៏ទទួលបានគម្រោងវិនិយោគលើសពី២០គម្រោង គឺមានរហូតដល់២៧គម្រោងឯណោះ ។ សម្រាប់ខេត្តព្រះសីហនុ ដែលជាខេត្តទទួលបានការលើកទឹកចិត្តពិសេសពីរាជរដ្ឋាភិបាលវិញ ក្នុងរយៈពេល៥ខែមកនេះ ទទួបានគម្រោងវិនិយោគចំនួន២៤ គម្រោងផងដែរ ។
ពាក់ព័ន្ធនឹងសក្ដានុពលនៅតាមបណ្ដាខេត្តក្នុងប្រទេសកម្ពុជា គឺដូចអ្វីដែលអ្នកជំនាញនៃវិស័យអចលនទ្រព្យកម្ពុជាបានព្យាករកាលពីប៉ុន្មានឆ្នាំមុន។
បើតាមការព្យាករណ៍របស់លោក វ៉ា វីរៈ អ្នកជំនាញអចលនទ្រព្យអន្តរជាតិកាលពីប៉ុន្មានឆ្នាំមុននេះ បានឱ្យដឹងថា តំបន់ជុំវិញរាជធានីភ្នំពេញ ជាពិសេសនៅផ្នែកខាងលិចទន្លេមេគង្គ និងទន្លេសាប នឹងមានសក្ដានុពលខ្ពស់ក្នុងការទាក់ទាញគម្រោងវិនិយោគក្នុង និងក្រៅប្រទេស ។
លោកបានបញ្ជាក់ថា ខេត្តកំពង់ស្ពឺ គឺជាខេត្តមួយដែលនឹងទទួលបានការវិនិយោគច្រើន ពីព្រោះតែខេត្តនេះនៅមិនឆ្ងាយពីកំពង់ផែស្វយ័តក្រុងព្រះសីហនុ ដែលជាកំពង់ផែទឹកជ្រៅតែមួយរបស់កម្ពុជា ដែលងាយស្រួលក្នុងការដឹកជញ្ជូនចេញនិងចូលរោងចក្រដើម្បីផលិតនិងនាំចេញទៅវិញ ។ ម្យ៉ាងទៀត ខេត្តកំពង់ស្ពឺជាតំបន់ដែលមានការអភិវឌ្ឍលើហេដ្ឋារចនាសម្ព័ន្ធច្រើន ដូច្នេះ វានឹងសម្រួលដល់ការដឹកជញ្ជូនលឿនរហ័ស ទាំងការដឹកទៅកំពង់ផែអន្តរជាតិ និងដឹកទៅតាមព្រំដែនគោកហើយបន្តទៅកាន់ប្រទេសទី៣ ។
ដោយឡែក ចំពោះខេត្តស្វាយរៀងដែលជាខេត្តជាប់ព្រំដែនជាមួយប្រទេសវៀតណាម ក៏ឃើញថាទទួលបានការចាប់អារម្មណ៍និងបណ្ដាក់ទុនវិនិយោគច្រើនពីសំណាក់វិនិយោគិនក្នុងនិងក្រៅប្រទេស ដោយគេសង្កេតឃើញថាតំបន់ខ្លះនៃខេត្តមួយនេះ ជាពិសេសក្រុងបាវិត មានការសាងសង់នូវសំណង់ថ្មីៗជាច្រើន ទាំងអគារពាណិជ្ជកម្ម និងសំណង់រោងចក្រឧស្សាហកម្ម ។ គួររំលឹកថា បើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាបានបង្ហាញ ក្នុងរយៈពេល៥ខែដើមឆ្នាំនេះ វិស័យឧស្សាហកម្មទទួលបានទុនវិនិយោគច្រើនជាងគេ ដែលមានរហូតដល់ដល់៣,៦ពាន់លានដុល្លារអាមេរិក ក្រៅពីនោះ មានវិស័យទេសចរណ៍ ហេដ្ឋារចនាសម្ព័ន្ធ និងផ្សេងៗទៀត ៕
Account
Security
Favourite Content