សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្នុងដំណើរទស្សនកិច្ច និងពិភាក្សាការងារជាមួយប្រធានក្រុមហ៊ុន Guangzhou Metro Group កាលពីថ្ងៃចុងសប្ដាហ៍កន្លងទៅ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជា បានលើកឡើងពីបំណងដែលចង់ឃើញកម្ពុជាមានគម្រោងផ្លូវរថភ្លើងនៅក្នុងទីក្រុងភ្នំពេញនាថ្ងៃអនាគត។
ឆ្លើយតបក្នុងអង្គជំនួបនេះ លោកប្រធានក្រុមហ៊ុន Guangzhou Metro Group បានបង្ហាញចំណាប់អារម្មណ៍អំពីសក្តានុពលក្នុងការកសាងផ្លូវរថភ្លើងក្នុងទីក្រុងភ្នំពេញ និងការតភ្ជាប់ពីក្រុងភ្នំពេញទៅកាន់អាកាសយានដ្ឋានថ្មីដែលនឹងដាក់ឱ្យប្រើប្រាស់នៅក្នុងឆ្នាំ២០២៥ ខាងមុខ។
ចេញពីបទពិសោធន៍ដែលបានអនុវត្តផ្ទាល់នៅក្នុងប្រទេសចិន លោកប្រធានក្រុមហ៊ុន បានបង្ហាញពីភាពរីកចម្រើនយ៉ាងឆាប់រហ័សរបស់ទីក្រុងបន្ទាប់ពីបានឱ្យប្រើប្រាស់ជាផ្លូវការនូវប្រព័ន្ធរថភ្លើងមេត្រូ (Metro) នេះ ហើយលោកថែមទាំងបានសង្កត់ធ្ងន់ពីកត្តាជោគជ័យរបស់ក្រុមការងារទាំងមូលក្នុងការអភិវឌ្ឍគម្រោងផ្លូវដែកនៅក្នុងទីក្រុង គឺអាស្រ័យទៅលើកិច្ចសហការរបស់ភាគីពាក់ព័ន្ធក្នុងដំណាក់កាលរៀបចំផែនការ។
ទាក់ទិននឹងចំណុចនេះ ថ្វីត្បិតថាមិនទាន់មានការបញ្ជាក់ណាមួយអំពីគម្រោងសិក្សាជាក់លាក់ក៏ដោយ ក៏អ្នកជំនាញនៅតែមានសុទិដ្ឋិនិយមខ្ពស់ និងជឿថាគម្រោងនេះនឹងលេចរូបរាងនៅកម្ពុជាក្នុងពេលឆាប់ៗខាងមុខ។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានឱ្យដឹងថា ៖
«ផ្លូវដែកនេះនិយាយដោយឡែក វាមានសារៈសំខាន់ណាស់សម្រាប់វិស័យដឹកជញ្ជូន ព្រោះថាការដឹកជញ្ជូនតាមផ្លូវដែក ងាយស្រួល មានតម្លៃទាប និងឆាប់រហ័ស»។
អ្នកឧកញ៉ាបន្តថា មិនត្រឹមតែសម្រាប់ការដឹកជញ្ជូននោះទេ វាក៏អាចជួយសម្រួលដល់ការធ្វើដំណើរនៅក្នុងក្រុងផងដែរ ព្រោះតែកាលណាចំនួនប្រជាជនកើនឡើង ទីក្រុងមានការអភិវឌ្ឍ នោះបញ្ហាកកស្ទះក្នុងក្រុងនឹង កើតមានកាន់តែខ្លាំង។ ម្លោះហើយ ទៅថ្ងៃខាងមុខ គេអាចចាត់ទុកមធ្យោបាយធ្វើដំណើរនេះជាមធ្យោបាយសាធារណៈមួយសម្រាប់ប្រជាជន។
ទន្ទឹមនឹងនេះ រាជរដ្ឋាភិបាលកម្ពុជាក៏មានគោលជំហររឹងមុំា ក្នុងការអភិវឌ្ឍលើវិស័យផ្លូវដែកនៅក្នុងប្រទេស ដើម្បីបង្កើនភាពងាយស្រួលដល់ប្រជាពលរដ្ឋកម្ពុជា និងជាផ្លូវយុទ្ធសាស្ត្រដឹកជញ្ជូនសម្រាប់វិនិយោគិនផងដែរ។
គួរបញ្ជាក់ផងដែរថា ស្ថានីយរថភ្លើង Guangzhou Metro នេះជាស្ថានីយរថភ្លើងមួយនៅក្នុងប្រទេសចិន ដែលរត់ក្នុងល្បឿន១៦០គីឡូម៉ែត្រក្នុងមួយម៉ោង បំពាក់ដោយបច្ចេកវិទ្យាទំនើប និងមានប្រព័ន្ធឌីជីថលសម្រាប់តាមដាន និងគ្រប់គ្រងដំណើរការរបស់រថភ្លើង និងស្ថានីយទាំងមូល៕
Account
Security
Favourite Content