សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ការវិនិយោគនៅក្នុងប្រទេសកម្ពុជា ជាពិសេសក្នុងវិស័យអចលនទ្រព្យដែលមានទំហំទុនរាប់សិបលានដុល្លារ ភាគច្រើនគឺជាការវិនិយោគមកពីបរទេស ជាក់ស្ដែងក្នុងឆ្នាំ២០២៣នេះ ការសិក្សាបានបង្ហាញថា វិនិយោគិនជនជាតិចិនគឺជាអ្នកដែលបានដាក់ទុនវិនិយោគច្រើនជាងគេនៅក្នុងប្រទេសកម្ពុជា ក៏ប៉ុន្តែប្រភេទអចលនទ្រព្យមួយចំនួនជនបរទេសមិនអាចកាន់កាប់ឬមានសិទ្ធិទិញបានទេ ។ មានដឹងទេថា តើប្រភេទអចលនទ្រព្យណាខ្លះដែលជនបរទេសអាចទិញឬកាន់កាប់ជាកម្មសិទ្ធិបាននៅក្នុងប្រទេសកម្ពុជា ?
ពីមុន ជនបរទេសមិនមានសិទ្ធិទិញផ្ទះជាប់ដី វីឡា ឬដីធ្លីឡើយ ។ ជនបរទេសមានសិទ្ធិទិញត្រឹមតែខុនដូប៉ុណ្ណោះ ហើយខុនដូនេះទៀតសោត ក៏មិនអនុញ្ញាតឱ្យជនបរទេសទិញនៅជាប់ផ្ទាល់ដីបានទៀត មានន័យថាពួកគេអាចទិញខុនដូបានចាប់ពីជាន់ទី១ឡើងទៅ ។ ប៉ុន្តែក្រោយមកជនបរទេសអាចមានសិទ្ធិកាន់កាប់អចលនទ្រព្យនៅក្នុងប្រទេសកម្ពុជាកាន់តែទូលំទូលាយតាមរយៈរូបភាពផ្សេង ។
លោក ពីង សេរី អនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) បានមានប្រសាសន៍ថា កន្លងទៅជនបរទេសដែលចង់វិនិយោគអចលនទ្រព្យនៅក្នុងប្រទេសកម្ពុជា គឺមានភាគហ៊ុនខ្មែរ៥១ភាគរយ ហើយជនបរទេសគឺមានភាគហ៊ុន៤៩ភាគរយ ដូច្នេះភាគីទាំងពីរអាចបង្កើតក្រុមហ៊ុនជាមួយគ្នា និងអាចទិញលក់អចលនទ្រព្យបាននៅក្នុងប្រទេសកម្ពុជា ។
លោកបន្តថា ៖
“រហូតមកដល់បច្ចុប្បន្ននេះ កម្ពុជាក៏មាននិយ័តករបរធនបាលកិច្ច ដែលស្ថាប័ននេះអាចជួយសម្រួលដល់ការវិនិយោគរបស់បរទេសនៅក្នុងប្រទេសកម្ពុជានៅក្នុងវិស័យអចលនទ្រព្យ ។ ជនបរទេសអាចវិនិយោគលើវិស័យអចលនទ្រព្យតាមរយៈបរធនបាលកិច្ច និងមានការធានាពីបរធនបាលកិច្ច ដូច្នេះការកាន់កាប់អចលនទ្រព្យរបស់វិនិយោគិនបរទេសកាន់តែមានភាពងាយស្រួល។”
លោក វ៉ា វីរៈ នាយកប្រតិបត្តិក្រុមហ៊ុន FORTUNA INVESTMENT បានមានប្រសាសន៍ថា តាមចប្បាប់ភូមិបាលនៃព្រះរាជាណាចក្រកម្ពុជា ជនបរទេសមិនអាចទិញដីនៅក្នុងប្រទេសកម្ពុជាបានទេ ហើយប្រទេសមួយចំនួនទៀតក៏មានការរឹតបន្តឹងចំពោះជនបរទេសក្នុងការទិញដីពីសំណាក់ជនបរទេសដែរ ។
លោកបន្តថា យ៉ាងណាក៏ដោយ បើទោះបីជាច្បាប់បានចែងយ៉ាងដូច្នេះមែន ប៉ុន្តែក៏មាននីតិវិធីក្នុងការធ្វើឱ្យជនបរទេសអាចទិញដីក៏ដូចជាអចលនទ្រព្យនៅក្នុងប្រទេសកម្ពុជាបានដែរ ។
លោកបានបញ្ជាក់ថា ៖
“មាននីតិវិធីមួយចំនួន ដែលអាចឱ្យជនបរទេសទិញដីនៅក្នុងប្រទេសកម្ពុជា ដោយក្នុងនោះ ជនបរទេសដែលទទួលបានសញ្ជាតិខ្មែរ គឺមានសិទ្ធិដូចនឹងពលរដ្ឋកម្ពុជាដែរ ហើយមុនពេលគាត់ទទួលបានសញ្ជាតិខ្មែរ គាត់អាចរៀបការជាមួយស្ត្រី ឬបុរសខ្មែរ ហើយអាចដាក់ពាក្យស្នើសុំសញ្ជាតិខ្មែរពីរាជរដ្ឋាភិបាលនៃព្រះរាជាណាចក្រកម្ពុជា ។”
លោកបន្តទៀតថា ៖
“វិធីមួយទៀត គឺគាត់ជាអ្នកវិនិយោគដែលបានដាក់ទុនវិនិយោគអស់ចាប់ពី២០ម៉ឺនដុល្លារអាមេរិក និងបានបំពេញលក្ខខណ្ឌការផ្ដល់សញ្ជាតិជូនបរទេសនៃព្រះរាជាណាចក្រកម្ពុជាគ្រប់គ្រាន់គឺគាត់អាចទទួលបានសញ្ជាតិខ្មែរ និងមានសិទ្ធិគ្រប់គ្រាន់ក្នុងការទិញអចលនទ្រព្យគ្រប់ប្រភេទ។”
លោកបន្ថែមថា ជនបរទេសក៏អាចទិញដី ឬអចលនទ្រព្យផ្សេងទៀតបានតាមរយៈការជ្រើសរើសជនជាតិខ្មែរណាម្នាក់ដែលគាត់ទុកចិត្តឱ្យឈរឈ្មោះតំណាងគាត់ក្នុងការទិញដី ឬអចលនទ្រព្យផ្សេងៗ នៅក្នុងប្រទេសកម្ពុជា ហើយដើម្បីការពារខ្លួនជនបរទេសរូបនោះអាចធ្វើកិច្ចសន្យាដោយមានមេធាវីបោះត្រាត្រឹមត្រូវ ។ វិធីមួយទៀត តាមរយៈការបង្កើតក្រុមហ៊ុនអចលនទ្រព្យដោយមានភាគហ៊ុនខ្មែរ និងបរទេសបញ្ចូលគ្នានិងអាចដើរប្រមូលទិញអចលនទ្រព្យ ដែលជនបរទេសឯកត្តបុគ្គលិកមិនអាចទិញបាន ។ ជាមួយគ្នានេះ លោកក៏បានបញ្ជាក់ផងដែរថា វិធីសាស្ត្ររៀបការជាមួយស្ត្រី ឬបុរសខ្មែរ ហើយឱ្យប្តី ឬប្រពន្ធឈរឈ្មោះទិញអចលនទ្រព្យអាចមានបញ្ហានៅពេលដែលមាននណាម្នាក់ក្នុងចំណោម២នាក់ក្បត់គ្នា។ ដូចគ្នានេះដែរ ការផ្ដល់សិទ្ធិឱ្យជនជាតិខ្មែរជាអ្នកឈរឈ្មោះទិញអចលនទ្រព្យ ហើយក្នុងករណីគាត់មិនស្មោះត្រង់យកដី ឬអចលនទ្រព្យនោះទៅលក់គឺជាហានិភ័យសម្រាប់ជនបរទេស៕
Account
Security
Favourite Content