បរទេស៖ យោងតាមប្រភពព័ត៌មានពី DW បានរាយការណ៍ពីការព្យាករណ៍ថ្មីរបស់ធនាគារពិភពលោកថា កំណើនសេដ្ឋកិច្ចរបស់ប្រទេសវៀតណាមអាចនឹងឈានដល់ ៦,១ ភាគរយនៅចុងឆ្នាំ ២០២៤ និង ៦,៥ ភាគរយក្នុងឆ្នាំ ២០២៥។ ការព្យាករណ៍ទាំងនេះមានអត្រាខ្ពស់ជាងការព្យាករណ៍កាលពីខែមេសា ដោយសារកំណើនជំរុញដោយការនាំចេញផ្នែកផលិតកម្ម ទេសចរណ៍ និងការវិនិយោគ។

ការព្យាករណ៍នេះ​បង្ហាញ​ថា ​វៀតណាម​អាច​នឹង​មាន​កំណើន​សេដ្ឋកិច្ច​ធំ​ជាង​គេ​ជាងក្នុងចំណោម​ប្រទេស​សមាជិកអាស៊ាននៅ​ឆ្នាំ២០២៥ ដែលក្នុងនោះរួមប្រទេសដែលកំពុង​មាន​សេដ្ឋកិច្ច​រីកចម្រើន​​ដូច​ជា ប្រទេសថៃ កម្ពុជា ម៉ាឡេស៊ី ឥណ្ឌូនេស៊ី និង​ហ្វីលីពីន។ អ្វីដែលជាការកត់សម្គាល់ វៀតណាម បាន​ពឹង​ផ្អែក​ខ្លាំង​លើ​ការ​វិនិយោគ​ផ្ទាល់​ពី​បរទេសដូចទៅនឹង​ប្រទេស​អាស៊ី​អាគ្នេយ៍​ផ្សេង​ទៀត ស្របពេលដែលវិនិយោគិនលោកខាងលិចព្យាយាមធ្វើពិពិធកម្មឆ្ងាយពីចិនចំពេលមានភាពតានតឹងផ្នែកភូមិសាស្ត្រនយោបាយរវាងទីក្រុងវ៉ាស៊ីនតោន និងទីក្រុងប៉េកាំង ហើយអាស៊ីអាគ្នេយ៍កំពុងក្លាយជាជម្រើសកំពូលសម្រាប់ការវិនិយោគបរទេសពីសហរដ្ឋអាមេរិក ជប៉ុន និងសហភាពអឺរ៉ុប។

លោក Nguyen Khac Giang អ្នកស្រាវជ្រាវមកពីវិទ្យសា្ថន​ ISEAS លើកឡើងថា វៀតណាមកំពុងទាញយកផលប្រយោជន៍ពីភាពតានតឹងទាំងនោះ ខណៈដែលអាចរក្សាសន្ទុះកំណើនរបស់ខ្លួនដោយសារតែអត្ថប្រយោជន៍ក្នុងស្រុកគឹចំនួនប្រជាជន ១០០ លាននាក់។ វៀតណាមរំពឹងថា ធនធានមនុស្សរបស់ខ្លួនអាចបង្កើនអត្ថប្រយោជន៍នៅក្នុងទីតាំងភូមិសាស្ត្រនយោបាយនៃការប្រកួតប្រជែងអំណាចរវាងចិន និងសហរដ្ឋអាមេរិក។ ទន្ទឹមនឹងនេះ ចិនក៏កំពុងវិនិយោគនៅអាស៊ីអាគ្នេយ៍ផងដែរ ដោយទីក្រុងប៉េកាំង និងទីក្រុងហាណូយបានបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយនៅឆ្នាំ ២០០៨។ ទោះបីជាវៀតណាមកំពុងប្រឈមមុខនឹងបញ្ហាប្រឈមដ៏ធ្ងន់ធ្ងរមួយចំនួន ប៉ុន្តែបើប្រៀបធៀបទៅនឹងបណ្តាប្រទេសអាស៊ីអាគ្នេយ៍ផ្សេងទៀត ទស្សនវិស័យសេដ្ឋកិច្ចរបស់ខ្លួននៅតែមានភាពវិជ្ជមាន។

ដូចទៅនឹងប្រទេសចិនដែរ កំណើនសេដ្ឋកិច្ចរបស់វៀតណាមស្ថិតនៅក្រោមការគ្រប់គ្រងនៃប្រព័ន្ធបក្សតែមួយ គឺបក្សកុម្មុយនិស្តដែលគ្រប់គ្រងទាំងស្រុងលើមុខងាររបស់រដ្ឋ អង្គការសង្គម និងប្រព័ន្ធផ្សព្វផ្សាយ។ មិនត្រឹមតែប៉ុណ្ណោះ ចិនគឺជាដៃគូពាណិជ្ជកម្មដ៏ធំបំផុតរបស់វៀតណាម ហើយសំខាន់ជាងនេះទៅទៀត វាដើរតួយ៉ាងសំខាន់ក្នុងវិស័យផលិតកម្មរបស់វៀតណាម ដោយសារវត្ថុធាតុដើមភាគច្រើនមកពីប្រទេសចិន។  “China Plus One” គឺជាយុទ្ធសាស្រ្តអាជីវកម្មសេដ្ឋកិច្ចមួយសម្រាប់អ្នកវិនិយោគកាត់បន្ថយការពឹងផ្អែកទាំងស្រុងលើប្រតិបត្តិការទីផ្សារ និងសង្វាក់ផ្គត់ផ្គង់នៅក្នុងប្រទេសចិន ក្នុងគោលបំណងពង្រីកទៅកាន់ប្រទេសផ្សេងទៀត ខណៈពេលដែលរក្សាវត្តមាននៅក្នុងប្រទេសចិនដដែល។ បណ្តាប្រទេសនៅអាស៊ីអាគ្នេយ៍ត្រូវបានគេមើលឃើញថាជាជម្រើសដ៏សមស្របសម្រាប់យុទ្ធសាស្ត្រមួយនេះ។ លោក Bich Tran មកពីមជ្ឈមណ្ឌល CSIS លើកឡើងថា វៀតណាមត្រូវបានចាប់អារម្មណ៍ជាជម្រើសកំពូលមួយសម្រាប់ យុទ្ធសាស្រ្ត China Plus One របស់ក្រុមហ៊ុនជាច្រើន ដោយសារតែភូមិសាស្ត្រនៅជិតគ្នា និងវប្បធម៌ស្រដៀងគ្នា។ សម្រាប់​អ្នក​ដែល​បាន​ធ្វើ​ប្រតិបត្តិការ​នៅ​ប្រទេស​ចិន នោះការ​ផ្លាស់​ទៅ​ប្រទេស​វៀតណាម​គឺរឿង​ងាយស្រួល ហើយវៀតណាមអាចទាក់ទាញក្រុមហ៊ុនមួយចំនួនតូចដែលចង់ផ្លាស់ប្តូរទីតាំង។

មួយវិញទៀត សហរដ្ឋអាមេរិកគឺជាដៃគូពាណិជ្ជកម្មធំទីពីររបស់វៀតណាម និងទីផ្សារនាំចេញធំជាងគេរបស់វៀតណាម។ នៅខែកញ្ញាឆ្នាំ ២០២៣ ទីក្រុងវ៉ាស៊ីនតោន និងទីក្រុងហាណូយបានជំរុញទំនាក់ទំនងការទូតរបស់ពួកគេ ដោយបានចុះហត្ថលេខាលើ “ភាពជាដៃគូយុទ្ធសាស្ត្រគ្រប់ជ្រុងជ្រោយសម្រាប់សន្តិភាព កិច្ចសហប្រតិបត្តិការ និងការអភិវឌ្ឍប្រកបដោយចីរភាព”។ អ្នក​វិភាគ​និយាយ​ថា​ គោលបំណងនៃកិច្ច​ព្រម​ព្រៀង​នេះ​ដើម្បី​ជំរុញ​ផល​ប្រយោជន៍​សេដ្ឋកិច្ច ខណៈដែលសហរដ្ឋ​អាមេរិក​គឺ​ជា​ដៃគូ​យុទ្ធសាស្ត្រ​មួយរបស់​​វៀតណាម។

មិនត្រឹមតែប៉ុណ្ណោះ ការវិនិយោគដ៏ធំពីទីក្រុងវ៉ាស៊ីនតោន គឺជាគន្លឹះនៃឱកាសសេដ្ឋកិច្ចសម្រាប់វៀតណាម។  នៅក្នុងប្រទេសក្នុងរយៈពេល ៥ ឆ្នាំចុងក្រោយនេះ វៀតណាមបានក្លាយជាទីតាំងផលិតដ៏សំខាន់សម្រាប់ Apple ដោយក្រុមហ៊ុននេះបានវិនិយោគជាង ១៥ ពាន់លានដុល្លារ (១៣,៧៦ ពាន់លានដុល្លារ)។ វៀតណាមមានតម្លៃពលកម្មទាប និងកម្លាំងពលកម្មវ័យក្មេងជាង ៥៨ ភាគរយនៃចំនួនប្រជាជនជិត ១០០ លាននាក់ បានជំរុញឲ្យប្រទេសនេះក្លាយជាទីតាំងទាក់ទាញសម្រាប់ការវិនិយោគ៕