សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី Oil Price បានឱ្យដឹងថា ការហាមឃាត់របស់ចិនលើការនាំចេញលោហៈធាតុកម្រកំពុងរារាំងដល់ផែនការបង្កើតមនុស្សយន្តរបស់ក្រុមហ៊ុនអាម៉េរិក Tesla ខណៈដែលកិច្ចចរចាទៅលើសង្គ្រាមពាណិជ្ជកម្មរវាងមហាអំណាចទាំង២នៅមិនទាន់កើតមាននៅឡើយ។
ថ្មីៗនេះ ចិនបានផ្អាកការនាំចេញធនធានរ៉ែកម្រ និងមេដែកសំខាន់ៗជាច្រើន ដែលជាសងសឹកចំពោះពន្ធគយរបស់សហរដ្ឋអាម៉េរិក ហើយវាបានរំខានដល់ផែនការមួយចំនួនរបស់ Elon Musk ក្នុងការសាងសង់មនុស្សយន្ត។ វិធានការរបស់រដ្ឋាភិបាលទីក្រុងប៉េកាំងក្នុងការរារាំងការផ្គត់ផ្គង់សមាសធាតុសំខាន់ៗ បង្ហាញពីតម្រូវការជីកយករ៉ែ និងការចម្រាញ់រ៉ែកម្របន្ទាន់របស់អាម៉េរិកសម្រាប់ផ្គត់ផ្គង់ខ្សែសង្វាក់បចេ្ចកវិទ្យា ប្រសិនបើមហាអំណាចមួយនេះមានមហិច្ឆិតារក្សាឱ្យបាននូវភាពលេចធ្លោរបស់ខ្លួននៅទសវត្សរ៍ឆ្នាំ២០៣០។
កាលពីថ្ងៃអង្គារ៍ លោក Elon Musk លើកឡើងថា គម្រោងបង្កើតមនុស្សយន្ត Optimus Humanoid បានជួបបញ្ហាដោយសារតែការហាមឃាត់របស់ទីក្រុងប៉េកាំងលើការនាំចេញលោហៈធាតុកម្រ និងមេដែកដែលសំខាន់សម្រាប់ម៉ូទ័រផ្តល់ថាមពលដល់មនុស្សយន្ត។ មនុស្សយន្ត Optimus Humanoid របស់ក្រុមហ៊ុន Tesla មានម៉ូទ័រដែលអាចដំណើរការក្នុងទីធ្លាចង្អៀត ប៉ុន្តែវាត្រូវការមេដែកពិសេសកម្របំផុត neodymium-iron-boron (NdFeB) ដែលមានសារៈសំខាន់សម្រាប់ការផ្តល់ថាមពលដល់ម៉ូទ័រដែលបញ្ជាដល់ការធ្វើចលនារបស់មនុស្សយន្ត។ ដូច្នោះហើយ ការហាមឃាត់របស់ចិនមានផលប៉ះពាល់កាន់តែខ្លាំងដល់ខ្សែសង្វាក់ផ្គត់ផ្គង់ ហើយកង្វះម៉ាញេទិចអាចពន្យឺតដល់ការផលិតមនុស្សយន្ត Optimus Humanoid ។
ទន្ទឹមនឹងនេះ ចិនស្ទើរតែមានសិទ្ធិផ្តាច់មុខលើ NdFeB ដោយសារប្រទេសនេះគ្រប់គ្រងទាំងការទាញចេញ និងការចម្រាញ់ធនធានរ៉ែកម្រ ដើម្បីផលិតមេដែកដ៏មានឥទ្ធិពល។ លើសពីនេះ Tesla ទទួលបានប្រភព NdFeB ទាំងអស់របស់ខ្លួនពីអ្នកផ្គត់ផ្គង់របស់ចិន ខណៈដែលការដឹកជញ្ជូនចុងក្រោយបំផុតរបស់ Tesla មានប្រភពមកពីប្រទេសចិន ៤០,៦៣% ។ បញ្ហាជាមួយនឹងខ្សែសង្វាក់ផ្គត់ផ្គង់លោហៈធាតុកម្ររបស់ពិភពលោកភាគច្រើនដែលមានមូលដ្ឋាននៅក្នុងប្រទេសចិនបានបង្ហាញថា ទីក្រុងប៉េកាំងមានសមត្ថភាពអាចផលិតអាវុធផ្តាច់មុខជាសាកលរបស់ខ្លួនប្រឆាំងនឹងសហរដ្ឋអាម៉េរិក។ ករណីនេះបង្កការគំរាមកំហែងសន្តិសុខជាតិដល់សហរដ្ឋអាម៉េរិក ដោយសារតែលោហៈទាំងនេះត្រូវបានប្រើប្រាស់ដោយក្រុមហ៊ុនអាម៉េរិកដែលផលិតមនុស្សយន្ត យន្តហោះគ្មានមនុស្សបើក យានយន្តអគ្គិសនី បច្ចេកវិទ្យាស្អាត ទូរស័ព្ទដៃ យន្តហោះចម្បាំង F-35 និងថាមពលនុយក្លេអ៊ែរ៕
Account
Security
Favourite Content