ភ្នំពេញ ៖ សាជីវកម្មស្ពាន និងផ្លូវចិន CRBC ដែលតែងវិនិយោគ និងអភិវឌ្ឍគម្រោងធំៗទៅលើហេដ្ឋារចនាសម្ព័ន្ធនានានៅកម្ពុជា បានបង្ហាញពីគោលបំណងរបស់ខ្លួនក្នុងការវិនិយោគបន្ថែមថ្មីទៅលើវិស័យទឹកស្អាតនៅកម្ពុជា ខណៈដែលរាជរដ្ឋាភិបាលក៏កំពុងយកចិត្តទុកដាក់ខ្លាំង និងចាត់ទុកជាវិស័យអាទិភាព ដើម្បីលើកកម្ពស់សុខុមាលភាពរបស់ប្រជាជន។

ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅក្នុងកិច្ចជំនួបពិភាក្សាជាមួយគណៈប្រតិភូសាជីវកម្មស្ពាន និងផ្លូវចិន (CRBC) ដឹកនាំដោយលោក Yang Jie នាយកគ្រប់គ្រងទូទៅ កាលពីពេលថ្មីៗនេះ បានលើកឡើងពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការកែលម្អវិស័យទឹកស្អាត ជាវិស័យអាទិភាព ដើម្បីលើកកម្ពស់តួនាទីយុទ្ធសាស្ត្ររបស់រដ្ឋ និងពង្រឹងការចូលរួមពីវិស័យ​ឯកជន ខណៈដែលបច្ចុប្បន្នមានរដ្ឋាករទឹកចំនួន១១ និងប្រតិបត្តិករទឹកស្អាតឯកជនជាង៤០០ក្រុមហ៊ុននៅទូទាំងប្រទេស។

នៅក្នុងឱកាសនេះផងដែរ ឯកឧត្តម ក៏បានលើកទឹកចិត្តក្រុមហ៊ុន CRBC ឱ្យចូលរួមដេញថ្លៃគម្រោងសាងសង់រោងចក្រផលិតទឹកស្អាតនានា ព្រមទាំងស្នើឱ្យក្រុមហ៊ុនគិតគូរលើយុទ្ធសាស្រ្តមួយចំនួន ដូចជាការប្រមូលផ្តុំប្រតិបត្តិករឯកជនតួចៗដើម្បីទទួលបានសេដ្ឋកិច្ចមាត្រដ្ឋាន (Economies of Scale) ឬការវិនិយោគលើហេដ្ឋារចនាសម្ព័ន្ធប្រព្រឹត្តកម្មទឹកស្អាត ដើម្បីផលិតទឹកដុំលក់ជូនរដ្ឋាករទឹកក្នុងតម្លៃប្រកួតប្រជែង។

លោក Yang Jie តំណាងក្រុមហ៊ុនសាជីវកម្ម CRBC បានលើកឡើងថា ក្រុមហ៊ុនមានប្រតិបត្តិការនៅទូទាំងពិភពលោក ដោយមានសាខាក្រៅប្រទេសចំនួន៦៦ និងគម្រោងកំពុងដំណើរការចំនួន៣៩១ ក្នុងទំហំទឹកប្រាក់កិច្ចសន្យាប្រមាណ១៩,២ ពាន់លានដុល្លារអាមេរិកក្នុងឆ្នាំ២០២៣។ ក្រុមហ៊ុនក៏បានលើកឡើងអំពីជំនាញក្នុងការសាងសង់ហេដ្ឋារចនាសម្ព័ន្ធទឹកស្អាត ដោយរំលេចនូវគម្រោងជោគជ័យនៅក្នុងតំបន់ទីក្រុងនៃប្រទេសមួយចំនួន។

សូមជម្រាបថា ក្រសួងឧស្សាហកម្មវិទ្យាសាស្ត្រ បច្ចេកវិទ្យា និងនវានុវត្តន៍ ក្នុងការជំរុញឱ្យសម្រេចគោលដៅអភិវឌ្ឍន៍ប្រកបដោយចីរភាពសម្រាប់វិស័យទឹកស្អាត បានបើកវគ្គបណ្តុះបណ្តាលភាពជាអ្នកដឹកនាំ ដើម្បីពង្រឹងសមត្ថភាពមន្ត្រី ក្នុងការលើកកម្ពស់តួនាទីយុទ្ធសាស្រ្តរបស់រដ្ឋ ក្នុងការសម្រេចគោលដៅអភិវឌ្ឍន៍ប្រកបដោយចីរភាពរបស់កម្ពុជា ដែលកំណត់ថា «ត្រឹមឆ្នាំ២០៣០ សម្រេចទទួលបានសាកលកម្ម និងសមធម៌នូវទឹកបរិភោគដែលមានសុវត្ថិភាព និងថ្លៃសមរម្យសម្រាប់ប្រជាជនទាំងអស់»។

របាយការណ៍របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក៏បានឱ្យដឹងដែរថា ការផ្គង់ផ្គង់ទឹកស្អាតក្នុងក្របខ័ណ្ឌទូទាំងប្រទេស ចំនួនគ្រួសារបានទទួលទឹកស្អាតប្រើប្រាស់តាមប្រព័ន្ធបណ្តាញ ក្រោមដែនសមត្ថកិច្ចរបស់ក្រសួង បានកើនឡើង៦៦ភាគរយ ពីប្រមាណជាង ៧៨ម៉ឺនគ្រួសារ ក្នុងឆ្នាំ២០១៨ រហូតដល់ជាង១,៣លានគ្រួសារ ក្នុងឆ្នាំ២០២៣។

គិតត្រឹមឆមាសទី១ ឆ្នាំ២០២៤នេះ តំណបណ្តាញផ្តត់ផ្គង់ទឹកស្អាតដែលទៅដល់ខ្នងផ្ទះគ្រួសាររបស់ប្រជាពលរដ្ឋ បានសម្រេចជាង១លាន៣៧ម៉ឺនតំណ ខណៈចំនួនគ្រួសារសរុបទូទាំងប្រទេសមានប្រមាណ ៣លាន ៥៥ម៉ឺនខ្នងផ្ទះ ដោយសន្មតថា ១តំណ ស្មើ១ខ្នងផ្ទះ។ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានរៀប​ចំ និងការដាក់ចេញផែនការមេស្តីពីការផ្តត់ផ្គង់ទឹកស្អាត ដើម្បីសម្រេចបានគោលដៅផ្តត់ផ្គង់ទឹកស្អាត១០០ភាគរយនៅឆ្នាំ២០៣០៕