សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ហេតុអ្វីត្រូវការចុះបញ្ជីដីធ្លី និងត្រូវការចេញប័ណ្ណកម្មសិទ្ធិជូនដល់អ្នកកាន់កាប់ដីធ្លី ? ការចុះបញ្ជីដីធ្លីប្រៀបបានជាការចុះឈ្មោះសម្គាល់ថាដីនោះគឺជាដីរបស់អ្នកណាម្នាក់ ដែលអ្នកផ្សេងមិនអាចមករំលោភបំពានបានឡើយ ហើយប័ណ្ណកម្មសិទ្ធិគឺជាយន្តការងារទ្រព្យសម្បត្តិ ដែលមិនអាចឱ្យអ្នកណាម្នាក់មកយកបានឡើយ ដូច្នេះវាមានសារសំខាន់ណាស់ក្នុងការចុះបញ្ជីដីធ្លី និងការចេញប័ណ្ណកម្មសិទ្ធិជូនម្ចាស់ដីធ្លី ។
ការចុះបញ្ជីដីធ្លីមានពីរនីតិវិធី គឺការចុះបញ្ជីដាច់ដោយដុំ និងការចុះបញ្ជីមានលក្ខណៈជាប្រព័ន្ធ ។ ថ្ងៃនេះ AMS នឹងលើកឡើងពីនីតិវិធីនៃការចុះបញ្ជីដីធ្លីដាច់ដោយដុំមកចែកជូន។ ការចុះបញ្ជីដីធ្លីដាច់ដោយដុំនេះ ម្ចាស់កម្មសិទ្ធិអាចធ្វើស្នើសុំធ្វើប័ណ្ណនេះបាន ប៉ុន្តែមានតម្លៃថ្លៃតាមតម្លៃដែលបានកំណត់ដោយក្រសួងទៅតាមទីតាំងដីតាំងនៅ ហើយប្រជាជនភាគច្រើនមិនមានលទ្ធភាពធ្វើប័ណ្ណនេះទុកនោះទេបើមិនមានតម្រូវការចាំបាច់ក្នុងការលក់ដូរ ។
ការចុះបញ្ជីដីធ្លីដាច់ដោយដុំ អាចចែកជា៣ដំណាក់សំខាន់ ឬជា៥ដំណាក់កាលរួមមាន ៖
១. ការដាក់ពាក្យស្នើសុំចុះបញ្ជីដីធ្លី ៖ ដំបូងម្ចាស់ដី ត្រូវដាក់ពាក្យសុំទៅការិយាល័យភូមិបាលស្រុក/ខ័ណ្ឌតាមរយៈមេឃុំ/ចៅសង្កាត់ ដែលដីនោះតាំងនៅ។ មេឃុំ/ចៅសង្កាត់ នឹងត្រូវធ្វើការបញ្ជាក់លើចំណុចមួយចំនួនរបស់ម្ចាស់ដីនិងអត្ដសញ្ញាណនៃការប្រើប្រាស់ដី។
២. ក្រុមការងារប្រតិបត្តិ ៖ បន្ទាប់ពីបានទទួលការបញ្ជាក់ពីមេឃុំឬចៅសង្កាត់ ដំណាក់កាលបន្ទាប់ គឺការស្នើសុំទៅសាលាស្រុក/ខ័ណ្ឌដែលដីតាំងនៅ ដើម្បីមន្រ្តីសុរិយោដីស្រុកចុះវាស់វែងនិងកំណត់ព្រំដី ។ ជាធម្មតា នៅមុនពេលចុះវាស់វែងកំណត់ព្រំដី ក៏មានការជូនដំណឹងជាសាធារណៈ ១៤ថ្ងៃមុនពេលចុះវាស់ដើម្បីភាគីពាក់ព័ន្ធចូលរួម ឬតវ៉ា។ នៅក្នុងការវាស់វែងនេះ ម្ចាស់កម្មសិទិ្ធ និងម្ចាស់ដីដែលមានព្រំប្រទល់ជាប់គ្នារួមជាមួយសុរិយោដី សហការដើម្បីវាស់វែងដី ដោយមានការឯកភាពទាំងសងខាងក្រោយមកមន្រ្ដីនឹងមានគូសចេញជា ប្លង់ក្បាលដី។
៣. ការបិទផ្សាយជាសាធារណៈ ៖ នៅក្នុងការកសាងប្លង់សុរិយោដីនេះសាលាស្រុកត្រូវធ្វើការផ្សព្វផ្សាយជាសាធារណៈ។នៅក្រោយពេលគូសប្លង់សុរិយោដីរួចហើយក៏មានការផ្សព្វផ្សាយជាសាធារណៈជាថ្មីម្តងទៀត អំពីប្លង់ដីនិងអត្តសញ្ញាណម្ចាស់ដី រយៈពេល៣០ថ្ងៃដើម្បីទុកឱកាសឲ្យបុគ្គលពាក់ព័ន្ធមានសិទ្ធិជំទាស់ ឬធ្វើការតវ៉ា។
៤. មន្រ្ដីពិនិត្យនិងសម្រេច៖ ប្រសិនបើគ្មានការតវ៉ាណាមួយទេនោះអាជ្ញាធរស្រុក/ខ័ណ្ឌ នឹងរៀបចំធ្វើរបាយការណ៍ ទៅឲ្យសុរិយោដីថ្នាក់ខេត្ត/ក្រុងជាអ្នកពិនិត្យសម្រេចជាចុងក្រោយ ។
៥. ការប្រគល់ប័ណ្ណ៖ ជាដំណាក់កាលចុងក្រោយដែលម្ចាស់សាម៉ី ត្រូវទៅទទួលយកប័ណ្ណកាន់កាប់ដីធ្លី(ប្លង់រឹង)ដោយផ្ទាល់ នៅសុរិយោដីខេត្ត/ក្រុងដែលតាំងនៅ ដោយមានការផ្តិតមេដៃទទួលយកជាដើម ។
ការចុះបញ្ជីដីធ្លីដាច់ដោយដុំនេះ ភាគច្រើនអ្នកដែលស្នើសុំគឺជាអ្នកដែលមានតម្រូវការលក់ដូរជាបន្តបន្ទាន់ តែសម្រាប់ពលរដ្ឋដែលកំពុងអាស្រ័យផលលើដីនោះ រង់ចាំដល់ការចុះវាស់វែង និងចុះបញ្ជីតាមនីតិវិធីលក្ខណៈជាប្រព័ន្ធ ៕
Account
Security
Favourite Content