ប្រទេសស្វីស ៖ នៅក្នុងពិធីប្រកាសផ្ទេរតួនាទីជាផ្លូវការប្រធានសម្រាប់ដឹកនាំបន្តរបស់ក្រុមប្រទេស G77 និងចិន នៅក្នុងទីក្រុងហ្សឺណែវ ប្រទេសស្វីស កាលពីថ្ងៃដើមសប្ដាហ៍កន្លងទៅនេះ កម្ពុជាទទួលបានការកោតសរសើរយ៉ាងខ្លាំងក្នុងនាមប្រធានដឹកនាំការងារបានល្អប្រសើរ និងប្រកបដោយទំនួលខុសត្រូវខ្ពស់ក្នុងការដឹកនាំនៅអាណត្តិមុន។

ក្នុងកម្មវិធីនេះ ឯកឧត្តម សួន ប្រសិទ្ធ អគ្គរាជទូត និងជាប្រធានស្ថានបេសកកម្មអចិន្ត្រៃយ៍កម្ពុជាប្រចាំអង្គការពាណិជ្ជកម្មពិភពលោក និងអង្គការអន្តរជាតិនានាពាក់ព័ន្ធនឹងវិស័យសេដ្ឋកិច្ច-ពាណិជ្ជកម្ម ប្រចាំទីក្រុងហ្សឺណែវ ប្រទេសស្វីស និងក្នុងនាមជាប្រធានចប់អា​ណត្តិ​របស់ក្រុមប្រទេស G77 និងចិន បានផ្ទេរតួនាទីជាផ្លូវការជូនលោក Cristóbal MELGAR PAZOS ភារៈធារីស្ដីទីនៃស្ថានបេសកកម្មប៉េរូ ដើម្បីធ្វើជាប្រធានបន្តពីកម្ពុជាសម្រាប់អាណត្តិឆ្នាំ២០២៥។

ពិធីផ្ទេរតួនាទីនេះ ក៏មានវត្តមានចូលរួមរបស់លោក Pedro Manuel MORENO អគ្គលេខា​ធិការរងសន្និសីទអង្គការសហប្រជាជាតិសម្រាប់ពាណិជ្ជកម្ម និងអភិវឌ្ឍន៍ (UNCTAD) និងជាតំណាងរបស់លោកជំទាវ Rebeca GRYNSPAN អគ្គលេខាធិការអង្គការ UNCTAD ព្រមទាំងសមាជិកក្រុមប្រទេស G77 និងចិន ផងដែរ។

សូមជម្រាបជូនថា ក្រុមប្រទេស G77 និងចិន គឺជាក្រុមចរចាធំជាងគេនៅក្នុងប្រព័ន្ធអង្គការសហប្រជាជាតិ និងដែលបច្ចុប្បន្នមានសមាជិកសរុប១៣៤ ប្រទេស ក្នុងនោះ គណៈប្រតិភូកម្ពុជាបានទទួលធ្វើជាអនុប្រធានក្រុមនេះចាប់តាំងពីថ្ងៃទី២៣ ខែវិច្ឆិកា ឆ្នាំ២០២២ និងជាប្រធានចាប់តាំងពីថ្ងៃទី៣០ ខែមករា ឆ្នាំ២០២៤។

នៅក្នុងអាណត្តិជាប្រធាន គណៈប្រតិភូកម្ពុជាបានធ្វើជាតំណាងក្រុមចូលរួមនៅក្នុងកិច្ចប្រជុំពិភាក្សា និងចរចា ក្រោមក្របខ័ណ្ឌអង្គការ UNCTAD សរុបប្រមាណ ៩៥លើក រួមទាំងការសម្របសម្រួល ផ្ដល់ធាតុចូលនានារបស់ក្រុមនេះទៅក្នុងកិច្ចពិភាក្សានៅទីក្រុងញូវយ៉ក ព្រមទាំងបានដឹកនាំការពិភាក្សា និងបង្កើតក្រុមការងារចំនួន៣ គឺក្រុមការងារស្តីពីសេដ្ឋកិច្ចឌីជីថល និងឌីជីថលរូបនីយកម្មសម្រាប់អភិវឌ្ឍន៍ ក្រុមការងារស្តីពីហិរញ្ញប្បទានសម្រាប់​អភិវឌ្ឍន៍ និងក្រុមការងារស្តីពីបម្រែបម្រួលអាកាសធាតុ ពាណិជ្ជកម្ម និងការអភិវឌ្ឍប្រកបដោយចីរភាព។

បន្ថែមពីនេះ គណៈប្រតិភូកម្ពុជាបានសម្របសម្រួលរៀបចំខួបលើកទី៦០ឆ្នាំនៃការបង្កើតក្រុមG77 និងចិន កាលពីថ្ងៃទី១៣ ខែកញ្ញា ឆ្នាំ២០២៤ ប្រកបដោយជោគជ័យ និងផ្លែផ្កា ដោយមានការរៀបចំវេទិកាកិច្ចសន្ទនាកម្រិតខ្ពស់ និងបានដាក់ចេញនូវសេចក្តីថ្លែងការណ៍រួមកម្រិតអគ្គរាជ/រដ្ឋទូត និងសេចក្តីប្រកាសព័ត៌មានជាអាទិ៍ ព្រមទាំងបានដឹកនាំ និងសម្របសម្រួលកិច្ចពិភាក្សា និងចរចាផ្ទៃក្នុង សម្រាប់ស្វែងរកជំហររួម ដើម្បីជាមូលដ្ឋានគោលសម្រាប់ចូលរួមចរចានៅក្នុងកិច្ចប្រជុំថ្នាក់រដ្ឋមន្ត្រីអង្គការ UNCTAD លើកទី១៦ ដែលគ្រោងប្រព្រឹត្តទៅនៅខែតុលា ឆ្នាំ២០២៥ ខាងមុខ។

ក្នុងឱកាសនោះ លោកអគ្គលេខាធិការរងបានថ្លែងអំណរគុណ និងកោតសរសើរគណប្រតិភូកម្ពុជា ក្នុងការដឹកនាំក្រុមប្រទេស G77 និងចិន ប្រកបដោយការទទួលខុសត្រូវ និងមានគោលដៅច្បាស់លាស់ ព្រមទាំងគូសបញ្ជាក់អំពីការបន្តគាំទ្រ ការចរចាសម្រាប់កិច្ចប្រជុំថ្នាក់រដ្ឋមន្ត្រី និងលើកកម្ពស់ប្រព័ន្ធពហុភាគីនិយមសម្រាប់ពាណិជ្ជកម្ម និងអភិវឌ្ឍន៍ ផងដែរ។

បន្ថែមលើការប្តេជ្ញាដឹកនាំក្រុមរបស់ប្រទេសប៉េរូជាប្រធានដឹកនាំថ្មី តំណាងក្រុមប្រទេសអភិវឌ្ឍន៍តិចតួច ក្រុមប្រទេសអាស៊ីប៉ាស៊ីហ្វិក ក្រុមប្រទេសអាហ្វ្រិក ក្រុមប្រទេសអាម៉េរិកឡាទីន និងការ៉ាអ៊ីព ក្រុមប្រទេសអារ៉ាប់ ក្រុមប្រទេសកម្រងកោះកំពុងអភិវឌ្ឍន៍ និងសមាជិកជាច្រើន ក៏បានចូលរួមផុលផុសធ្វើបទអន្តរាគមន៍កោតសរសើរ និងវាយតម្លៃខ្ពស់ចំពោះគណៈប្រតិភូកម្ពុជា ក្នុងការដឹកនាំក្រុមប្រទេសG77 និងចិន ក្នុងអាណត្តិរបស់ខ្លួនប្រកបដោយផ្លែផ្កា និងសមិទ្ធផលជាច្រើន បើទោះបីកម្ពុជាជាប្រទេសអភិវឌ្ឍន៍តិចតួចក្តី៕​ វិន ឈុនហ៊ាត