សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ យោងតាមប្រសាសន៍សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅព្រឹកថ្ងៃទី០២ ខែឧសភា ឆ្នាំ ២០២៤នេះឱ្យដឹងថា គិតត្រឹមខែឧសភា ឆ្នាំ២០២៤នេះ កម្ពុជាមានរោងចក្រផ្គុំ និងដំឡើងរថយន្តចំនួន៦ហើយ ដោយក្នុងនោះមាន ៤ កំពុងដំណើរការ និងចំនួន២ផ្សេងទៀតកំពុងសាកល្បងដំណើរការខ្សែច្រវាក់ផលិតកម្មរបស់ខ្លួន ។
នៅក្នុងឱកាសម្ពោធរោងចក្រដំឡើងរថយន្ត តូយ៉ូតា នៅព្រឹកថ្ងៃទី០២ ឧសភា ២០២៤ ស្ថិតនៅក្នុងតំបន់សេដ្ឋកិច្ចពិសេស រ៉ូយ៉ាល់ ភ្នំពេញ សម្ដេចមហាបវរធិបតី ហ៊ុន ម៉ាណែត បានថ្លែងថា រោងចក្រផ្គុំ និងដំឡើងរថយន្តទាំងនោះមានទីតាំងស្ថិតនៅខេត្តបន្ទាយមានជ័យ ខេត្តពោធិ៍សាត់ ខេត្តកោះកុង ខេត្តស្វាយរៀង ខេត្តកណ្ដាល និងរាជធានីភ្នំពេញ ។
សម្ដេចធិបតីបានមានប្រសាសន៍បន្តថា តាមរយៈសុខសន្តិភាព និងស្ថិរភាពនយោបាយ និងសេដ្ឋកិច្ច កម្ពុជារំពឹងទទួលបានការវិនិយោគបន្ថែមទៀតលើប្រភេទឧស្សាហកម្មផ្អែកលើជំនាញនេះជាបន្តបន្ទាប់ទៀត។ យ៉ាងណាក្ដី កម្ពុជាក៏ត្រូវបន្តអភិវឌ្ឍន៍ហេដ្ឋារចនាសម្ព័ន្ធ ឧស្សាហកម្ម ដែលបម្រើទៅដល់ការវិនិយោគ និងការបណ្ដុះបណ្ដាលធនធានមនុស្ស ប្រកបដោយជំនាញ ស្របតាមតម្រូវការទីផ្សារពលកម្មជាបន្តបន្ទាប់ក្នុងពេលចក្ខុវិស័យរបស់រាជរដ្ឋាភិបាលកម្ពុជាក្នុងអាណត្តិនេះបានដាក់ចេញនូវការធ្វើពិពិធកម្ម ទំនើបកម្ម រចនាសម្ព័ន្ធឧស្សាហកម្មនៅកម្ពុជា សំដៅរួមចំណែកដល់ការបង្កើតតម្លៃបន្ថែមខ្ពស់ដែលទ្រទ្រង់ដល់កំណើនសេដ្ឋកិច្ច បង្កើនប្រាក់ចំណូលសមស្របជូនដល់បងប្អូនប្រជាពលរដ្ឋកម្ពុជា ។
សម្ដេចធិបតីបានបន្ថែមថា កម្ពុជាក៏មានចក្ខុវិស័យប្រែក្លាយខ្លួនជាមជ្ឈមណ្ឌលផ្ដុំសកម្មភាពផលិតគ្រឿងបង្គុំយានយន្ត និងបរិក្ខាអេឡិចត្រូនិកសម្រាប់នាំចេញទៅកាន់ទីផ្សារក្នុងតំបន់ និងសកលលោក ដែលការសម្រេចបាននូវចក្ខុវិស័យនេះនឹងនាំមកនូវជាផ្លែផ្កាវិជ្ជមានជាច្រើនសម្រាប់ការអភិវឌ្ឍន៍សង្គម សេដ្ឋកិច្ចជាតិ ។ ជាមួយគ្នានេះ ដើម្បីសម្រេចបានចក្ខុវិស័យនេះ ផែនទីបង្ហាញផ្លូវការអភិវឌ្ឍវិស័យយានយន្ត និងអេឡិចត្រូនិកកម្ពុជា បានកំណត់វិធានការអាទិភាពតាមផ្នែកចំនួន ៥ រួមមាន ១.យុទ្ធសាស្ត្រ និងការសម្របសម្រួលអន្តរស្ថាប័ន ២. ធនធានមនុស្ស និងនវានុវត្តន៍ ៣. ហេដ្ឋារចនាសម្ព័ន្ធសម្ព័ន្ធ ៤. កិច្ចសម្រួលពាណិជ្ជកម្ម និង ៥. បរិកាសធុរកិច្ចនិងការវិនិយោគ ។
សម្ដេចធិបតីក៏បានបញ្ជាក់ដែរថា ការសម្ពោធដាក់ឱ្យដំណើរការរោងចក្រដំឡើងរថយន្ត តូយ៉ូតា របស់ក្រុមហ៊ុន Toyota Tsusho Manufacturing ( Cambodia ) នេះ គឺជាសក្ខីភាពបង្ហាញទំនុកចិត្ត និងសក្ដានុពលនៃប្រទេសកម្ពុជា ជូនបណ្ដាវិនិយោគិននានាដែលកំពុងចាប់អារម្មណ៍លើឱកាសវិនិយោគនៅកម្ពុជា។
តាមរយៈរោងចក្រដំឡើងរថយន្តទាំង៦នៅតាមបណ្ដារាជធានី /ខេត្ត ចំនួន៦នេះ នឹងជំរុញសក្ដានុពល និងទាក់ទាញវិនិយោគិនក្នុងប្រទេស និងក្រៅប្រទេសចូលទៅកាន់តំបន់ទាំងនោះបន្ថែម ស្វែងរកការវិនិយោគនានា ហើយក៏ជំរុញឱ្យសកម្មភាពនៃការដោះដូរដីធ្លី និងជំរុញទីផ្សារដីធ្លីកាន់តែមានសន្ទុះមួយកម្រិតទៀតផងដែរ ៕
Account
Security
Favourite Content