ភ្នំពេញ ៖ មជ្ឈមណ្ឌលបណ្តុះធុរកិច្ចថ្មី “តេជោ” ដែលជាប្រតិបត្តិករនៃថ្នាលផ្លាស់ប្តូរទិន្នន័យកម្ពុជា(Cam​D​X) បានរៀបចំសិក្ខាសាលាស្តីពី “ប្រព័ន្ធអេកូឡូស៊ីថ្នាលផ្លាស់ប្តូរទិន្នន័យកម្ពុជា”នាថ្ងៃទី១ ខែតុលា ឆ្នាំ ២០២៥ នៅសណ្ឋាគាររ៉េស៊ីដង់ សុខាភ្នំពេញ ដោយមានការចូលរួមពីតួអង្គមកពីវិស័យសាធារណៈ វិស័យឯកជន និងដៃគូអភិវឌ្ឍពាក់ព័ន្ធនានា។

សិក្ខាសាលានេះត្រូវបានរៀបចំឡើងក្នុងគោលដៅ៖ទី១) បញ្ជ្រាបការយល់ដឹងឱ្យកាន់តែច្បាស់ពីសមិទ្ធផល និងយន្ដការនៃការប្រើប្រាស់ថ្នាល CamDX របស់រាជរដ្ឋាភិបាលឱ្យកាន់តែមានប្រសិទ្ធភាព និង ស័ក្តិសិទ្ធិភាព, ទី២) ជំរុញ និងបង្កើនការចូលរួមប្រើប្រាស់ផលិតផលឌីជីថលដែលមានស្រាប់នៅក្នុងប្រព័ន្ធអេកូឡូស៊ីថ្នាល CamDX, ទី៣) ផ្សព្វផ្សាយឱ្យកាន់តែទូលំទូលាយ និងច្បាស់លាស់ ដើម្បីឱ្យសាធារណជន និងតួអង្គពាក់ព័ន្ធអាចចូលរួមទាញយកផលប្រយោជន៍ជាអតិបរមាពីថ្នាល CamDX និង ទី៤) លើកទឹកចិត្តដល់ក្រសួង ស្ថាប័ន ធ្វើការផ្លាស់ប្តូរ ឬ ចែករំលែកទិន្នន័យ (បើកទិន្នន័ន័យគោល) និងការធ្វើអន្តរប្រតិបត្តិការនៅក្នុងប្រព័ន្ធអេកូឡូស៊ីថ្នាល CamDX សំដៅធ្វើឱ្យប្រសើរឡើងនូវការផ្តល់សេវាសាធារណៈអេឡិចត្រូនិកសម្រាប់ធុរកិច្ច។

សិក្ខាសាលានេះបានឆ្លុះបញ្ចាំងពីសារៈសំខាន់នៃការចូលរួមពីតួអង្គសំខាន់ៗទាំងវិស័យសាធារណៈ និងវិស័យឯកជនក្នុងការផ្លាស់ប្តូរ ឬចែករំលែកទិន្នន័យក្នុងប្រព័ន្ធអេកូឡូស៊ីថ្នាល CamDX ដែលរួមចំណែកក្នុងការជំរុញកំណើនសេដ្ឋកិច្ច ជាពិសេសសេដ្ឋកិច្ច API និង សង្គមឌីជីថលនៅប្រទេសកម្ពុជា។ បន្ថែមពីនេះ សិក្ខាសាលានេះបានលើកទឹកចិត្តដល់ក្រសួង ស្ថាប័ន ដែលកំពុងគ្រប់គ្រងទិន្នន័យគោលឱ្យចូលរួមចែករំលែកទិន្នន័យក្នុងប្រព័ន្ធអេកូឡូស៊ីថ្នាល CamDX ឱ្យបានកាន់តែច្រើន ដើម្បីធានាបាននូវប្រសិទ្ធភាពនៃការផ្តល់សេវាសាធារណៈរបស់រាជរដ្ឋាភិបាល និងសម្រួលដល់ប្រតិបត្តិការអាជីវកម្មនៃវិស័យឯកជនតាមទម្រង់ឌីជីថលស្របតាមមុំទី៥ នៃយុទ្ធសាស្រ្តបញ្ចកោណដំណាក់កាលទី១របស់រាជរដ្ឋាភិបាល។

ឯកឧត្តមបណ្ឌិត តាំង ងួនលី នាយកប្រតិបត្តិមជ្ឈមណ្ឌលបណ្តុះធុរកិច្ចថ្មី “តេជោ” បានមានប្រសាសន៍ថា ថ្នាល CamDX ត្រូវបានដាក់ដំណើរការជាផ្លូវការស្របពេលដែលដាក់ដំណើរការប្រព័ន្ធចុះបញ្ជីអាជីវកម្មតាមប្រព័ន្ធបច្ចេកវិទ្យាព័ត៌មាននៅឆ្នាំ២០២០ ដែលកាលនោះបានភ្ជាប់ប្រព័ន្ធចំនួន ៥ ជាសារវ័ន្តគឺ ប្រព័ន្ធចុះបញ្ជីរបស់ក្រសួងពាណិជ្ជកម្ម, ប្រព័ន្ធចុះបញ្ជីកាសហគ្រាសរបស់ក្រសួងការងារ និងបណ្តុះបណ្តាលវិជ្ជាជីវៈ, ប្រព័ន្ធចុះបញ្ជីពន្ធដាររបស់អគ្គនាយកដ្ឋានពន្ធដារ, ប្រព័ន្ធគ្រប់គ្រងអត្តសញ្ញាណកម្មរបស់ក្រសួងមហាផ្ទៃ និង ប្រព័ន្ធ QIP របស់ក្រុមប្រឹក្សាអភិវឌ្ឍកម្ពុជា។ ផ្អែកលើមូលដ្ឋាននេះ, ថ្នាល CamDX បានពង្រឹង និងពង្រីកមុខងារទៅការផ្តល់សេវាសាធារណៈសម្រាប់ធុរកិច្ចពាក់ព័ន្ធនឹងការផ្តល់អាជ្ញាបណ្ណ, វិញ្ញាបនបត្រ, លិខិតអនុញ្ញាតនានា, និងការផ្តល់សេវារដ្ឋបាលផ្ទៀងផ្ទាត់ទិន្នន័យគោល e-KYC, e-KYB, និង សេវាឌីជីថលមួយចំនួនទៀត; បង្កើតបានជាប្រព័ន្ធអេកូឡូស៊ីឌីជីថលមួយដែលមានតួអង្គចូលរួមទាំងរដ្ឋ និងឯកជន បង្កើតបានជាប្រតិបត្តិការផ្លាស់ប្តូរទិន្នន័យរាប់សិបលាន។

គិតត្រឹមដំណាច់ខែកញ្ញា ឆ្នាំ២០២៥ ប្រតិបត្តិការសរុបលើថ្នាល CamDX មានប្រមាណជាង ៩៥ លានប្រតិបត្តិការ ដែលក្នុងនោះ មានក្រសួង ស្ថាប័ន ដែលបានចូលជាសមាជិកថ្នាល CamDX មានសរុបចំនួន ៨០ ដោយសមាជិកពីវិស័យសាធារណៈមានចំនួន ៣៣ និងវិស័យឯកជនមានចំនួន ៤៧ ។

ឯកឧត្តមបណ្ឌិត គង់ ម៉ារី រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលនៃមជ្ឈមណ្ឌលបណ្តុះធុរកិច្ចថ្មី “តេជោ”បានថ្លែងថា៖ ប្រព័ន្ធអេកូឡូស៊ីថ្នាលផ្លាស់ប្តូរទិន្នន័យកម្ពុជា (Cam​​DX) បង្ហាញពីយុទ្ធសាស្ត្រនៃការពន្លឿនការផ្តល់សេវាសាធារណៈសម្រាប់ធុរកិច្ចតាមប្រព័ន្ធអេឡិចត្រូនិក និងប្រមូលធាតុចូលដើម្បីស្វែងរកកាលានុវត្តភាពសម្រាប់ការអភិវឌ្ឍផលិតផលឌីជីថលថ្មីៗបន្ថែមទៀតក្រោមប្រព័ន្ធអេកូឡូស៊ីថ្នាល CamDX ។

រាជរដ្ឋាភិបាលនីតិកាលទី៧ នៃរដ្ឋសភា បានដាក់ចេញនូវ «យុទ្ធសាស្រ្តបញ្ចកោណ-ដំណាក់កាលទី ១» ដែលក្នុងនោះ បានចាត់ទុក “បច្ចេកវិទ្យាឌីជីថល” ជាអាទិភាពគន្លឹះមួយ និងត្រូវបានឆ្លុះបញ្ជាំងក្នុងបញ្ចកោណទី៥ គឺ ការអភិវឌ្ឍសេដ្ឋកិច្ច និង សង្គមឌីជីថល ដែលអនុវត្តតាមអភិក្រម “ជវភាពនៃប្រព័ន្ធតួអង្គតែមួយ”។ ជាមួយគ្នានេះ ដើម្បីជំរុញ និងពន្លឿនការធ្វើបរិវត្តកម្មឌីជីថល រាជរដ្ឋាភិបាលបានដើរតួនាទីជាគំរូ និងដឹកមុខក្នុងការចាប់យកបច្ចេកវិទ្យាឌីជីថល ដោយផ្តល់អាទិភាពលើការអភិវឌ្ឍ និងការពង្រឹងការប្រើប្រាស់ហេដ្ឋារចនាសម្ព័ន្ធឌីជីថលដែលមានស្រាប់, ការបន្តកសាង និងអភិវឌ្ឍទិន្នន័យគោល, ការធ្វើឌីជីថលូបនីយកម្ម និងការអភិវឌ្ឍស្តង់ដាបច្ចេកទេសរួម សម្រាប់ការផ្តល់សេវាសាធារណៈឌីជីថល, និងការបន្តកសាង និងអភិវឌ្ឍហេដ្ឋារចនាសម្ព័ន្ធសាធារណៈឌីជីថល ។

ស្របតាមក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥, “ថ្នាលឌីជីថល” និង “ទិន្នន័យ” ត្រូវបានចាត់ទុកជាស្នូលនៃការកសាងរដ្ឋាភិបាល និងសេដ្ឋកិច្ចឌីជីថល ព្រោះរបស់ទាំងពីរនេះជាមូលដ្ឋាននៃការផ្តល់សេវាសាធារណៈតាមប្រព័ន្ធអេឡិច-ត្រូនិក, ការបង្កើតឬសហបង្កើតឲ្យមានផលិតផល/សេវាកម្មឌីជីថលនានា និង ជាមូលដ្ឋានគ្រឹះនៃការចាប់យកបញ្ញាសិប្បនិម្មិត ក្រោមក្របខ័ណ្ឌអន្តរប្រតិបត្តិការ, អភិបាលកិច្ចទិន្នន័យ និងការបើកចំហទិន្នន័យ (Open Data)។

ឯកឧត្តមបានបន្តថា៖CamDX បាន និង កំពុងដើរតួនាទីជាឃ្នាស់យ៉ាងសំខាន់ មិនត្រឹមតែជំរុញល្បឿន និង ប្រសិទ្ធភាពនៃការផ្តល់សេវាសាធារណៈសម្រាប់ធុរកិច្ចតាមប្រព័ន្ធអេឡិចត្រូនិក ថែមទាំងបានបង្កើតកាលានុវត្តភាព និង នវានុវត្តថ្មីៗសម្រាប់វិស័យឯកជនតាមរយៈការទាញយកប្រយោជន៍ពីទិន្នន័យរបស់រាជរដ្ឋាភិបាល តាមរយៈសេវាកម្ម e-KYC និង e-KYB ជាដើម ។

សិក្ខាសាលានេះមានបទបង្ហាញចំនួន ៣ ស្ដីពី “ប្រព័ន្ធអេកូឡូស៊ីថ្នាលផ្លាស់ប្ដូរទិន្នន័យកម្ពុជា” , “ប្រព័ន្ធគំរូស្ដង់ដា (Generic Template) សម្រាប់ការផ្ដល់សេវាអេឡិចត្រូនិកសម្រាប់ធុរកិច្ច” និង “នីតិវិធីចូលជាសមា​ជិកថ្នាលផ្លាស់ប្ដូរទិន្នន័យកម្ពុជាដើម្បីប្រើប្រាស់សេវាផ្សេងៗនៅក្នុងប្រព័ន្ធអេកូឡូស៊ីថ្នាល CamDX”៕