ភ្នំពេញ៖ នៅឆ្នាំ២០២៣ ប្រាក់ចំណូលពីពាណិជ្ជកម្មអេឡិចត្រូនិក( e-commerce) របស់កម្ពុជាបានឡើងដល់ ១ ០៩៧ លានដុល្លារ ហើយវាត្រូវបានព្យាករថានឹងបន្តកើនឡើងដល់ ១ ៧៧៨ លានដុល្លារនៅឆ្នាំ ២០២៧ ជាមួយនឹងអត្រាកំណើនប្រចាំឆ្នាំប្រហែល ១០%។ នេះបើតាមការថ្លែងរបស់លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្មនៅក្នុងឱកាសពិព័រណ៍ពាណិជ្ជកម្មកម្ពុជា ក្រោមមូលបទ «យុគសម័យថ្មី នៃពាណិជ្ជកម្ម» ដែលប្រព្រឹត្តទៅចាប់ពីថ្ងៃទី១៣ ដល់ទី ១៦ ខែធ្នូ ឆ្នាំ២០២៤ នៅមជ្ឈមណ្ឌល ភីអេច ហ្គ្រេនហល បុរីប៉េងហួត បឹងស្នោ រាជធានីភ្នំពេញ។

លោកជំទាវ ចម និម្មល បានលើកឡើងថា ៖ កំណើននៃប្រាក់ចំណូល E-Commerce របស់កម្ពុជា ត្រូវបានជំរុញដោយវិស័យសំខាន់ៗមួយចំនួនដូចជា ហ្វេសសិន និងសំលៀកបំពាក់ (២៣.%); អេឡិចត្រូនិក (២២.៧%); សម្រស់ សុខភាព និងការថែទាំគ្រួសារ (២០.៦%); អាហារ និងភេសជ្ជៈ (៩.១%); ប្រដាប់ក្មេងលេង ចំណង់ចំណូលចិត្ត និងផលិតផលផលិតដោយខ្លួនឯង  (៥.៦%); គ្រឿងសង្ហារិម និងផ្ទះ (៤.១%) ព្រមទាំងប្រព័ន្ធផ្សព្វផ្សាយ (១%) ។

គិតត្រឹមខែមករា ឆ្នាំ២០២៤ ប្រជាជនកម្ពុជា ត្រូវបានប៉ាន់ប្រមាណថា មានប្រហែល ១៧.០៣លាននាក់ ជាមួយនឹងអត្រាកំណើនប្រចាំឆ្នាំប្រហែល ១.១% ។ ជាងពាក់កណ្តាលនៃចំនួនប្រជាជន (ប្រហែល ៥១.៣%) នៅក្នុងក្រុមអាយុ ១៨-៥៤ ដែលត្រូវបានចាត់ទុកថាជាក្រុមដែលមានជំនាញខាងបច្ចេកវិទ្យាដ៏មានសក្តានុពល។

យោងតាមនិយតករទូរគមនាគមន៍កម្ពុជា គិតត្រឹមខែមិថុនា ឆ្នាំ២០២៤ មានអ្នកប្រើប្រាស់អ៊ីនធឺណិតចំនួន ២០លាននាក់នៅក្នុងប្រទេសកម្ពុជា (ទូរស័ព្ទចល័ត និងចម្រុះ) កើនឡើងពី ១៦.៦លាននាក់ក្នុងឆ្នាំ២០២០ ក្នុងអំឡុងពេលជំងឺរាតត្បាត។ ក្នុងរយៈពេលដូចគ្នា ការភ្ជាប់ទូរស័ព្ទចល័តសកម្ម មាន ២១,៩ លាននាក់ តំណាងឱ្យប្រមាណ ១២៨,៨% នៃប្រជាជនសរុប។

លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានមានប្រសាសន៍ទៀតថា ៖ ប្រទេសកម្ពុជាមានអ្នកប្រើប្រាស់ប្រព័ន្ធផ្សព្វផ្សាយសង្គមចំនួន ១១.៦៥លាននាក់ (ក្នុងខែមករា ឆ្នាំ ២០២៣) ដែលស្មើនឹង ៦៥.០% នៃចំនួនប្រជាជនសរុប។ គួរឱ្យចាប់អារម្មណ៍ថា ត្រឹមតែនៅក្នុងឆ្នាំ២០២៤ ការទូទាត់តាមប្រព័ន្ធឌីជីថល និងអេឡិចត្រូនិកនៅក្នុងព្រះរាជាណាចក្រកម្ពុជាបានកើនឡើងគួរឱ្យកត់សម្គាល់ ពីប្រតិបត្តិការប្រមាណ ១ ៧០០លានប្រតិបត្តិការ (ទាំងប្រាក់រៀល និងដុល្លារអាមេរិក) ដែលមានតម្លៃសរុបប្រមាណ ៤៩០ ពាន់លានដុល្លារក្នុងឆ្នាំ២០២៣ ដល់ជាង ២ ៧០០ លានប្រតិបត្តិការ ដែលមានតម្លៃសរុបប្រមាណ ៦៣០ប៊ីលានដុល្លារនៅឆ្នាំ២០២៤ (ប៉ាន់ស្មាន) ។

លោកជំទាវ ចម និម្មល បានគូសបញ្ជាក់ថា ៖ រាជរដ្ឋាភិបាលកម្ពុជាបានអនុវត្តគោលនយោបាយសំខាន់ៗ ដើម្បីជំរុញសេដ្ឋកិច្ចឌីជីថលដ៏រឹងមាំ ដូចជា ក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា (២០២១-២០៣៥) និងគោលនយោបាយរដ្ឋាភិបាលឌីជីថល (២០២២-២០៣៥)។ គំនិតផ្តួចផ្តើមទាំងនេះ ផ្តោតលើការកសាងហេដ្ឋារចនាសម្ព័ន្ធឌីជីថល ការកែលម្អជំនាញឌីជីថល និងការជំរុញការជឿទុកចិត្តលើប្រព័ន្ធឌីជីថល ព្រមទាំងផែនទីបង្ហាញផ្លូវអភិវឌ្ឍន៍ជំនាញឌីជីថល (២០២៤-២០៣៥) និងគោលនយោបាយអភិវឌ្ឍន៍បច្ចេកវិទ្យាហិរញ្ញវត្ថុកម្ពុជា (២០២៣-២០២៨)៕