សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ នាពេលអនាគត ក្នុងចន្លោះពី ៣០ ឬ ៤០ឆ្នាំខាងមុខ ការហោះហើររបស់មនុស្សជាតិនឹងអាចមានការផ្លាស់ប្តូរគួរឲ្យកត់សម្គាល់ ដោយសារតែការអភិវឌ្ឍ និងពិពិធកម្មការផ្តល់សេវាឲ្យកាន់តែមានប្រសិទ្ធភាព ជាពិសេស គុណភាពហោះហើរដែលអាចមានសមត្ថភាពខ្ពស់ក្នុងការផ្ទុកអ្នកដំណើរបានកាន់តែច្រើនជាងការហោះហើរនាពេលបច្ចុប្បន្ន។
យោងតាមការព្យាករណ៍ពីសំណាក់បុគ្គលកំពូលនៃឧស្សាហកម្មធ្វើដំណើរតាមយន្តហោះ លោក Guillaume Faury ដែលជាប្រធានប្រតិបត្តិនៃក្រុមហ៊ុន Airbus បានបង្ហើបថា នៅក្នុងរយៈពេលប្រមាណ ៣ ឬ ៤ ទសវត្សរ៍ខាងមុខនេះ បណ្តាក្រុមហ៊ុនដែលជាអ្នកផលិតយន្តហោះនានានឹងនាំគ្នាបញ្ចប់ការផលិតយន្តហោះដែលមានរូបរាងទ្រវែងដូចពេលបច្ចុប្បន្ននេះទៀតហើយ។ ស្លាបរបស់យន្តហោះនាពេលអនាគតអាចនឹងមានទំហំធំជាងមុន ហើយកាប៊ីនផ្ទុកអ្នកដំណើរនឹងអាចយកទៅរៀបចំជាមួយនឹងស្លាបសងខាងនោះជំនួសវិញផងដែរ។
រូបរាងថ្មីនៃយន្តហោះធ្វើដំណើរនាពេលអនាគតអាចនឹងមានទម្រង់ស្រដៀងគ្នាទៅនឹងយន្តហោះក្រដាសដែលក្មេងៗបត់លេងនោះទេ។ រូបរាងនេះត្រូវបានគេហៅឈ្មោះថា Blended-wing body ឬ BWB ដែលចំណុចសំខាន់នឹងស្ថិតនៅត្រង់សងខាងនៃស្លាបធំៗទាំងពីរ ដោយរូបរាងបែបនេះនឹងអនុញ្ញាតឲ្យយន្តហោះអាចធ្វើការផ្ទុកអ្នកដំណើរបានច្រើន។
ការលើកឡើងរបស់លោក Faury នេះគឺជាការបង្ហាញសញ្ញាចុងក្រោយមួយដែលក្រុមហ៊ុន Airbus បានមើលឃើញថាគឺជាឱកាសក្នុងការក្តោបយកទីផ្សារបានមុនគេ និងច្រើនជាងគេ ខណៈដែលក្រុមហ៊ុនធំៗផ្សេងទៀតក៏បានមើលឃើញដែរថា នោះគឺជាឱកាសដើម្បីប្រជែងជាមួយនឹងក្រុមហ៊ុន Airbus ដូចគ្នាដែរ។
យ៉ាងណាក្តី រូបរាងយន្តហោះបែប BWB នេះ គឺមិនមែនជារឿងថ្មីនោះទេ។ ជាក់ស្តែង យន្តហោះយោធាខ្នាតយក្សទំលាក់គ្រាប់បែករបស់អាម៉េរិក B-2 Spirit ជាដើម ខណៈម៉ូដេលនេះត្រូវបានដាក់ឲ្យហោះហើរដំបូងជាមួយនឹងកងកម្លាំងយោធាអាម៉េរិកតាំងតែពីឆ្នាំ១៩៨៩មកម្ល៉េះ។ ក្រៅពីនោះ គេក៏សង្កេតឃើញថាមានដូចជាយន្តហោះ BWB-17ដែលជាគម្រោងសហការជាមួយនឹងអង្គការណាសាផងដែរ។
សម្រាប់ Airbus គំនិតនៃការបង្កើតយន្តហោះរូបរាងបែប BWB នេះ គឺត្រូវបានបង្ហាញលើកដំបូងតាំងតែពីឆ្នាំ២០១៧ ហើយកន្លងមកក្រុមហ៊ុនដែលមានមូលដ្ឋាននៅបារាំងមួយនេះក៏ធ្លាប់បានបង្ហាញគំរូម៉ូឌែលមានឈ្មោះថា ZEROe ដែលជាយន្តហោះមិនបញ្ចេញការបំពុល ឬ zero-emission ។ តាមផែនការ យន្តហោះម៉ូឌែលនេះនឹងអាចផ្ទុកអ្នកដំណើរបានរហូតដល់ទៅ២០០នាក់ ខណៈដែលការធ្វើតេស្តសាកល្បងលើកដំបូងបានអនុវត្តម្តងរួចទៅហើយកាលពីឆ្នាំ២០១៩ រីឯពេលវេលាកំណត់សម្រាប់បញ្ចប់នឹងអាចធ្វើឡើងនៅចន្លោះឆ្នាំ២០៣៥ ខាងមុខ៕
Account
Security
Favourite Content