សម្រាប់អាជីពចិញ្ចឹមគោ ក្របី ពិតណាស់ អ្នកចិញ្ចឹមចាំបាច់ត្រូវតែយល់ដឹងពីបច្ចេកទេសក្នុងការចិញ្ចឹម និងមើលថែទាំដើម្បីឱ្យសត្វមានការលូតលាស់ និងឆាប់ធំធាត់បានល្អ ហើយមិនត្រឹមតែប៉ុណ្ណោះ ចំពោះកសិករដែលវ័យឆ្លាតក៏ត្រូវដឹងពីវិធីសាស្ត្រទប់ទល់ និងដោះស្រាយនៅពេលមានវិបត្តិទីផ្សារកើតឡើង ដើម្បីអាចយករួចខ្លួនបាន ឬមិនជួបការខាតបង់។

លោក យិន បូរ៉ាន់ ជាម្ចាស់កសិដ្ឋានចិញ្ចឹមគោមួយកន្លែងស្ថិតនៅក្នុងឃុំមៀន ស្រុកព្រៃឈរ ខេត្តកំពង់ចាម និងជាអ្នកបង្កើតមាតិកាផ្សព្វផ្សាយពីបច្ចេកទេសកសិកម្មសំខាន់ៗ បានចែករំលែកឱ្យដឹងថា នៅក្នុងឆ្នាំ២០២៤នេះ វិស័យចិញ្ចឹមគោក្របីហាក់ថមថយសម្ទុះ ទាំងតម្រូវការទីផ្សារ ទាំងអ្នកចិញ្ចឹម អ្នកកម្មង់ទិញមេពូជ ហើយតម្លៃគោក្របីរស់ក៏ធ្លាក់ចុះដែរ បើធៀបទៅនឹងឆ្នាំមុន។ អាស្រ័យដោយតម្រូវការទីផ្សារមានការថយចុះបែបនេះ លោកបានកាត់បន្ថយគោក្នុងក្រោល ជាពិសេសគោដែលបំប៉ន់យកសាច់ ប៉ុន្តែលោកក៏នៅបន្តចិញ្ចឹម និងបំប៉នគោយកកូន ព្រមទាំងថែកូនគោដែលមានស្រាប់ ខណៈដែលបច្ចុប្បន្នម្ចាស់កសិដ្ឋានរូបនេះ មានគោសរុបប្រមាណជិត ១០០ក្បាល។

លោកបានបញ្ជាក់បន្ថែមដែរថា៖

«ត្បិតតម្លៃគោក្របីធ្លាក់ចុះក៏ពិតមែន តែយើងមានគំនិតច្នៃប្រតិដ្ឋ រៀនសូត្រអ្វីថ្មីៗ និងអនុវត្តផ្ទាល់ ដូចជាលក្ខខណ្ឌចំណីជាដើម គឺយើងមានរបៀបចិញ្ចឹម។ សម្រាប់គោបំប៉ន់សាច់ យើងព្យាយាមបន្ថែមស្មៅដែលបានដាំ ច្រូតរួចផ្អាប់ទុក លាយជាមួយចំណីបេ កាកស្រាបៀរ វីតាមីន ដើម្បីឱ្យគោយើងឆាប់ធំ និងឆាប់បានលក់ចេញ។ ចំណែកឯគោមេចិញ្ចឹមយកកូន យើងដាក់ចំណីសមល្មម ឱ្យទឹកលាយជាមួយវីតាមីន ទើបមេគោមិនបាក់កម្លាំង ហើយកូនគោគឺយើងព្រលែងវាឱ្យទៅស៊ីជាមួយគោបំប៉ន់សាច់ ដើម្បីអាចកាត់បន្ថយការចំណាយបាន»។

ស្ថិតក្នុងស្ថានភាពពុំសូវល្អនៃការប្រកបរបរចិញ្ចឹមគោក្របី ជាពិសេសក្នុងឆ្នាំ២០២៤ នេះ និងនៅឆ្នាំខាងមុខ ម្ចាស់កសិដ្ឋានខាងលើបញ្ចេញជាទស្សនៈថា ៖

«ចំពោះបងប្អូនប្រជាកសិករដែលចិញ្ចឹមគោក្របី សូមកុំសម្រុកលក់ចេញច្រើនពេកក្នុងដំណាក់កាលនេះ ដែលបណ្តាលឱ្យតម្លៃធ្លាក់ចុះ រីឯអ្នកចិញ្ចឹមដាក់ក្នុងក្រោលនៅតាមកសិដ្ឋាននានា គួរកាត់បន្ថយចំនួនគោក្របីដែលពុំចាំបាច់។ ដោយឡែក សម្រាប់អ្នកចិញ្ចឹមក្នុងចម្ការ អាចជាឱកាសល្អទៅវិញ ដោយយើងអាចកាត់បន្ថយចំណាយទៅលើប្រភពចំណី តួយ៉ាងដូចជាការដាំស្មៅដោយខ្លួនឯង ផលិតចំណីដោយផ្អាប់ស្មៅសម្រាប់ផ្គត់ផ្គង់គោស៊ីក្នុងក្រោលផង សម្រាប់លក់ចេញផង។ អ្វីដែលសំខាន់បំផុត គឺចេះមើលពីឱកាសក្នុងការទិញ-លក់ ក៏ដូចជាតម្រូវការរបស់អ្នកទិញផងដែរ»។

ពាក់ព័ន្ធទៅនឹងការដាំស្មៅសម្រាប់ចំណីគោក្នុងកសិដ្ឋាននេះផងដែរ លោក បូរ៉ាន់ បានបញ្ជាក់បន្ថែមថា ចំពោះទីតាំងរបស់លោកមានទំហំ ៣ហិកតា ដែលអាចផ្គត់ផ្គង់ចំណីសម្រាប់គោបានប្រមាណ ១០០ក្បាល ហើយជាទូទៅក្នុងរយៈពេល ១ឆ្នាំ ទៅ ២ឆ្នាំម្តង លោកធ្វើការភ្ជួរដី ប្តូរគល់ស្មៅចាស់ និងដាក់ជីលាមកគោ ដើម្បីបន្ថែមជីជាតិទៅលើដី។ យ៉ាងណាក៏ដោយ សម្រាប់ឱកាសនៃពិធីបុណ្យភ្ជុំបិណ្ឌខាងមុខនេះ ម្ចាស់កសិដ្ឋានរូបនេះបានត្រៀមប្រភេទគោសាច់សម្រាប់លក់ចេញរួចរាល់ដោយភាគច្រើនជាប្រភេទគោឈ្មោល៕