សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
រំដេង ជាគ្រឿងទេសមួយប្រភេទមានក្លិនប្រហើរ ដែលគេនិយមប្រើប្រាស់ផ្សំរសជាតិ និងយកក្លិន ជាពិសេសសម្លរគ្រឿងខ្មែរដែលគេមិនសូវខ្វះបាន ខណៈដែលដំណាំយកមើមមួយនេះមានភាពងាយស្រួលដាំ មិនត្រូវការមើលថែទាំច្រើន ហើយក៏មានទីផ្សារល្អផងដែរ។
លោក អឹន មីន ជាកសិករមានបទពិសោធផ្នែកកសិកម្ម និងកំពុងដាំដំណាំរំដេងស្ថិតនៅក្នុងស្រុកគិរីវង់ ខេត្តតាកែវ បានមានប្រសាសន៍ឱ្យដឹងថា ៖
«រំដេងងាយស្រួលដាំ មិនចាំបាច់ថែទាំអីច្រើនទេ គ្រាន់តែធ្វើស្មៅ និងដាក់ជី គឺអាចដាំ និងគាស់លក់វិលជុំបានជារៀងរាល់ថ្ងៃឱ្យតែមានកម្លាំងគាស់លក់ឱ្យម៉ូយមកទិញដល់កន្លែង»។
លោកបន្តថា៖
«ធម្មតាម៉ូយគេកម្ម៉ង់យកទៅលក់បន្តនៅភ្នំពេញ និងខេត្តព្រះសីហនុ ដោយម្នាក់យកប្រមាណ ៣០-៤០គីឡូក្រាម ឱ្យតែយើងគាស់ទាន់ឱ្យគេ ហើយការដាំរំដេង យើងដាំនៅលើដីរាបក៏បាន លើកជារងក៏បាន តែខ្ញុំដាំតែលើដីរាបធម្មតាក៏បាន ឯទឹកក៏មិនត្រូវការច្រើន តែអាចនឹងមានចៃស៊ីខ្លះដែរ តែយើងអាចបាញ់ថ្នាំកម្ចាត់ចៃខ្លះ នោះវានឹងលាស់ត្រួយល្អមកវិញហើយ»។
លោកបន្ថែមថា ដំណាំរំដេងនេះ គេអាចដាំរយៈពេលប្រមាណមួយឆ្នាំទើបមានមើមអាចគាស់បាន ហើយនៅពេលដែលគេចង់ទុកកាន់តែយូរ កាន់តែរីកមើមបានច្រើន តួយ៉ាងដើមរំដេងដែលលោកបានដាំ និងទុកប្រមាណ ២ឆ្នាំ អាចគាស់លក់បានក្នុងមួយគុម្ពប្រមាណ ៤-៥គីឡូក្រាមក៏មាន។ ចំណែកតម្លៃជាធម្មតា អាចលក់បានក្នុងតម្លៃ ១២០០រៀលក្នុងមួយគីឡូក្រាម។
ទាក់ទងនឹងការគាស់រំដេងនេះទៀត សោត លោក អឹន មីន បានរៀបរាប់ដែរថា សម្រាប់លោកផ្ទាល់ ពេលគាស់ អាចគាស់តែគុម្ពណាធំៗសិន ហើយទុក ៣ ទៅ ៤ ដើមដើម្បីឱ្យវាលូតលាស់បន្តទៀត ដែលមិនចាំបាច់នឿយហត់ដាំច្រើនដងនោះទេ ពោលគឺអាចទទួលបានផលជាបន្តបន្ទាប់វិលជុំ ទោះបីគ្មានអ្នកទិញភ្លាមៗក៏អាចទុកឱ្យវារីកមើមបន្តទៀតបាន។
គួរបញ្ជាក់ដែរថា កសិករ អឹន មីន បានដាំដំណាំរំដេងនេះប្រមាណ ៣ឆ្នាំហើយ ដោយការដាំគឺលោក និងគ្រួសារជាដាំដោយខ្លួនឯង តែពេលប្រមូលផលក៏ត្រូវការជួលកម្លាំងពលកម្មខ្លះទើបគាស់ឱ្យគេទាន់ពេល។ ក្រៅពីនេះ លោកក៏មានដាំដំណាំផ្សេងទៀតដូចជា ខ្ញី និងរមៀត ដែលជាពពួកដំណាំងាយស្រួលដាំ ងាយថែទាំ ហើយបងប្អូនកសិករក៏អាចសាកល្បងដាំដុះបាន ដើម្បីអាចទទួលចំណូលបន្ថែមសម្រាប់ផ្គត់ផ្គង់គ្រួសារ៕
Account
Security
Favourite Content