ភ្នំពេញ ៖ វេទិកាពាណិជ្ជកម្មឌីជីថលកម្ពុជា និងពិព័រណ៍អនឡាញ លើកទី១ ក្រោមមូលបទ «ផលិតផលកម្ពុជា ឆ្ពោះទៅកាន់ពាណិជ្ជកម្មសកល» ដែលជាព្រឹត្តិការណ៍អមក្នុងកំឡុង «ពិព័រណ៍ពាណិជ្ជកម្មកម្ពុជា» បានត្រូវរៀបចំឡើងចាប់ពីថ្ងៃទី១៣ ដល់ទី១៦ ខែធ្នូ ឆ្នាំ២០២៤ នៅមជ្ឈមណ្ឌល ភី អេច ហ្រ្គេនហល បុរីប៉េងហួត ដើម្បីលើកកម្ពស់ការអភិវឌ្ឍពាណិជ្ជកម្មឌីជីថល និងជំរុញការនាំចេញផលិតផលកម្ពុជាទៅកាន់ទីផ្សារសកល ។

ព្រឹត្តិការណ៍ដ៏សំខាន់នេះ មានការអញ្ជើញចូលរួមថ្លែងសុន្ទរកថាគន្លឹះពីរដ្ឋមន្ត្រីក្រសួងពាណិជ្ជកម្ម រដ្ឋមន្ត្រីក្រសួងប្រៃសណីយ៍​ និងទូរគមនាគមន៍ និងឯកអគ្គរដ្ឋទូតនៃសហភាពអឺរ៉ុបប្រចាំកម្ពុជា។

លោកជំទាវ ចម និម្មល រដ្ឋមន្រ្តី ក្រសួងពាណិជ្ជកម្ម បានថ្លែងថា៖ វេទិកាពាណិជ្ជកម្មឌីជីថលកម្ពុជា និងពិព័រណ៍អនឡាញ លើកទី១ មានគោលបំណងធំៗចំនួន៣ ៖ ទី១- លើកកម្ពស់ការអភិវឌ្ឍពាណិជ្ជកម្មឌីជីថលកម្ពុជា (ទាំងក្របខណ្ឌគោលនយោបាយ ច្បាប់ និងលិខិតបទដ្ឋានគតិយុត្ត ហេដ្ឋារចនាសម្ព័ន្ធគាំទ្រ និងអក្ខរកម្មឌីជីថល) , ទី២- ការធ្វើពិពិធកម្មទីផ្សារសម្រាប់ផលិតផលក្នុងស្រុក/ផលិតផលកម្ពុជា (Cambodia made products) ពិសេសការជំរុញការនាំចេញផលិតផលកម្ពុជាទៅកាន់ទីផ្សារសកល (Cambodia2Global) តាមរយៈថ្នាលពាណិជ្ជកម្មតាមប្រព័ន្ធអេឡិចត្រូនិក ឬបច្ចេកវិទ្យាឌីជីថល និង ទី៣- ការពង្រឹងសមត្ថភាព និងការចូលរួមរបស់វិស័យឯកជន និងភាគីពាក់ព័ន្ធ ក្នុងការអភិវឌ្ឍពាណិជ្ជកម្មឌីជីថលកម្ពុជា។

លោកជំទាវរដ្ឋមន្ត្រី បានបញ្ជាក់ថា ៖

«វេទិកានេះបានបង្ហាញពីការធ្វើដំណើរទៅមុខដ៏សំខាន់ក្នុងកិច្ចខិតខំប្រឹងប្រែងរួមគ្នារបស់យើងដើម្បីអភិវឌ្ឍប្រព័ន្ធអេកូឌីជីថលរបស់កម្ពុជាស្របទៅនឹងគោលដៅយុទ្ធសាស្ត្រចតុកោណដំណាក់កាលទី១ និងទស្សនៈវិស័យកម្ពុជានៅឆ្នាំ២០៣០ និងឆ្នាំ២០៥០»។

លោកជំទាវ បានបន្ថែមថា៖ វិស័យពាណិជ្ជកម្មអេឡិចត្រូនិក និងពាណិជ្ជកម្មឌីជីថលរបស់កម្ពុជាកំពុងទទួលបានការរីកចម្រើនដ៏រស់រវើក និងមិនធ្លាប់មានពីមុនមក ជាពិសេសបន្ទាប់ពីជំងឺរាតត្បាតកូវីដ-១៩ ដែលឆ្លុះបញ្ចាំងពីភាពរឹងមាំ និងភាពធន់នៃសេដ្ឋកិច្ចកម្ពុជា។ កំណើននេះត្រូវបានជំរុញដោយសហគ្រិនច្នៃប្រឌិត ប្រជាជនដែលយល់ដឹងអំពីបច្ចេកវិទ្យា និងការពង្រីកយ៉ាងឆាប់រហ័សនៃការតភ្ជាប់ឌីជីថល។ វិធានការសកម្មរបស់រដ្ឋាភិបាលក្នុងការពង្រឹងហេដ្ឋារចនាសម្ព័ន្ធឌីជីថលពង្រឹងគោលនយោបាយ និងបទប្បញ្ញ​ត្តិ ព្រមទាំងការលើកកម្ពស់ចំណេះដឹងផ្នែកឌីជីថល បានធ្វើឱ្យវិស័យទាំងនេះរួមចំណែកដ៏សំខាន់ដល់ GDP និងប្រភព​ការងាររបស់កម្ពុជា។ ទីផ្សារឌីជីថលដ៏រស់រវើករបស់កម្ពុជាគឺជាសក្ខីភាពមួយចំពោះសក្តានុពលរបស់ប្រទេសជាតិក្នុងការដែលមិនត្រឹមតែចូលរួមប៉ុណ្ណោះទេ ប៉ុន្តែថែមទាំងរួមចំណែកយ៉ាងសំខាន់ដល់សេដ្ឋកិច្ចឌីជីថលពិភពលោកផងដែរ។

លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម បានមានប្រសាសន៍ថា៖

«ប្រព័ន្ធ​អេកូឡូស៊ី​ដែល​រីកចម្រើន​នេះ​មាន​សារសំខាន់​សម្រាប់​ទាក់ទាញ​ការវិនិយោគ​ពី​បរទេស ជំរុញ​កំណើន​សហគ្រាស​ធុនមីក្រូ ​តូច និង​មធ្យម និង​លើកកម្ពស់​ការប្រកួតប្រជែង​របស់​យើង​នៅលើ​ឆាក​អន្តរជាតិ​»។

ឯកឧត្តម Igor Driesmans ឯកអគ្គរដ្ឋទូតនៃសហភាពអឺរ៉ុបប្រចាំកម្ពុជាបានថ្លែងដោយសង្កត់ធ្ងន់លើការប្តេជ្ញាចិត្តរបស់សហភាពអឺរ៉ុបក្នុងការជួយដល់ប្រទេសកម្ពុជាក្នុងការសម្រេចបាននូវចក្ខុវិស័យរបស់ខ្លួនគឺ «កម្ពុជាផលិតទៅកាន់ពាណិជ្ជកម្មសកល» តាមរយៈការចែករំលែកចំណេះដឹង និងជំនួយបច្ចេកទេសធ្វើឱ្យមានតុល្យភាពរវាងការច្នៃប្រឌិតប្រកបដោយការទទួលខុសត្រូវ។

ឯកអគ្គរដ្ឋទូតបានបញ្ជាក់ថា៖

«សហភាពអឺរ៉ុបបានប្តេជ្ញាចិត្តក្នុងការជំរុញឌីជីថលូបនីយកម្ម បង្កើនកិច្ចការពារអ្នកប្រើប្រាស់ និងទិន្នន័យ និងការកែលម្អលទ្ធភាពទទួលបានទីផ្សារសម្រាប់សហគ្រាសធុនតូច និងមធ្យម និងសហគ្រិនជាផ្នែកនៃយុទ្ធសាស្ត្រច្រកផ្លូវសកល និងគំនិតផ្តួចផ្តើមក្រុមអឺរ៉ុបនៅកម្ពុជា»។

ឯកឧត្តមបណ្ឌិត ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានអញ្ជើញចូលរួមចែករំលែកអំពីការចូលរួមរបស់រដ្ឋាភិបាលឌីជីថលនៃការធ្វើបរិវត្តកម្មពាណិជ្ជកម្ម និងអនាគតនៃរដ្ឋាភិបាលឌីជីថលកម្ពុជា ។

ឯកឧត្តមបានលើកឡើងថា៖ ចាប់តាំងពីឆ្នាំ២០០០មក កម្ពុជាបានចាប់ផ្តើមដំណើរការនៃការធ្វើបរិវត្តកម្មឌីជីថល។ រាជរដ្ឋាភិបាលបានយកចិត្តទុកដាក់ខ្ពស់លើការប្រើប្រាស់បច្ចេកវិទ្យាឌីជីថលសម្រាប់ការអភិវឌ្ឍប្រទេស។ ការរីករាលដាលនៃជំងឺកូវីដ១៩ បានជំរុញឱ្យរដ្ឋាភិបាលចាប់យកបច្ចេកវិទ្យាជាបន្ទាន់។

ឯកឧត្តមរដ្ឋមន្ត្រីបានគូបញ្ជាក់ថា ៖

«បច្ចេកវិទ្យាឌីជីថល បានក្លាយជាកត្តាចាំបាច់សម្រាប់ជាពលរដ្ឋ ធុរកិច្ច និងរដ្ឋាភិបាល ក៏ដូចជាជំរុញកម្ពុជាឆ្ពោះទៅរកយុគសម័យសេដ្ឋកិច្ចសង្គមឌីជីថល»

គួរបញ្ជាក់ផងដែរ នៅក្នុងវេទិកាពាណិជ្ជកម្មឌីជីថលកម្ពុជា និងពិព័រណ៍អនឡាញនេះ ក៏មានរៀបចំនូវកិច្ចពិភាក្សា ដែលមានវាគ្មិនចូលរួមពីតំណាងរាជរដ្ឋាភិបាល អង្គការអន្តរជាតិ និងក្រុមហ៊ុនល្បីៗ លើប្រធានបទសំខាន់ៗដូចជា ពាណិជ្ជកម្មឌីជីថល, រាជរដ្ឋាភិបាលឌីជីថល, បញ្ញាសិប្បនិម្មិត, កិច្ចការពារអ្នកប្រើប្រាស់ និងសញ្ញាសម្គាល់ការជឿទុកចិត្តសម្រាប់ពាណិជ្ជកម្មអេឡិចត្រូនិកកម្ពុជា, កិច្ចការពារទិន្នន័យ និងឯកជនភាព ព្រមទាំងប្រធានបទពាក់ព័ន្ធសំខាន់ៗមួយចំនួនទៀត ព្រមទាំងកិច្ចពិភាក្សារបស់យុវជនអំពីអនាគតនៃ AI ក្នុងពាណិជ្ជកម្មឌីជីថលនៅកម្ពុជា និងការរៀបចំពិព័រណ៍អនឡាញតាំងបង្ហាញនូវផលិតផលខ្មែរជាច្រើន តាមរយៈថ្នាលបច្ចេកវិទ្យាឌីជីថល CambodiaTrade.com ផងដែរ៕