សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពង់ធំ ៖ ស្ថានទូតអូស្ត្រាលីប្រចាំនៅកម្ពុជា និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានសម្ពោធដាក់ឱ្យដំណើរការស្ថានីយផ្គត់ផ្គង់ទឹកស្អាត និងបណ្តាញចែកចាយទឹកស្អាតថ្មីមួយទៀត ដែលធន់នឹងអាកាសធាតុ ស្ថិតនៅស្រុកតាំងគោក ខេត្តកំពង់ធំ ដោយពង្រីកការផ្គត់ផ្គង់ទឹកស្អាតទៅដល់ប្រជាពលរដ្ឋជាង ១០ ០០០ នាក់។
ស្ថានីយផ្គត់ផ្គង់ទឹកស្អាតពង្រ មានសមត្ថភាពផ្គត់ផ្គង់ទឹកស្អាត និងមានសុវត្ថិភាពសម្រាប់ប្រើប្រាស់ក្នុងគ្រួសារ រួមទាំងដល់សាលារៀនចំនួន៤ និងមណ្ឌលសុខភាពចំនួន១ មូលដ្ឋាន នៅក្នុង៧ភូមិ ដែលរួមចំណែកដល់គោលដៅរបស់កម្ពុជា ក្នុងការសម្រេចឱ្យបាននូវសកលកម្មទឹកស្អាតត្រឹមឆ្នាំ២០៣០ ព្រមទាំងពង្រឹងភាពធន់សហគមន៍ទៅនឹងគ្រោះទឹកជំនន់ និងរាំងស្ងួត។
ការវិនិយោគនេះជាផ្នែកមួយនៃភាពជាដៃគូរយៈពេលវែងរវាងអូស្ត្រាលី និងកម្ពុជា ក្នុងការពង្រីកសេវាផ្គត់ផ្គង់ទឹកស្អាតនៅតំបន់ជនបទ ដោយគាំទ្រប្រព័ន្ធផ្គត់ផ្គង់ទឹកស្អាតជាង ៩០ កន្លែងនៅទូទាំងប្រទេស និងបានជួយពលរដ្ឋកម្ពុជា ប្រមាណជាង ១,២ លាននាក់ ឱ្យទទួលបានទឹកស្អាតដែលមានសុវត្ថិភាព និងតម្លៃសមរម្យក្នុងរយៈពេលមួយទសវត្សរ៍កន្លងមកនេះ។
ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា៖
«នេះជាសមិទ្ធផលថ្មីមួយទៀត ក្នុងការពង្រីកសេវាផ្គត់ផ្គង់ទឹកស្អាតដែលមានសុវត្ថិភាព តម្លៃសមរម្យ ធន់នឹង អាកាសធាតុ ក្រោមការផ្តល់ហិរញ្ញប្បទានឥតសំណងរបស់រដ្ឋាភិបាលអូស្រ្តាលីដល់វិស័យឯកជន ហើយក៏ជានិម្មិតរូបមួយនៃភាពរីកចម្រើននៃចំណងទំនាក់ទំនងការទូតរវាងប្រទេសទាំងពីរ កម្ពុជា-អូស្រ្តាលី ដែលមានរយៈពេលជាង៧០ឆ្នាំមកហើយ»។
អូស្ត្រាលី បានអនុវត្តវិធីសាស្ត្រហិរញ្ញប្បទាន និងផ្តល់ជំនួយបច្ចេកទេសប្រកបដោយភាពច្នៃប្រឌិតដើម្បីទាក់ទាញការវិនិយោគឯកជន និងពង្រីកហេដ្ឋារចនាសម្ព័ន្ធទឹកស្អាតទៅកាន់តំបន់ជនបទដែលកន្លងមកត្រូវបានមើលឃើញថា ហាក់មិនមានសក្តានុពលសម្រាប់អាជីវកម្ម។ ការផ្តល់បដិភាគតម្លៃសេវាតំណភ្ជាប់បណ្តាញទឹកស្អាតសម្រាប់ប្រជាជនដែលកាន់បណ្ណក្រីក្រ និងស្ថាប័នសាធារណៈជួយឱ្យសហគមន៍ទទួលបានអត្ថប្រយោជន៍ពីប្រព័ន្ធទាំងនេះប្រកបដោយសមធម៌។
ឯកឧត្តម ដេរិក យីប ឯកអគ្គរដ្ឋទូតអូស្ត្រាលីប្រចាំកម្ពុជា បានលើកឡើងថា ៖ការទទួលបានទឹកស្អាតដែលអាចទុកចិត្តបានជាមូលដ្ឋានគ្រឹះនៃសុខុមាលភាព ផលិតភាព និងកំណើនសេដ្ឋកិច្ច។ អូស្ត្រាលីកំពុងជួយដល់ប្រតិបត្តិករឯកជន ក្នុងការផ្តល់សេវាក្នុងតំបន់ដែលមិនទាន់មានទឹកស្អាត ព្រមទាំងធានាថាគ្រួសារក្រីក្រអាចទទួលបានទឹកស្អាតប្រើប្រាស់ក្នុងតម្លៃសមរម្យ។
ឯកឧត្តមបញ្ជាក់ថា ៖
«រោងចក្រទឹកស្អាតថ្មីនេះនឹងជួយលើកកម្ពស់សុខមាលភាពពលរដ្ឋឱ្យកាន់តែប្រសើរឡើង កាត់បន្ថយភាពងាយរងគ្រោះពីផលវិបាកនៃការប្រែប្រួលអាកាសធាតុ និងបង្កើតឱកាសថ្មីសម្រាប់គ្រួសារទទួលផលនៅក្នុងខេត្តកំពង់ធំ»។
សូមបញ្ជាក់ដែរថា នៅទូទាំងប្រទេសកម្ពុជា ប្រមាណ ៥៥ ភាគរយនៃភូមិទាំងអស់មានសេវាផ្គត់ផ្គង់ទឹកស្អាត ដោយឡែក សម្រាប់តែខេត្តកំពង់ធំ ការផ្គត់ផ្គង់ទឹកស្អាតត្រូវបានគ្របដណ្តប់ប្រមាណ ៤៨ ភាគរយនៃភូមិ ហើយការពង្រីកបណ្តាញ និងសេវាផ្គត់ផ្គង់កំពុងត្រូវបានធ្វើឡើងជាបន្តបន្ទាប់។
លោកស្រី មាស សុខា ជាអាជីវករម្នាក់រស់នៅក្នុងស្រុកតាំងគោក បានលើកឡើងឱ្យដឹងថា ៖ គ្រួសាររបស់អ្នកស្រីមានអណ្តូងមួយ និងអនុញ្ញាតឱ្យអ្នកភូមិប្រើប្រាស់បានច្រើនគ្រួសារ ហើយពេលខ្លះ អណ្តូងនេះរីងទឹក ដែលតម្រូវឱ្យអ្នកស្រីក្រោកពីព្រលឹមដើម្បីបូមទឹកពីអណ្តូងទុកសម្រាប់បម្រើដល់អាជីវកម្មរបស់អ្នកស្រី។ ប៉ុន្តែ បច្ចុប្បន្ន អ្នកស្រីលែងបារម្ភពីការខ្វះទឹកស្អាតប្រើប្រាស់ទៀតហើយ ព្រោះមានបណ្តាញទឹកស្អាតចូលដល់ផ្ទះ ដែលអាចជួយឱ្យការលក់ដូររបស់គ្រួសារកាន់តែងាយស្រួលជាងមុន៕
Account
Security
Favourite Content